Zgjedhjet lokale në Kosovë

[fadil]

Vendnumërimi
Për ndryshimin e gjendjes, profilizimin e skenës politike dhe avancimin e qeverisjes është e domosdoshme që LDK-ja më në fund të dalë në opozitë.

Nga Shkelzen Maliqi më 05.10.2009 në ora 8:23

Në Kosovë kemi prej kohësh një gjendje të bllokadave politike që kushtëzojnë “strategjinë” e zhvillimeve praktikisht vendnumëruese. Koalicioni i madh PDK-LDK dhe mungesa e ndonjë opozite për të qenë dhe sadopak kërcënuese, vetëm sa e fuqizon situatën vendnumëruese dhe ndjenjën se jemi në një rrugë pa shtegdalje, në një ishull në mes të moçalit ku për të lëvizur dhe mbijetuar aplikohen vetëm ligjet e gjindshmërisë individuale ose grupore, por jo edhe ato të qeverisjes së mirë moderne.

Janë në qarkullim shumë arsyetime dhe alibi argumente për vendnumërimin, prej atyre që në plan të parë e qesin dhunimet sistematike të shoqërisë kosovare që nga viti 1981 (disa shkojnë edhe më larg në historitë e dhunave më të hershme komuniste, të mbretërisë jugosllave, të luftërave ballkanike, ose edhe robërisë së gjatë në Perandorinë Otomane), e deri te denoncuesit e karakterit të vërtetë të intervenimit dhe të kontrollit mbi Kosovën e forcave të NATO-s dhe të misioneve ndërkombëtare që, sipas tyre, vendit tonë ia “garantojnë” vetëm pavarësinë e cunguar dhe të rrejshme.

Ambicia ime ne këtë shkrim nuk është që të zbërthej këto alibitë e mëdha dhe historike. Vendnumërimit aktual dua t’i qasem në mënyrë më modeste, duke kërkuar atë fijen e lëmshit, nga shumë sosh, që hap rrugën për tejkalimin e bllokadës. Pra, duke harruar historitë dhe faktorin e huaj, e shtroj pyetjen se çka kemi në dorë dhe çka mund të bëjmë ne vetë për të tejkaluar vendnumërimin?

Mendoj se një parakusht i domosdoshëm që të çnyjetohen dhe të vihen në lëvizje shumë procese është ai i përfundimit të krizës së LDK-së, dhe kjo mund të arrihet me verdiktin e votuesve edhe në zgjedhjet që po afrohen.

LDK-ja që nga viti 1990 është pandërprerë në pushtet, kuptohet në format e ndryshme, dhe pas vdekjes së liderit historik Ibrahim Rugova filloi fragmentimi i saj. Në krizën që e kaploi LDK-ja nuk gjeti rrugën për këndellje dhe transformim nga një inercion i të qenit në pushtet pa program dhe vizione, të cilin unë e shoh si burim kryesor për vendnumërimin e përgjithshëm.

Kur e veçoj kështu krizën e LDK-së, nuk dua të them se partitë tjera kanë programe dhe vizione, sepse edhe ato në këtë janë pak a shumë simotra, dhe po kështu kontribuojnë në vendnumërimin. Te ky veçim e kam parasysh peshën bllokuese të prezencës së LDK-së në dy qeveritë e koalicionit të fundit, ku ajo ka rrezatuar edhe te partnerët në koalicion çarjet dhe bllokadat e saj të brendshme dhe pamundësinë e marrjes së vendimeve të mëdha për shkak të mungesës së një autoriteti që do ta zëvendësonte Rugovën.

Roli bllokues i LDK-së mund të krahasohet me makinën që ka katër rrota dhe dy nga to i lëvizin partnerët në koalicion, kurse dy të tjerat LDK-ja. Ndonëse në këto dy qeveri timonin e qeverisë e mbanin AAK-ja, përkatësisht PDK-ja, për vendnumërimin e përgjithshëm ndikonin para së gjithash rrotat e bllokuara të LDK-së. Ju kujtohet kur ish Kryeministri, gjenerali Agim Çeku, kërkonte ndërrimin e ministrave të korruptuar, kurse nënkryetari i qeverisë, në rolin e “Kryeministrit të LDK-së” në Qeveri, e pengoi këtë. Në situatë të ngjashme është edhe Kryeministri aktual Hashim Thaçi me ministrat e LDK-së që janë ashiqare pika të dobëta të kabinetit të tij. Thaçi tregohet i kujdesshëm për gjendjen në LDK (ose dinakërisht kalkulon me vazhdimin e dobësimit të kësaj partie) duke toleruar problemet e mëdha në disa ministri që drejtohen nga LDK-ja. (Dorën në zemër, edhe disa ministra të PDK-së bëjnë garë për kampionin e kotësisë!).

