KF BESA, Kampion i Kosoves

[Arb]

KF Besa, emblemë e futbollit të Dukagjinit

Pas një gare maratonike, një javë para përfundimit të kampionatit të futbollit, Besa e Pejës pas fitores kundër rivali të drejtpërdrejt Trepçës ’89, ndërpreu ankthin se dikush mund t’ua rrëmbej titullin, që e merituan gjatë tërë kampionatit.

As epërsia e mitrovicasve në minutat e para të ndeshjes nuk ndali turrin pejan drejt majës së futbollit kosovar dhe kalaja e Trepçës u thye me dy gola të sulmuesit më të mirë pejan Haxhi Zeka, i cili i dha Pejës dhe Dukagjinit titullin aq të pritur, kurorën e më të mirit…

Festë në stadiumin Shahin Haxhislami, festë një Pejë. Besa është më e mira. Por, është dashur të derdhet mund e djersë, për të arritur në piedestal. Janë futbollistët: Valmir Bytyçi, Ekrem Veseli, Fisnik Papuçi, Dukagjin e Fisnik Gashi, Erdogan Brando e Robert Gjeraj, Fetim Kasapi e Ilir Nallbani, Haxhi Zeka e Burim Domniku, Jeton Osmanaj e Krenar Vokshi, Hysni Muzlia e Valdet Shoshi, Erdogan Celina e shumë e shumë të tjerë, të cilët e përcollën Besën deri në fron.

Në emblemën që e përbënë futbollin pejan, nuk mund e mos të përmendim njeriun e palodhshëm, njeriun e parë të Besës, z. Agim Elshani, i cili asnjëherë nuk dyshoi në potencialin e Besës, të cilin ai e krijoi me mund të madh. Dhurata më e mirë për te është ky titull, titullin që ai dhe Besa ia sollën Pejës.

Mirëpo, Agimi nuk do të ndalet me kaq, tashmë me Besën, të mërkurën do të kërkojë edhe një kurorë, atë të Kupës së Kosovës, të cilën Besa e humbi vitin e kaluar. Dy kurora për Besën, pse jo. Besa është më e mira. Me fat Besë, ti që je emblema e futbollit dukagjinas!

Kosova Sport+