[Pause_Print_Scroll]

Lëre të kotën dhe fillo punën!

E nderuara rini! Ja, tani arritëm aty ku ka qenë edhe qëllimi ynë esencial. Pasi që folëm mjaft për shumë gjëra të rëndësishme, ku na u bë e qartë çdo gjë që na interesonte, përse mos të fillojmë që tani, duke e ditur se çdo fillim ka vështirësi, mirëpo rezultati është paqe, lumturi e gëzim.

I Dërguari i Allahut (Paqja dhe bekimi i Allahut qofshin mbi të!) thotë: "Dy gjëra të rëndësishme njerëzit i kanë humbur dhe nuk u kushtojnë rëndësi: Shëndeti dhe koha e lirë." [Trans. Buhariu].

Përse nuk mendon se mund të jesh ti për qëllim në këtë hadith. Ti tani je në kohën e shëndetit dhe forcës, dhe ke kohë të mjaftueshme, të cilën të tjerët po e shfrytëzojnë për interesa të tyre pesonale. Përse nuk po e jep mundin tënd në atë që të afron tek Allahu dhe në atë që do të jetë e dobishme për ty në Ditën e Gjykimit?!

Abdullah ibën Mesudi (Allahu qoftë i kënaqur prej tij!) thotë: "Njeriu më i urryer tek unë është ai, të cilin e shoh gjithnjë të lirë, që nuk punon as për këtë botë, e as për jetën e amshueshme."

Ebu Abas ed Dinuri thotë: "Nuk shoh gjëra më të vlefshme në këtë botë sesa koha dhe zemra, por ti i ke humbur që të dyja!"

Ebu Zejd thotë: "Me të vërtetë, dita dhe nata janë pasuria më e madhe për një besimtar. Fitimi i tyre është Xheneti, ndërsa humbja e tyre është Xhehenemi."
"Vërtet kjo botë është rrugë për në Xhennet ose për në Zjarr."

Ibrahim ibën Shejbani thotë: "Kush kujdeset për kohën e tij dhe nuk e shfrytëzon në atë që Allahu nuk e do, Allahu do t'ia mbrojë atij fenë dhe dunjanë."

Omer ibën Dherr thotë: "Sikur të gjallët ta dinin se çka ndodh me trupat e të vdekurve në varre, do të ishin më të kujdesshëm në ditët e tyre, duke iu frikësuar ditës kur do t’u ndalen zemrat dhe shikimet."

Ibën Rexheb thotë: "Eshtë obligim për çdo besimtar që të shpejtojë në punë të mira, para se t’i shpejtohen punët atij (kur mos të ketë mundësi) dhe gjendja e tij të jetë vdekje apo sëmundje, apo se mos po e zënë disa dëshmi nga të cilat nuk pranohen veprat."


Pasthënie

Vëlla!
· Dije se jeta jote është pasuri e jotja, ndaj mos e shfrytëzo në atë që nuk ke dobi.

· Zgjedhja e shoqërisë: Mundohu që për shok të kesh atë që kur të bësh vepra të këqija, të këshillon dhe largohu nga ajo shoqëri që e humb kohën kot.

· Kujdesu për namazin, sepse ai është shkak për shpëtim, dhe mos fli në kohën e namazit të sabahut.

"O lënësi i namazit,
me të vërtetë namazi ankohet,
dhe thotë në kohën e tij,
Allahu i mallkoftë lënësit e tij!"

· Merr abdes në mënyrën më të pëlqyer, shpeshto hapat për në xhami dhe prite namazin pas namazit.

· Shpejto për në xhami sapo ta dëgjosh ezanin, sepse Allahu është më i Madh dhe më i Fuqishëm se çdo send.

· Agjëro më tepër, sepse agjërimi është ilaç për sëmundjet rinore.

· Mësohu që t'u japësh dhurata e ndihma të varfërve e jetimëve. Të japësh për ndërtimin e xhamive, rrugëve, etj. sepse ajo është shkak që të largon nga shumë fatkeqësi.

· Shpejto në kryerjen e Haxhit dhe mos vono as Umren, sepse çdo Umre është shlyerje mëkatesh mes tyre.

· Caktoji vetes tënde një orar për mësimin e Kuranit në çdo ditë dhe kujdesu për të, sepse i Dërguari i Allahut (Paqja dhe bekimi i Allahut qofshin mbi të!) thotë: "Më i miri prej jush është ai që e mëson Kuranin dhe ua mëson atë të tjerëve." [Buhariu].

· Përkujtoje sa më shumë Allahun dhe lutu ditë e natë, sepse Allahu u përgjigjet atyre që e përkujtojnë Atë dhe i përgjigjet lutjes së lutësit, nëse bëhet me sinqeritet.

· Lexo e studio historinë e të Dërguarit të Allahut (Paqja dhe bekimi i Allahut qofshin mbi të!) dhe të shokëve të tij, me shpresë se do të mvishesh me disa nga cilësitë e tyre.

· Mundohu të jesh prezentues i rregullt në ligjërata të diturisë (sidomos ligjërata rreth Fesë Islame, e sidomos sot kur ne kemi nevojë të madhe për këto mësime, që ta njohim Krijuesin tonë, Zotëruesin, Shpëtuesin, Ndihmësin, Furnizuesin dhe Shpirt-marrësin tonë). I Dërguari i Allahut (Paqja dhe bekimi i Allahut qofshin mbi të!) thotë: "Kërkimi i diturisë është obligim për çdo musliman " Sahih

· Bëhu modest, dhe mjerë mendjemëdhenjtë, sepse ata nuk do të hyjnë në Xhennet.

· Largohu nga zilia, sepse ky është shkaku që Allahu e largoi Iblisin nga Parajsa.

· Respekto prindërit dhe mos i hidhëro, sepse mosrepektuesi i prindërve nuk hyn në Xhennet.

· Vizita e të sëmurëve, bartja e të vdekurve (xhenazeve) dhe vizita e varreve[1], të bëhet shkak për shtimin e besimit dhe kujtimin e Ditës së Fundit. Pra, mos përto!

· Buzëqeshja në fytyrën e vëllait tënd është sadaka (lëmoshë); shpeshto takimet dhe përmirëso raportet me vëllezërit tu!

· Largohu nga muzika, sepse nuk bashkohen në zemrën e një individi, dashuria për muzikën dhe dashuria për Kuranin. Andaj, vepro me mençuri dhe zgjidh atë që të bën të lumtur në të dy botët (dashurinë për Kuranin).

· Mundohu të largohesh nga shikimet e ndaluara, sepse ulja e shikimit është nga adhurimet e të devotshmëve.

· Ndihmoi vëllezërit e tu kur kanë nevojë, sepse kush e ndihmon vëllanë e vet kur ai ka nevojë, Allahu do t'a ndihmojë atë kur të ketë nevojë.

Falënderimi i takon Allahut,
Zotit të botëve.


[1] Në mënyrë të lejuar, e jo siç bëjnë disa njerëz, të cilët me një vizitë varresh bëjnë kush e di sa kundravajtje që arrijnë në politeizëm, duke shkuar te varri i ndonjë personi dhe duke kërkuar nga ai ndihmë, shërim, fëmijë, pasuri ose edhe gjëra të tjera, ngase ai që i kryen këto veprime dhe mendon se i vdekuri mund t'ia plotësojë këto kërkesa, ai është larguar nga Islami dhe është bërë nga jobesimtarët, edhe pse pohon se ai është musliman. Kjo, sepse me kryerjen e këtyre veprave ai del nga Islami, nëse i është bërë e qartë se veprimi i tillë është i ndaluar dhe ai e ka kuptuar atë.