Teza ime është se për ndryshimin e gjendjes, profilizimin e skenës politike dhe avancimin e qeverisjes është e domosdoshme që LDK-ja më në fund të dalë në opozitë. Edhe një humbje ose vazhdim sinjifikativ i dobësimit të LDK-së në zgjedhje lokale të nëntorit, do të mund të paralajmëronin fundin e këtij sundimi të çalë dhe vendnumërues të LDK-së, duke krijuar hapësirën për reformimin e kësaj partie, por edhe të partive tjera, përfshirë këtu edhe PDK-në dhe AAK-në, sepse do të krijohej një situatë e paprecedentë e një mase të madhe të votuesve flotantë, të themi kushtimisht të “papërcaktuar” ose në kërkim të subjektit që meriton përkrahjen dhe votën e tyre.

Alternativa tjetër është që LDK-ja të nisë këndelljen në këto zgjedhje, duke avancuar votën, por kjo është pak e besueshme. Investimi kryesor i LDK-së në zgjedhjet lokale është në Isa Mustafën, prej të cilit pritet që të shpëtojë bastionin e fundit të madh të LDK-së, Prishtinën. Por, fitorja eventuale e Mustafës do të këndellte partinë vetëm nëse do të forcohej krahu reformist i LDK-së, ndërkaq që gjasat janë që të shtohen rebelimet, si ajo e Rexhep Osmanit. Vetëm se edhe fitorja eventuale e Mustafës do të tregohet si fitore e Pirros, nëse sërish nuk do ketë marrëveshje programore mes LDK-së dhe PDK-së për Prishtinën. Në rrethanat aktuale kjo nuk duket e mundshme. Koalicioni qeverisës aktual është koalicion i numrave, jo i ndonjë programi. Për këtë edhe ndarja aktuale e pushtetit dhe e ministrive është si një ndarje mes feudalëve.

Pra, të konkludojmë, për Prishtinën dhe Kosovën. Po fitoi Isa Mustafa, Prishtina, si edhe Kosova, do të mbeten peng të rivalitetit jo edhe aq të fshehur mes PDK dhe LDK. Mustafa as në mandatin e parë nuk e kishte përkrahjen e Qeverisë dhe Kuvendit, dhe kjo praktikë mund të kufizojë sërish zgjidhjen e problemeve të mëdha të Prishtinës. Votuesit, që e kanë në dorë çështjen, duhet ta dinë këtë.

[fadil]

Shpresa e Prishtinës
Prishtina, tash e dhjetë vjet ka shkuar vazhdimisht drejt degradimit. Përkundër disa investimeve të bëra viteve të fundit, kryeqyteti vazhdon të përballet me mungesë të ujit, kaos urbanistik dhe me trafik të tmerrshëm. A mund ta shpëtojë dikush Prishtinën?

Nga Faton Ismajli më 06.10.2009 në ora 8:33

Kryeqyteti i Kosovës për dy vite është udhëhequr nga një Kryetar, puna e të cilit ka kaluar pa kritika të mëdha dhe pa skandale, por, gjatë kësaj periudhe, Isa Mustafa nuk arriti të mbjellë shpresën se kryeqyteti mund të shpëtojë dhe të bëhet një vend ku prishtinasit mund të bëjnë jetë normale.

Isa Mustafa nuk u mbështet për muri nga Auditori dhe mediet si paraardhësi i tij nga LDK, Ismet Beqiri, por Prishtina vazhdon të përballet me problemet e vjetra siç janë ndërtimet pa leje, tollovia në komunikacion, papastërtia, mungesa e ujit, pritje të gjata në sportele, etj.

Sidoqoftë, LDK, së cilës Mustafa ia shpëtoi fytyrën në zgjedhjet e fundit, ia ka dhënë besimin edhe për një mandat të ri.

Këtë herë ai do të ketë përballë Astrit Salihun e PDK’së, doktor i filozofisë dhe këshilltar politik i Kryeministrit Hashim Thaçi. Vegim Gashin e AKR’së, inxhinier dhe biznesmen nga Prishtina. Ai mbështetet edhe nga LDD. Besnik Tahirin e AAK’së, ekspert i pushtetit lokal.

