[GjIlAnAsI_cSi]

Predrag Mijatoviç, drejtori sportiv i Realit të Madridit analizoi derbin madrilenin, të së shtunës, i mbyllur në barazimin 1?1. “Në këtë ndeshje skuadra nuk ishte superiore, por në futboll jo gjithmonë fiton më i miri. Ishte një pikë shumë e rëndësishme. Tani vijnë ndeshjet e rëndësishme dhe kemi ende mundësi për të fituar diçka. Thonë që gjyqtari gaboi, por edhe ne e kemi pësuar në ndeshjet e kaluara. Vuajtëm shumë në këtë ndeshje, por përsëri jam i kënaqur me barazimin dhe me skuadrën”, tha drejtori sportiv i madrilenëve për mediat spanjolle. Për sa i përket të ardhmes së Fabio Kapelos dhe marrëdhënieve jo të mira të tij me brazilianin Emerson, Mijatoviç tha: “Kapelo po bën një punë të mirë dhe ka besimin e të gjithë lojtarëve. Nuk mund ta hedhim poshtë sepse ai është një trajner me shumë eksperiencë dhe ka arritur të fitojë shumë tituj me skuadra të ndryshme. Ka nevojë për kohë dhe të gjithë duhet të kenë durim. Një lojtar nuk mund ta ndëshkosh për shkak të disa imazheve dhe unë nuk e di se çfarë pakti kishin bërë ata të dy. Kapelo më tha se nuk ka ndodhur asgjë e rëndë dhe unë i besoj”. Për sa i përket vendit dhe postit të tij, i cili është përfolur shumë kohët e fundit, malazezi tha: “Derisa presidenti ka besim tek unë, atëherë jam shumë i qetë. Të gjithë kemi nevojë për pak kohë dhe durim”, përfundoi Predrag Mijatoviç.