[Zero Cool]

DASH: Në Kosovë s’ka shkelje të lirive fetare





Raporti më i ri i Departamentit Amerikan të Shtetit mbi lirinë e besimit thekson se autoritetet kosovare kanë respektuar në përgjithësi lirinë e besimit si përmes kodit ligjor ashtu edhe në praktikë. Në kapitullin mbi Kosovën, raporti vëren se gjendja e lirisë së besimit nuk ka shënuar ndryshime gjatë periudhës që mbulohet nga kjo analizë.
Shqetësimet kryesore të ngritura nga udhëheqësit fetarë, siç theksohet në raport, lidhen me pengesa praktike që rrjedhin nga proceset e pavolitshme për regjistrimin e vetë organizatave fetare, si dhe të pasurive të patundshme apo pronave të tjera të këtyre subjekteve.

Komuniteti protestant, potencohet më tej në raport, këmbëngul se vazhdon diskriminim institucional nga qeveria qendrore dhe autoritetet lokale. Ndër ankesat që ngre ky komunitet, është mohimi i kërkesës për të krijuar një varrezë protestante. Po ashtu protestantët njoftojnë se nuk janë lejuar të ndërtojnë një kishë në komunën e Deçanit në tokë të blerë nga ky komunitetet fetar.

Ndryshe nga raporte të mëparshme, Departamenti i Shtetit vëren në raportin e tij të publikuar të martën se nuk ka pasur njoftime për sulme kundër personelit të Kishës Ortodokse Serbe. Incidentet më shqetësuese janë regjistruar gjatë pelegrinazheve të besimtarëve ortodoksë në kisha ortodokse në Kosovë, kur autobusët me pelegrinë janë qëlluar me gurë.

Raporti i Departamentit të Shtetit nënvizon se megjithëse në mungesë të bazës ligjore, siç pohoi edhe Zyra e Ombudsmanit, Ministria e Arsimit nxori një urdhëresë administrative për të ndaluar mbajtjen e shamive të kokës, të traditës myslimane për vajza.

Raporti i Departamentit të Shtetit vëren se nuk ka pasur shkelje të lirive fetare në vend dhe se nuk ka të burgosur ose të ndaluar për arsye fetare. “Diskriminimi social apo aktet e dhunshme, duken të jenë me motive etnike, por fakti që shpesh komunitetet janë të ndarë në baza etnike aq sa edhe fetare, e bën të vështirë ndarjen e qartë të motiveve”, thuhet në raport.