Por, a është e mundshme që sivjet Prishtina të ndryshojë pushtetin nëntëvjeçar të LDK’së?

Gazeta Express ka bërë çmos të intervistojë Isa Mustafën, por ai nuk ka pranuar.

Megjithatë, në paraqitjet publike që ka pasur, ai është shprehur i sigurt se do të fitojë edhe një mandat të ri.

Për dallim prej kandidatëve të tjerë, në zgjedhjet e fundit, Isa Mustafa pati marrë dhjetë për qind vota më shumë sesa partia e tij, LDK. Fitorja e Mustafës në Prishtinë shihet si shpëtim i LDK’së, kurse humbja eventuale si humbje edhe e LDK’së. Kjo sepse Prishtina ende konsiderohet bastion i partisë së ish-Presidentit Ibrahim Rugova.

Para dy vitesh, Kryetari aktual mundi në balotazh një nga figurat qendrore të PDK’së, Fatmir Limajn. Kjo parti tani ka vendosur të sfidojë LDK’në me një kandidat që nuk ka të kaluar ushtarake. Astrit Salihu premton përmirësimin e jetës së qytetarëve duke filluar nga lirimi i trotuareve, furnizim me ujë, ndalim të ndërtimeve ilegale, etj.

“Brenda mandatit tim do të realizohen shumë projekte të mëdha. Do të ndërtohet unaza e jashtme e qytetit, e cila do të çlirojë komunikacionin në Prishtinë”, premton ai.

Ai po ashtu premton se do të rriste buxhetin e Prishtinës.

“Do të shtyhet Ligji për kryeqytetin dhe buxheti i Prishtinës do të bëhet 100 milionë euro”, premton ai.

Kandidati i AKR’së, partisë që ka fuqi të barabartë me LDK’në në Kuvendin Komunal, premton për qytetarët e Prishtinës ujë dhe shërbime më të mira komunale, sidomos jo më telashe për dokumente.

“Do ta kisha hequr njëherë e përgjithmonë problemin e nxjerrjes së dokumenteve që është ndoshta një gjë banale. Pastaj problemet e ujit. Do ta përdor tërësisht autoritetin e kryetarit të Komunës dhe timin personal, që t’i vë gjërat në lëvizje, sepse e di se ka mundësi. Nuk është në rregull që 10 vjet pas luftës, kryeqytet i një shteti, e të mos kemi ujë”, thotë ai.

Në zgjedhjet e kaluara, kandidati i AKR’së, Ibrahim Makolli, kishte marrë 19.3 për qind të vota në kryeqytet, por nuk kishte mundur të shkojë në balotazh.

Ndërsa kandidati i partisë tjetër opozitare, AAK, Besnik Tahiri, beson se do të shkojë deri në balotazh.

“Qytetarët e Prishtinës në rast se do të më votojnë, do të fitojnë një njeri që e njeh Prishtinën mirë, i cili e ka kaluar të mirën e të keqen në këtë qytet”, shton ai.

Megjithëse kundërkandidatët e tij nuk kanë shpalosur programe dhe as oferta, ai thotë se oferta e tij dallon prej kandidatëve të tjerë.

“Oferta ime është ofertë ndryshe, është alternativë e re, që duhet ta votojë qytetari nëse do ndryshime. Vota për Besnik Tahirin do ta ndryshojë Prishtinën, vota për Isa Mustafën e mban situatën e njëjtë”, vlerëson ai.

Ai ka një vlerësim negativ për punën e Isa Mustafës.

“Ka punuar pak, ajo që unë do të bëja ndryshe, do ta rritte efikasitetin në infrastrukturë, në ofrimin e shërbimeve dhe në sektorë të tjerë”, thotë ai.

AAK në zgjedhjet e kaluara pati kandiduar me Genc Merakun, i cili pati marrë vetëm 5.5 për qind e numrit të përgjithshëm të votave të prishtinasve.

Besnik Tahiri dhe Astrit Salihu kanë nisur fushatën para afatit zyrtar, 15 tetorit. LDK dhe AKR janë ankuar disa herë për këtë.

Ish-Ministri i Arsimit, Rexhep Osmani kandidon nën flamurin e Alternativës Demokratike të Kosovë, pasi LDK nuk e përkrahi kandidaturën e tij për të udhëhequr me Prishtinën..

