[Espresso]

Kosova humbi njeriun e paqes dhe të pavarësisë, u tha në mbledhjen e sotme komemorative




Prishtinë, 22 janar - Kuvendi i Kosovës sot në mesditë në një seancë komemorative nderoi Presidentin e Kosovës Dr.Ibrahim Rugova, në prani të familjarëve, të gjithë kabinetit qeveritar, të kryeadministratorit Petersen, komandantit të KFOR-it gjeneralit Valoto, shefit të misionit amerikan Filip Goldberg dhe të misioneve të tjera ndërkombëtare, si dhe të mysafirëve të tjerë të pranishëm në sallën e mbledhjeve të Kuvendit.
Fillimisht të pranishmit kanë nderuar me një minutë heshtje presidentin Rugova, që ndërroi jetë dje në mesditë, ndërsa të pranishëmve u është drejtuar kryetari i Kuvendit Nexhat Daci, njëherit edhe ushtrues i detyrës së Kryetarit të Kosovës, kryeministri Kosumi dhe kryeadministratori Petersen.
Daci tha se edhe familja Rugova duhet të jetë krenare sikurse të gjithë të tjetërt, në këto çaste të pikëllimit të thellë, për veprën dhe jetën e Presidentit dr.Rugova. Ai si askush tjetër e ngriti popullin e Kosovës, i ngriti dinjitetin dhe i ndërtoi themelet e ardhmërisë evropiane të Kosovës". Daci falënderoi shefin e zyrës amerikane për ndihmën e madhe që e dha personalisht z.Goldberg, dhe ekipi mjekësor amerikan deri në çastet e fundit të jetës së Presidentit Rugova.
Kryeparlamentari tha se Ppresidenti Rugova gjatë gjithë jetës së vet ishte në shërbim të popullit të Kosovës. "Vepra dhe angazhimi tij është shtylla kryesore, bazamenti i palëkundur i Kosovës së lirë, shtet të pavarur e sovran, tha kryetari Daci. Ai tha se edhe nga tradita e pasur atdhetare presidenti Rugova, zgjodhi jetën e intelektualit, duke i arritur majet e dijes e të vështrimit kritik, duke ndjekur ato ide, që do të materializohen e do të bëhen të pandalshme në arritjen e qëllimeve e synimeve të drejta humane, që përmblidhen në liri, demokraci e barazi. Ai tha se presidenti Rugova u shkëput herët nga "jeta e intelektualit për vete", "nga rehatia e shoqërimit me libra", për t'u bërë "një tribunë i vërtetë i popullit". "Ai u bë një njeri që digjet e fiket për interesat madhore, për atë që populli i tij dhe popujt tjerë të jetojnë në paqe, në harmoni dhe të qetë, duke projektuar e ndërtuar dinjitetshëm ardhëmrinë e vet", tha Daci.
Ai tha se ishte Lidhja Demokratike e Kosovës e udhëhequr nga presidenti Rugova, lëvizja më masovike e organizuar ndonjëherë ndër shqiptarë, por e paparë edhe ndër vendet e tjera.
"Kosovarët ishin të parët në histori që i hodhën librezat e kuqe të komunizmit, duke bërë që ai brenda dy ditësh të biejë me turp në tërë Kosovën për t'u mos u kthyer më kurrë në këtë hapësira", tha Daci.
"Filozofia e urtë e origjinale e presidentit Rugova, krijoi një lëvizje, një organizim, që ishte shteti ynë demokratik në një shtet të egër e diktatorial, arriti të krijojë të gjitha strukturat e mëvetësishme, që të funksiononin në të gjitha fushat e jetës, të arsimit, të shëndetësisë, të ekonomisë e finanancave deri në organizimin e zgjedhjeve parlamentare dhe ndërtimin e institucioneve shtetërore", tha ai.
