[Zero Cool]

Pacolli: Sinjale pozitive edhe nga Tanzania!





Në kuadër të turneut lobues për shtimin e njohjeve të reja për Republikën e Kosovës, zëvendëskryeministri i parë i Qeverisë së Republikës së Kosovës, Behgjet Pacolli, ka vizituar shtetin e Tanzanisë.
Në qytetin e Dar es Salaam, zëvendëskryeministri Pacolli është pritur me nderimet më të larta shtetërore, dhe është takuar me presidentin e Tanzanisë, Jakaya Kikwete, dhe ministrin e punëve të jashtme të këtij shteti, Bernard Membe.

Gjatë këtij takimi është diskutuar gjatë për rrethanat aktuale politike në Kosovë dhe për mundësinë e njohjes së shpejtë të Republikës së Kosovës nga Tanzania. “Sinjalet janë pozitive edhe nga Tanzania. Ata e kanë akceptuar drejt argumentimin tonë për kërkesën e njohjes së Republikës së Kosovës”, ka thënë zv/kryeministri Pacolli, njofton zyra e tij.

Pacolli po ashtu, gjatë këtij turneu lobues në vendet e Afrikës Jugore, ka diskutuar edhe për mundësinë e njohjes në bllok të Republikës së Kosovës nga SADC (komuniteti zhvillimor i vendeve të Afrikës Jugore), në të cilën bëjnë pjesë 14 shtete. Nga kjo organizatë, Kosovën e kanë njohur vetëm shteti i Malawit dhe Swaziland, ndërsa pas vizitave të zëvendëskryeministrit Pacolli, “priten shumë shpejt lajme të mira edhe në këtë drejtim”.