Ai parasheh të jetë sfiduesi më i madh i Isa Mustafës.

“Gara do të zhvillohet midis meje dhe Isës dhe me balotazh do ta mundë atë. Unë mendoj se një pjesë e elektoratit të LDK’së do të përcaktohen për mua në votën për Prishtinën, ngase na lidh një punë e përbashkët e hershme dhe e gjatë, një rrugë e mundimshme që kam kaluar me shumë aktivistë të Lidhjes Demokratike. Elektorati dhe të tjerët janë të njohur me veprimtari”, thotë ai.

Nëse nuk e fiton garën, Osmani thotë se do t’i kthehet partisë së re dhe elektoratit të vjetër.

“Nëse nuk fitoj do ta pranoj humbjen dhe do të uroj fituesin. Do të shikoj të merrem me ADK dhe elektoratin e LDK’së”, shton ai.

Ndryshe, kandidatët e tjerë në garën për kryetar të Prishtinës janë edhe Sadri Ramabaja i PSD’së dhe Selvete Krasniqi-Ismaili e PS’së.

Rezultati i Zgjedhjeve të vitit 2007

Kandidati i Lidhjes Demokratike të Kosovës kishte marrë më së shumti vota në raundin e parë të zgjedhjeve. Ai pati triumfuar në raundin e dytë, përballë Nënkryetarit të PDK’së, Fatmir Limaj.
LDK - 36.1 %
PDK - 24.8 %
AKR - 19.3 %
AAK - 5.5 %

Fuqia në Asamble Komunale

LDK - 13 deputetë
AKR - 13 deputetë
PDK - 11 deputetë
ORA - 5 deputetë
LDD - 3 deputetë

Astrit Salihu, PDK
“Do të shtyhet Ligji për kryeqytetin dhe buxheti i Prishtinës do të bëhet 100 milionë euro”

Vegim Gashi, AKR
“Do ta kisha hequr njëherë e përgjithmonë problemin e nxjerrjes së dokumenteve që është ndoshta një gjë banale”

Besnik Tahiri, AAK
“Vota për Besnik Tahirin do ta ndryshojë Prishtinën, vota për Isa Mustafën e mban situatën e njëjtë”

Rexhep Osmani, ADK
“Gara do të zhvillohet midis meje dhe Isës dhe me balotazh do të fitoj unë”.

[Kercovari]

Do te ecin mire inshalla se ka thene Presidenti mos firmosin protokole per burek..me jogurt ben..

[fadil]

Teoria e Astritit



Nga Leonard Kerquki më 07.10.2009 në ora 8:08

Prishtina është degraduar me shpejtësinë e dritës prejse Isa Mustafa mban postin e Kryetarit. Ai e prishi Ulpianën. Ai po lejon ndërtimin e objekteve pa kritere. Ai nuk ka shije. Prishtina menaxhohet nga ndërtuesit, e jo nga Mustafa. Unë do ta ndërtoj Prishtinën e Re, ashtu si edhe Unazën e Jashtme. PDK është e vetmja forcë që mund ta zhvillojë Kryeqytetin. Astrit Salihu, kandidat i PDK’së për Kryetar të Prishtinës, flet për Express.

Express: PDK nuk ka arritur të fitojë në Prishtinë, edhe pse ka garuar me një prej figurave më të rëndësishme të saj, Fatmir Limajn. Në këtë kontekst, a e keni të vështirë ju që ta projeksioni fitoren tuaj më 15 nëntor?
A. Salihu: Jo. Sepse duhet ta dini se vështirësia e parë ka qenë, ndoshta, paragjykimet e qytetarëve që kanë ekzistuar asokohe se - edhe PDK’ja është si gjithë partitë e tjera, pra që edhe premtimet e PDK’së do të jenë boshe, ashtu sikurse ato të partive të tjera. Me siguri kjo e ka determinuar edhe disponimin e qytetarëve. Por besoj se ky paragjykim tashmë është tejkaluar, sepse PDK’ja ka dëshmuar se është parti serioze, është një formacion politik, i cili aktualisht është i vetmi që mund t’i avancojë proceset dhe zhvillimin e vendit. Si e tillë, tashmë ka rejting krejt tjetër.