"Le të pushojë i qetë në parajsë presidenti Ibrahim Rugova”, tha kryetari Daci duke përmbyllur fjalimin e tij me lutjet karakteristike të presidentit Rugova që i bënte sa ishte gjallë, duke uruar që Zoti ta bekojë Kosovën dhe popullin e saj.
Kryeadministratori Soren Jesen Petersen, fillimisht ka ngushëlluar familjen Rugova dhe miqtë e dashur, ndërsa ka shprehur pikëllimin e madhë për mungesën e presidentit Rugova. "Natyrisht ne të gjithë ishim të vetëdijshëm për sëmundjen e presidentit Rugova, por lajmi i djeshëm ishte shokues për të gjithë ne", tha Petersen, që e kishte njohur presidentin Rugova që nga viti 1996.
"Ibrahim Rugova ishte elementi definues i politikës kosovare për aq gjatë, sa që sot është e pamundur të paramendohet Kosova dhe politika e Kosovës pa të", tha Petersen duke shprehur kështu rëndësinë e pakompensueshme të figurës së presidentit Rugova në këto çaste të historisë.
"Pikëllimin që po e ndajmë për njeriun që ka ndarë një mençuri dhe një profeci të madhe", tha ai, ndërsa shtoi, se Kosova ka humbur liderin e madh. "Le të shkojë Kosova drejt përmbushjes së vizionit të tij”, tha Petersen duke uruar që shpirti i presidentit të pushojë në paqe.
Kryeministri Bajram Kosumi, duke ngushëlluar familjen Rugova, dhe figurën e presidentit, tha se Kosova humbi njeriun e paqes dhe të pavarësisë së Kosovës. Ai tha se presidenti Rugova nisi proceset në Kosovën postkomuniste duke sfiduar politikat e shtypjes gjatë viteve të '90-ta, duke krijuar një imazh të ri të Kosovës në botë. "I ka dhënë forcë dhe e ka orientuar lëvizjen e rezitencës popullore për liri e pavarësi", tha Kosumi. Ai the se nën udhëheqjen e tij “lëvizja patriotike në Kosovë shpërtheu kufijtë kombëtarë dhe krijoi imazhin, e një lëvizje moderne dhe perëndimore”. Ai tha se filozofia politike e presidentit Rugova kulmoi me luftën e UÇK-së dhe intervenimin e NATO-s. Ai tha se ishte kjo lëvizje e krijuar nga presidenti Rugova që i vuri themelet shtetit të ri të Kosovës, që tashmë është në fazën e fundit të krijimit. Ai tha se presidenti Rugova ishte bartës i proceseve në Kosovë, ndërtues i institucioneve dhe njeri i durimit. “Ai është cilësuar njeri i pavarësisë dhe me të drejtë emri i tij është i lidhur pashkëputshëm me pavarësinë e Kosovës”, tha Kosumi. Ai tha se vizioni i tij për Kosovën e pavarur dhe sovrane është themeli mbi të cilin “po ndërtohet Kosova e ardhmërisë dhe e përparimit dhe Kosova e Evropës së Bashkuar dhe në një miqësi të përhershme me ShBA-të”. “Ne i kemi borxh njeriut të paqes e të pavarësisë për ta bërë shtetin e Kosovës, amanetin e tij të shenjtë e më të madhë. Ne i kemi mbetur borxh njeriut të Kosovës ta ndërtojmë Kosovën shtet të qytetarëve të saj. Ai ishte njeri i bashkimit e tolerancës, njeri mirëkuptimit, dhe i forcës intelektuale dhe njeri i së tashmes, e i së nesërmes”, tha Kosumi, ndërsa tha se në këto çaste kur ndihet më së shumti mungesa e tij, “neve na duhet më shumë se kurrë bashkimi ynë për rrumbullakësimin e njohjes së pavarësisë”. Me urimin edhe të kryeministrit Kosumi që shpirti i presidentit të prehet në paqe, përfundoi mbledhja e Kuvendit, që për herë të parë përcjellë me komemoracion, udhëheqësin më të lartë të shtetit.