[Bjeshka1]

Amerika ka ndarë 400 milionë dollarë për Kosovën. Këto para do të përdoren për shlyerjen e borxhit të jashtëm gjatë katër vjetëve të ardhshme.

Prishtinë, 3 korrik,—
Shtetet e Bashkuara të Amerikës do të ndajnë një ndihmë prej 400 milionë dollarësh për Kosovën gjatë javës së ardhshme në konferencën e donatorëve, që do të mbahet më 11 korrik në Bruksel. SHBA-të presin që Kosova të përfitojë më tepër se 1 miliard dollarë nga kjo konferencë. “Shtetet e Bashkuara do të ndajnë 400 milionë euro gjatë katër vjetëve të ardhshme. Presim që nga konferenca e donatorëve të zotohen më tepër se 1 miliard dollarë. Këto do ta ndihmonin qeverinë kosovare që të ketë një fillim të mirë”, tha Daniel Fried, ndihmës- sekretar amerikan i shtetit. Një zyrtar amerikan i ka thënë agjencisë Reuters në kushte anonimiteti, se nga shuma prej 400 milionë dollarëve, Kongresi tashmë i ka aprovuar 291 milionë dollarë. Sipas tij, këto para do të përdoren për të shlyer borxhin e jashtëm, të cilin Kosova e ka marrë përsipër pas shpalljes së pavarësisë. Qeveria e Kosovës mendon që të përfitojë 1.4 miliardë euro nga konferenca e donatorëve, vetëm si mbështetje ndaj buxhetit. Aq është paraparë edhe deficiti në kornizën afatmesme të shpenzimeve deri më 2011, ky hyn edhe pagesa e borxhit të jashtëm.

Ndryshe, nga kjo konferencë, qeveria do të kërkojë përkrahje për qindra projekte, kryesisht komunale, vlera e financimit të të cilave i kalon 3 miliardë euro. Deri tash janë të siguruara 400 milionë dollarë nga SHBA-të dhe së paku 50 milionë euro nga Komisioni Evropian. Ministri i Ekonomisë dhe Financave është shprehur i bindur se do të përfitohen së paku 1.4 miliardë euro si mbështetje ndaj buxhetit dhe do të përkrahen edhe një varg projektesh, më 11 korrik. Ministri Shala e ka pranuar se disa nga projektet nuk janë aq reale. Por, nga Komisioni Evropian nuk janë në gjendje të japin shifra. KE që është edhe mikpritësi i kësaj konference, ka ftuar që të marrin pjesë për të dhënë donacione të gjitha vendet e Bashkimit Evropian, SHBAte e shumë shtete tjera të zhvilluara, si dhe organizatat financiare ndërkombëtare, në mesin e të cilave edhe bankat më të mëdha që përkrahin zhvillimin.