Express: Pra, ju po thoni se qeverisja e PDK’së për këto dy vite ka arritur ta ndërrojë përshtypjen që ka ekzistuar për të. Mos mund të jetë e kundërta, ndoshta njerëzit kanë pritur më shumë...
A. Salihu: Jo, jo. Unë nuk konsideroj se qytetarët janë të zhgënjyer me qeverinë aktuale. Ndoshta qeveria aktuale tash për tash nuk mundet t’i plotësojë të gjitha pritjet e qytetarëve, sepse herë pas here qytetarët kanë prirje të projektojnë mrekulli. Por megjithatë, PDK’ja ka dëshmuar se mund të çojë përpara shumë procese. Si e tillë, tashmë e ka rejtingun më të lartë, sipas gjitha sondazheve, analizave...

Express: Strukturat e PDK’së në Prishtinë kishin dhënë disa propozime të tjera për kandidaturën e Kryetarit të Prishtinës. Por Kryetari i PDK’së shtyu idenë që ju të jeni kandidat në kryeqytet. Çfarë po sheh te ju Kryetari Thaçi, e që nuk po e sheh te kandidaturat e tjera?
A.Salihu: Për një parti si PDK’ja është krejtësisht normale që të ketë disa propozime. Kjo është pjesë e demokracisë së brendshme të partisë. Pastaj instancat më të larta vendimmarrëse janë përcaktuar për emrin tim. Mbështetja ka qenë absolute nga të gjitha nivelet e strukturave të PDK’së.

Express: Mbështetësit tuaj këto ditë kanë përmendur faktin se ju jeni lindur në Prishtinë. A mendoni se ky është fakt i mjaftueshëm për të qenë ju ideal për drejtimin e këtij qyteti?
A. Salihu: Jo, ky është një element që presupozon lidhjen time të natyrshme me qytetin. Por nuk është elementi determinues. Dua të them se identiteti i qytetarit të Prishtinës nuk është i ngjashëm me një qytetar të Gjakovës apo të Prizrenit. Sepse Prishtina është njëlloj përzierjeje. Prishtina është kryeqendër dhe si e tillë rreth këtij qyteti gravitojnë njerëz të viseve të ndryshme. Kështu që, ata që janë të Prishtinës janë një pakicë e vogël. Por, në anën tjetër, ju e shihni se kjo përzierje ka krijuar një identitet të ri dhe ky është identiteti i Prishtinës. Do të thotë, njeriu mund të jetë i prejardhur nga Gjakova, Gjilani, por në anën tjetër mburret se është i Prishtinës.

Express: A mund të jeni ju njeri rreth të cilit mund të bashkohen këta njerëz të ndryshëm? Pra, a mund të jeni ju figura rreth të cilit këta njerëz mund të shohin shpresën e zhvillimit të qytetit ku jetojnë?
A. Salihu: Gjithë ata njerëz që jetojnë në Prishtinë, tashmë janë të bashkuar. Ata i takojnë Prishtinës dhe veten e quajnë prishtinas. Kështu që unë nuk e shoh veten në një mision madhor që mund të unifikojë ndonjë identitet që nuk ka ekzistuar. Tashmë ky identitet ekziston.

Express: Çfarë ka të përbashkët filozofia dhe menaxhimi i një qyteti të madh, siç është Prishtina?
A. Salihu: Këtu ekziston një paragjykim që thotë se filozofi jeton diku në Kullën e Fildishtë të abstraksionit, ndërkaq të gjithë njerëzit e tjerë jetojnë në tokë. Dua t’jua jap një shembull. Ju e keni rastin e një doktori të filozofisë, i cili e ka udhëhequr fushatën ajrore të NATO-s kundër Serbisë. Ai është Wesley Clark. Pra, edhe filozofët dinë të bombardojnë.

Express: Megjithatë, përvoja juaj jetësore është shumë e lidhur me filozofinë, ndërkohë që nuk keni dhënë ndonjë shembull të madh se jeni të interesuar për të folur rreth problemeve të qytetarëve...
A. Salihu: Nëse e përcillni punën time, unë pesëmbëdhjetë vjet më parë kam artikuj për Prishtinën, kam analiza për përpjekjet e regjimit serb për t’ia ndryshuar identitetin këtij qyteti... Shumë prej tyre janë të përmbledhura në librin “Postmodernja e interpretuar për shqiptarët” që ka për referencë jetën në Prishtinë dhe sistemin e vlerave që promovohen këtu. Prishtina ka qenë shqetësimi im i përhershëm.

