[doni]

Përfaqësuesi i lartë i Bashkimit Evropian për Politikë të Jashtme dhe Siguri, Havier Solana u ka deklaruar gazetarëve se dialogu ndërmjet Prishtinës dhe Beogradit është esencial për Bashkimin Evropian. Ky dialog duhet të nisë në datën që është parashikuar të fillojë, do të thotë më 14 tetor, ka thënë ai.

Bashkimi Evropian as që dëshiron të dëgjojë për mospjesëmarrjen e delegacionit të Kosovës në Vjenë, siç nuk dëshiron të flitet për asnjë zhvendosje date ose për ndryshim në përbërje të delegacioneve, përveç atyre që Hari Holkeri i ka ftuar në bisedimet e 14 tetorit. Ky është qëndrim i prerë i BE-së.

"Nëse në Vjenë marrin pjesë përfaqësuesit më të lartë të BE-së, të NATO-s apo të Grupit atëherë është e natyrshme të presim që më 14 tetor në kryeqendrën austriake të paraqitet edhe niveli më i lartë institucional i Kosovës, apo më mirë të themi presim Presidentin dhe Kryeministrin", thanë zyrtarët e Bashkimit Evropian.

Ndërkaq, një zyrtarë i lartë i BE-së ka thënë se nëse në Vjenë do të jetë bashkësia ndërkombëtare e përfaqësuar në nivelin më të lartë, pra me Havier Solanën, Kristofer Paten e Lordin Robertso, Lari Rosinin e të tjerë, atëherë me siguri nuk mund të pritet që nga Kosova të vijë kryetari i komunës së Graçamnicës.

Por ata kanë shprehur bindjen se përfaqësuesit e institucioneve të Kosovës do të vijnë në Vjenë, pavarësisht nga hezitimet që po dominojnë kohëve të fundit në skenën politike kosovare. Këto burime tërheqin vërejtjen se në rast të dështimit të takimit të Vjenës Kosova do të ketë pasoja shumë serioze.