[Lona]

Mbyllet vendkalimi kufitar në kufirin bullgaro-turk shkaku i motit të ligë

Vendkalimi kufitar "Kapitan Andreevo" në kufirin bullgaro-turk sot në mëngjes tërësisht është mbyllur për komunikacion, për shkak të vërshimit në një pjesë të aksit rrugor.


Siç lajmëroi agjencia Bgnes, 150-200 metra të aksit rrugor në anën bullgare janë tërësisht nën ujë, për shkak të cilës arsye gjithë komunikacioni është orientuar drejt vendkalimit kufitar "Lesovo".

Vërshimi i një pjese të aksit rrugor drejt këtij vendkalimi rrugor ka ndodhur për shkak të daljes nga shtrati të lumit Maricë. Gjysma e banorëve të qytetit Haskovë, për shkak të vërshimit mbetën pa ujë të pijshëm, përderisa dhjetëra vendbanime në rrethinë mbetën pa rrymë.

Udhëtarët, të cilët nga Maqedonia tranzitojnë përmes Bullgarisë në rrugë drejt Turqisë, më së shpeshti e shfrytëzojnë vendkalimin kufitar "Kapitan Andreevo".
/20 Nov 2007/V.H.

Putin njofton për kundërmasat ndaj zgjerimit të NATO-s

Presidenti rus, Vladimir Putin, ka deklaruar sot se, Moska nuk do ta shikojë duarkryq sesi NATO-ja po i rrit potencialet e saja ushtarake në kufijtë e federatës ruse.



“Duke i shkelur marrëveshjet e arritura më parë, përgjatë kufirit tonë po rriten resurset ushtarake të shteteve të caktuara dhe vendeve anëtare të NATO-së, kurse propozimet ruse për, siç është rasti me krijimin e sistemit unik të mbrojtjes kundër-raketore me një qasje të barabartë në drejtimin e tyre të të gjithë pjesëmarrësve, tani për tani- për fat të keq- mbesin pa përgjigje”, ka thënë Putin, gjatë një takimi me kreun ushtarak rus.

Si një nga kundërmasat ruse ndaj NATO-së, Putin ka vënë moratoriumin për pjesëmarrjen e Rusisë në Marrëveshjen për Armatimin Konvencional në Evropë, suspendimi i së cilës nis, më 12 dhjetor, të këtij viti.

Putin ka thënë se Rusia do ta rris gjendjen e gatishmërisë luftarake të forcave të saj nukleare, “me qëllim që t’i jap përgjigje adekuate secilit agresor”.

Mbi 33 milionë persona HIV pozitivë

Më shumë se 33 milionë persona në botë janë të infektuar me virusin HIV, prej të cilëve 2.5 milionë janë fëmijë nën moshën 15-vjeçare, bëhet e ditur në raportin e fundit të Kombeve të Bashkuara.

Sipas raportit, vetëm në vitin 2007 me HIV janë infektuar 2.5 milionë persona, prej të cilëve 420.000 janë fëmijë.

Sida është arsyeja për vdekjen e 2.1 milionë personave të moshuar dhe 330.000 fëmijëve në vitin 2007, ndërsa sipas të dhënave statistikore, brenda ditës nga kjo sëmundje infektohen rreth 6.800 persona, ndërsa 5.700 vdesin prej saj.

Shumica e të infektuarve me sidë madje 22.5 milionë jetojnë në Afrikë, që është 68 për qind e popullatës së infektuar në botë, përderisa në Azi jetojnë 4.9 milionë të sëmurë. Ende nuk është gjetur ilaç kundër sidës.
/20 Nov 2007/V.H.

Rritet numri i vetëvrasjeve në Kosovë

Që nga përfundimi i luftës, numri i vetëvrasjeve, sidomos te të rinjtë është në rritje, andaj ekspertët kujtojnë se është koha që të ndërmerren masa për ta frenuar këtë dukuri.



Këto vlerësime u bënë në një konferencë ndërkombëtare për luftimin e vetëvrasjeve te të rinjtë në Kosovë.
Konferenca është organizuar nga fondacioni “Tugedher”, Qendra rajonale për mirëqenien psiko-sociale të fëmijëve nga Lubjana, me mbështetjen e Ministrisë të Punëve të Jashtme të Sllovenisë, Ambasadës Amerikane ne Lubjanë dhe Organizatës Botërore të Shëndetësisë, Zyra në Prishtinë.


/20 Nov 2007/V.H.

Varroset Imer Gavazi

Dje, në fshatin e tij të lindjes, Mirash të Ferizajt u bë varrimi i Imer Gavazit, që u vra gjatë luftimeve në Malësinë e Tetovës. I lindur në ditëlindjen e flamurit, pra 28 nëntor 1965, Imer Gavazi, është një nga pjesemarrësit e tri luftërave çlirimtare kombëtare.




Bashkëfshatarët e tij dhe bashkëluftëtarët e tij të ardhur nga të gjitha anët e trojeve shqiptare, e njihnin Imerin si një njeri të urtë, të ndershëm, të sjellshëm dhe punëtorë i çështjes kombëtare sa here që ajo kërkoj bijtë e bijat më të devotshëm të kombit shqiptar.

Për t’u përshëndetur për herë të fundit me të, kishin ardhur bashkëluftëtarët nga Lugina e Preshevës të kryesuar nga Jonuz Musliu. Gjithashtu, në këtë varrim ishin të pranishëm edhe një delegacion 6 anëtarësh i Organizatës së Veteranëve të Luftës së Ushtrisë Çlirimtare Kombëtare, si edhe shumë bashkëluftëtarë nga qytete të ndryshme shqiptare. Me kurrora lulesh, Imeri u përcoll për në përjetësi.
Familjes Gavazi, iu dorëzuan telegrame ngushëllimi me rastin e rënies së birit të tyre dhe të kombit, ushtari triemblematik, Imer Gavazi.
/20 Nov 2007/V.H.