Express: Dy javë përpara fillimit zyrtar të fushatës zgjedhore, Prishtina u mbush me fotografitë tuaja. Çfarë do të thotë kjo?
A. Salihu: Unë nuk e kam filluar fushatën. Ne nuk po bëjmë fushatë. Ajo është vetëm një informim i qytetarëve për kandidatin e PDK-së.

[fadil]

Express: A jeni kaq i panjohur, saqë duhet qysh tash të niset fushatë informuese ose që qytetarët të familjarizohen me portretin tuaj?
A. Salihu: Do të ishte mirë sikurse të familjarizohen më shumë.

Express: Kryesuesja e KQZ’së tha se ju po shkelni ligjin?
A. Salihu: Ne nuk kemi marrë asnjë vendim në letër. Por nëse diku e kemi shkelur ligjin, ne do të përmirësojmë gabimin. Ne nuk konsiderojmë se kemi bërë shkelje, sepse nuk po bëjmë fushatë. Nuk ftojmë për votim, as nuk kemi dhënë numër të partisë.

Express: Do të doja një vlerësim tuajin për posterët tuaj që janë shpërndarë. Aty ju shfaqeni me mëngë të përvjela, por me duar në xhepa. Cili është mesazhi i këtij portreti?
A. Salihu: Unë nuk kam pozuar me duar në xhepa. Unë kam qenë duke ecur dhe ajo foto është përzgjedhur. Është foto që ndërlidh në vete ngjyrat e Prishtinës. Ju e shihni se këmisha është e bardhë dhe prapavija e kaltër, që janë ngjyrat e Prishtinës. Ecja sugjeron nevojën e menjëhershme që ky qytet të ecë përpara. Ndërkaq, mëngët e përvjela janë simbolikë e gjithë atyre që përçojnë mesazhin e njerëzve që dëshirojnë të ndryshojnë diçka, që nuk janë njerëz të zyrave, nuk janë njerëz me kravata...

Express: Duart në xhepa nuk janë shenjë e punës...
A. Salihu: Kjo varet nga mënyra se si e interpretoni. Natyrisht unë nuk do të dal me drapër e çekiç në duar. Unë do të punoj me projekte dhe ide.

Express: Çfarë konkretisht ju mund të bëni në Prishtinë, e që nuk është bërë deri më tash?
A. Salihu: Unë mund të përgjigjem vetëm në pyetje konkrete.

Express: P.sh. Prishtina e Re. A do të fillojë dhe a do të realizohet brenda mandatit tuaj, nëse fitoni?
A. Salihu: Brenda mandatit tim do të realizohen shumë projekte. Prishtina e Re është njëra nga ato projekte. Prej saj varet e ardhmja e këtij qyteti. Ne kemi ide konkrete që me intervenime konkrete t’ia kthejmë frymën qytetit. Shikoni, ky qytet nuk funksion, absolutisht. Këtu nuk funksionon trafiku, ju e dini se sot qytetari i Prishtinës në një distancë që duhet të kalohet në situata normale për 5 minuta, ai aktualisht i kalon për 40 minuta. Sot qytetari nuk ka ku të ecë, nuk ka ku të lëvizë. Pra, këto janë çështje që urgjentisht duhet të zgjidhen. Prishtinën duhet ta shpëtojmë nga ngufatja.

Express: Qysh?
A. Salihu: Mua po më befason fakti se qysh dikush mund të më pyesë se si do ta bësh një parking. Ne nuk jemi përjashtim në botë që po bëjmë parkingje, por jemi përjashtim se nuk kemi parkingje. Ekzistojnë format dhe mënyrat se si të zgjidhet kjo çështje. Sikurse qeverisja aktuale të ishte e vetëdijshme dhe e përgjegjshme, asnjë prej ndërtesave që janë bërë, nuk do të lejoheshin të bëhen pa zgjidhur çështjen e parkingut.

Express: Edhe një herë, a fillon dhe a përfundon ndërtimi i Prishtinës së Re?
A. Salihu: Po.

Express: A do të realizohet në bazë të projektidesë që ka ekzistuar. Pra, që të shtrihet deri afër Liqenit të Badofcit?
A. Salihu: Konsiderojmë se duhet t’i bëjmë disa revidime, por tash nuk po shpalosem më tej. Po ashtu, ne do ta bëjmë Unazën e Jashtme, një projekt ky i garantuar.

