Branko Cërvenkovski Pavarësia e Kosovës sjell rreziqe

[Tomori]

Pavarësia e Kosovës sjell rreziqe

Bratisllavë, 11 mars - Presidentët e Maqedonisë dhe Sllovakisë, Branko Cërvenkovski dhe Ivan Gashparoviç, janë shprehur se pavarësia e Kosovës sjell rreziqe. "Maqedonia i sheh rreziqet nga pavarësimi i Kosovës, por është e bindur se ka mjaft kapacitet demokratik për të zgjidhur problemin e pakicës shqiptare të saj", tha pas takimit Cërvenkovski, transmeton agjencia sllovake SITA. Cërvenkovski ka thënë se Maqedonia ende nuk ka qëndrim definitiv lidhur me njohjen e Kosovës dhe do të ndjekë se ç'do të ndodhë në BE rreth Kosovës, por ka shtuar se vendimi për njohjen ose jo do të merret në pajtim me interesat e Maqedonisë. Gashparoviç është dakorduar me vlerësimin për rrezikun që sjell pavarësia e Kosovës, dhe ka shtuar se Sllovakisë ndoshta do t'i duhen vite që të njohë Kosovën. Presidenti sllovak gjithashtu ka mbështetur Maqedoninë në kontestin për emrin me Greqinë, dhe u bëri thirrje dy palëve që të merren vesh. Gjatë vizitës dy ditëshe, e cila filloi dje, Presidenti i Maqedonisë do të takohet edhe me kryeministrin e Sllovakisë, Robert Fico.