PDK-ja vazhdon me akuzat mbi Adem Salihajn

[Arb]

Zëvendëskryeministri Salihaj një raport të PDK-së në adresë të tij e quan shpifje dhe gënjeshtra

Prishtinë, 8 prill - Zëvendëskryeministri Adem Salihaj në një konferencë për mediat elektronike hodhi poshtë edhe njëherë akuzat e një raportit të PDK-së në adresë të tij, të cilat i quan shpifje dhe gënjeshtra. Ai tha se do të kërkojë nga Kryesia e Kuvendit të Kosovës, që të fillojë hetimet lidhur me këtë raport.

Salihaj ka kërkuar nga PDK-ja t'i dërgojë një kopje të raporti i cili përmban akuza në adresë të tij. Ai tha se përmbajtja e këtij raporti nuk është bërë asnjëherë publike, por atë çfarë e ka parë në mediat e shkruara e quan gënjeshtër dhe shpifje të PDK-së.

Zëvendëskryeministri Salihaj shfaqi bindjen se PDK-ja shumë shpejt do të bjerë vetë në kurthin që e ka përgatitur, sepse do të detyrohet ta bëjë publik këtë raport në një formë ose në tjetër.

Sipas tij nëpërmjet këtyre akuzave po bëhet përpjekje të zhvillohet një fushatë e paskrupullt që është e drejtuar kundër tij, kundër Qeverisë dhe në mënyrë të tërthortë edhe kundër LDK-së. Ai tha se PDK-ja ka obligim para opinionit dhe para të gjitha institucioneve të tregojë se kush e ka përgatitur këtë raport që ai e çuan dosje, duke e mohuar se të dhënat mund t'i kenë dhënë qytetarët e Kosovës.

Salihaj tha se do të kërkojë zyrtarisht nga UNMIK-u një kopje të këtij raporti, ndërkaq nga Kryesia e Kuvendit të Kosovës do të kërkojë që të nisë hetimet lidhur me këtë rast.