Express: Një unazë është nisur edhe nga Isa Mustafa?
A. Salihu: Jo, cila unazë? Unë po flas për Unazën e Jashtme që nis nga Mati dhe shkon në Bërrnicë. Kjo unazë e shkarkon komunikacionin dhe i lidh të gjitha fshatrat.

Express: Pushteti aktual e ka promovuar Unazën që po ndërtohet si një projekt që zgjidh përfundimisht problemin e trafikut në Prishtinë...
A. Salihu: Ajo është unazë e brendshme që e ngarkon qytetin, nëse nuk e ka Unazën e Jashtme. Isa Mustafa nuk mund ta realizojë projektin e Unazës së Jashtme.

Express: Si do të sigurohen mjetet financiare, buxheti i Prishtinë është 50 milionë euro?
A. Salihu: Nëse unë emërohem Kryetar i Prishtinës, do të insistoj dhe do të punoj që Ligji për Prishtinën të aprovohet sa më parë. Sepse me këtë Ligj, mundësitë buxhetore do të arrijnë 100 milionë euro në vit.

Express: Sa kushton ndërtimi i Unazës?
A. Salihu: Sado që kushton, ne do ta ndërtojmë atë.

Express: A mund të na jepni një panoramë të Prishtinës të vitit 2013, nëse ju do të fitoni këtë garë?
A. Salihu: Në vitin 2013 ju garantoj se do të shkruani kartolina me fotografinë e qytetit. Me pamje shumë të bukura. Do ta rikthej traditën e mëparshme kur janë dërguar kartolina me pamje të Prishtinës.

Express: Si e parashikoni qendrën e Prishtinës. Sheshi kryesor nuk është aspak funksional...
A. Salihu: Dua t’ju them diçka për sheshin. Sikur unë të isha Kryetar i Prishtinës, ai shesh nuk do dukej aq i shëmtuar, aq pa shije. Ai shesh është fyerje për secilin qytetar. Dhe, Isa Mustafa që e ka trashëguar atë shesh, nuk ka arritur asgjë për ta ndryshuar. Për dy vjet, ai nuk ka arritur së paku ta bëjë më të bukur atë shesh. Këta janë njerëz pa shije. Kjo strukturë që e udhëheq këtë qytet, përveç shumë të metave të tjera, e meta më e madhe e tyre është se nuk kanë shije.

Express: A mund të na bëni një analizë të punës së Isa Mustafës? Ai është një kandidat serioz në këtë garë.
A. Salihu: Jo. Por unë ju sugjeroj që ta merrni fotoreporterin dhe shkrepni disa foto nëpër qytet dhe shiheni punën e tij.

Express: Ai i ka bërë disa parqe, disa rrethrrotullime, disa rrugë janë shtruar...
A. Salihu: Isa Mustafa me presidentin e shtetit dhe me muzikë kanë përuruar diçka që ka ekzistuar kur unë kam qenë katër vjeç. Pra, parku në Ulpianë. Për më tepër, në vitin 72, në atë park ka pasur edhe trëndafila dhe fontana ka funksionuar. Krahasoni fotot e mëparshme të atij parku dhe shikojeni pamjen e sotshme. Pra, këta po promovojnë diçka që ka ekzistuar dhe ka qenë më e bukur para 30 vjetësh.

Express: Megjithatë, shpesh Isa Mustafa është cilësuar si një menaxher i mirë.
A. Salihu: Prej nga doli ky vlerësim se Isa Mustafa është menaxher i mirë? M’i jep disa shembuj! Rrethi që është bërë Te Spitali është rreth që është bërë për 3 javë dhe ka kushtuar 130 mijë euro. Pse nuk e bëri këtë rreth sa e mori mandatin, por tash para zgjedhjeve? Plus në inaugurimin e rrethit, ka deklaruar se do ta bëjë këtë rreth edhe më të madh. Aty ai ka treguar se e ka bërë atë përkohësisht. Çfarë menaxhimi i qytetit është të bësh rrethe. A e dini se 16 mijë banesa janë të varura nga ashensorët? 229 ashensorë në Prishtinë nuk funksionojnë! Edhe ata që funksionojnë e rrezikojnë jetën e secilit qytetar. Isa Mustafa nuk ka qenë në gjendje për dy vjet që të iniciojë një projekt elementar për rregullimin e këtij problemi. Unë thjesht kam problem të kuptoj se si një njeri e quan vetën Kryetar të qytetit dhe nuk ballafaqohet me gjërat elementare të një qytetari. Unë këtë nuk e kam parë. Prejse është bërë Kryetar Isa Mustafa, qyteti është degraduar me shpejtësinë e dritës. Ai po thotë se i kemi ndalur ndërtimet pa leje, por ai po e degradon qytetin, sepse po i jep leje çdokujt, pa plan. Ju shikojeni Ulpianën. Ai ia ka rregulluar Ulpianës një park që tashmë e ka pasur, ndërkohë, që në anën tjetër lejon ndërtimin e një soliteri, një strukturë të shëmtuar betoni. Ulpiana ka qenë e vetmja lagje që ka pasur një plan dhe Isa Mustafa ka lejuar që edhe kjo lagje të shkatërrohet.

