Kush mund te marre leje qendrimi ne Gjermani?

[Kalt]

Aplikuesit për të drejtë qëndrimi duhet të tregojnë se e zotërojnë gjuhën gjermane dhe se janë të integruar në shoqërinë gjermane
Në Gjermani jetojnë rreth 200.000 të ashtuquajturit "të duruar" pra refugjatë nga Afganistani, Kosova, Iraku etj, të cilët qëndrojnë në Gjermani me "Duldung" me leje qëndrimi që shtyhet herë pas here, por që nuk siguron për refugjatët asnjë lloj të drejte për qëndrim afatgjatë, madje ata as nuk lejohet të punojnë në Gjermani.
Duket se kjo situatë do të ndryshojë, sepse politikanët e koalicionit ranë dje në ujdi që familjet me fëmijë që jetojnë minimumi prej gjashtë vjetësh në Gjermani të marrin leje qëndrimi në Gjermani. Për beqarët ka një minimum qëndrimi prej tetë vjetësh.
Por kjo ujdi ka shkaktuar sot brenda unionit gjerman një debat të madh. Disa lande, të cilat qeverisen nga politikanë të Unionit nuk duan të zbatojnë rregulloren që mund të hyjë në fuqi javën e ardhshme. Uve Shynemann ministër i brendshëm (CDU) nga landi i Saksonisë së poshtme është shprehur se, ky kompromis i arritur do të thotë një fluks në sistemin social në Gjermani dhe me këtë do të rëndohen komunat gjermane.
Prej muajsh politikanët e koalicionit të madh janë duke debatuar për të ashtuquajturën të drejtë qëndrimi. Kompromisi duket se u arrit. Ky parashikon që të huajt, të cilët prej shumë vitesh kanë jetuar në Gjermani, të munden të qëndrojnë në mënyrë të përhershme në këtë vend.
Kush rri në Gjermanni duhet të punojë
Fritc Rudolf Kërper, politikan për çështjet e brendshme në Gjermani shprehet:"E reja në të drejtën e qëndrimit është se ata, të cilët prej gjashtë vjetësh jetojnë me familje në Gjermani dhe beqarët prej tetë vjetësh, do të kenë mundësi të futen në tregun gjerman të punës dhe të marrin miratimin për qëndrim në Gjermani."
Ai që do të qëndrojë për një kohë të gjatë në Gjermani, duhet që të jetë i aftë të ushqejë vetë familjen e tij. Ky është një aspekt mjaft i rëndësishëm, u shoreh politikani i CDU-s, Hans-Peter Uhl:"Të drejtë qëndrimi në asistencën sociale nuk do të ketë, këtë nuk ja bëjmë dot taksapaguseit:
Për këtë arsye aplikuesit do të marrin një leje pune. E paqartë është ende, çfarë do të ndodhë, në rast se këta persona nuk gjejnë dot punë? Duhet ndaluar një rënie e kësaj kategorie në asistencën sociale, tha Volfgang Bosbach i CDU-së:"Askush nuk duhet të spekullojë se, thjesht vetëm pse ka ardhur koha do ta marrë një të drejtë qëndrimi në Gjermani. Do të jetë një rregullore unike për raste të mbetura pezull prej vitesh."
Gjuha duhet zotëruar
Gjithashtu aplikuesit duhet të tregojnë se e zotërojnë gjuhën gjermane dhe se janë të integruar në shoqërinë gjermane. Ata nuk duhet të jenë dënuar asnjherë dhe nuk duhet të qëndrojnë nën dyshimin e terrorizmit."
Opozita e e përshëndeti këtë ujdi të koaliconit, ndërsa organizatat e refugjatëve kanë kritikuar faktin që shanset për të drejtë qëndrim kanë vetëm ata, të cilët arrijnë të sigurojnë vetë jetesën e tyre.
Propozimin e koalicionit do të duhet ta miratojë konferenca e minstrave të brendshëm që fillon punimet ditën e enjtë në Nyrenberg, ndërkohë që disa lande gjermane kanë paralajmëruar refuzimin e tyre për këtë rregullore.

M. Ditrich

DW