Express: A po e akuzoni Isa Mustafën për pafuqi apo për korrupsion?
A. Salihu: Natyrisht, për pafuqi. Isa Mustafa nuk e menaxhon qytetin. Qytetin e kontrollojnë 10-15 njerëz të një grupi joformal të interesave të ngushta.

Express: A mund ta thyeni ju këtë grup?
A. Salihu: Ne jemi fuqia e vetme që mund të bëjmë ndryshime. Prishtina përfundimisht duhet t’iu kthehet qytetarëve të saj.

[uck_aksh]

[bert]

erdhi koha e revoltave te armatosura. qeveria e kosoves nuk pranon doreheqjen dhe largimin nga politika. patriotet shqiptar bejne thirrje per ndryshim taktike. nga revolte paqesore ne revolte te armatosur. pergatitjet per kte po behen ne te gjitha zonat e kosoves.

[pirro]

Postimi origjinal është bërë nga bert

erdhi koha e revoltave te armatosura. qeveria e kosoves nuk pranon doreheqjen dhe largimin nga politika. patriotet shqiptar bejne thirrje per ndryshim taktike. nga revolte paqesore ne revolte te armatosur. pergatitjet per kte po behen ne te gjitha zonat e kosoves.

Isha kan mire qe kur te fillon revolta te fillohet nga dy fronte qe te bllokohet nehere e mire dera e qewverise .

[Guri i madh]

Postimi origjinal është bërë nga pirro

Isha kan mire qe kur te fillon revolta te fillohet nga dy fronte qe te bllokohet nehere e mire dera e qewverise .

pirro


kta hyqmeti i kosoves nese ju prishet vendi ne KOSOV kta kan tubue pare me ja therrr tjeterkah me jetue , po ti ki kujdes se kta qeveritart te harrojn nuk ju bjen ndermend se ku mbeti PIRRO , se edhe kshtu nuk shkon gjithmon me genjeshtra , po vjen koha qe qe BARKU me i REFUZUE bindjet e kokes trurit

[uck_aksh]

[bert]

falemners UCK aksh per ket kang madheshtore. Bojkoti po vjen, patriotet po flasin. falemners

[jonuzi]

Sot eshte hapur zyrtarisht fushata parazgjedhore, nje gje eshte e sigurt per 30 dite do te kete premtime e premtime. Une nuk do te pres t'i degjoj keto premtime, por ne shenje rrespekti per punen e mire qe ka bere PDK - ja per vendlindjen time, ne keto zgjedhje do te votoj per PDK - en.

[murrizi]

Postimi origjinal është bërë nga jonuzi

Sot eshte hapur zyrtarisht fushata parazgjedhore, nje gje eshte e sigurt per 30 dite do te kete premtime e premtime. Une nuk do te pres t'i degjoj keto premtime, por ne shenje rrespekti per punen e mire qe ka bere PDK - ja per vendlindjen time, ne keto zgjedhje do te votoj per PDK - en.

Njëjtë do ta bëja edhe unë sikur dikush tjetër të ofroje më tepër.

Mua nuk më intereson për Prishtinën__

Fjalë shumë fukarallëk tek unë luhatet çështja paksa mes dy partive. njëra në pushtet dhe tjetra në opozit, pa ta shofim njiher.....ça ofrojn kësaj radhe.
P.s.
Ministria e transporteve, dhe kualicioni PDK-LDK po bëjnë fushtat jo të ndershme, për të mos i thënë të ndyrë !
....sepse aty ku kanë mundësi, dhe nevoja është tepër e madhe për qytetarin, ata lënë pjes të rrugëve qëllimisht pa i rregulluar për ti pritur zgjedhjet (këtë e dijnë ata banorë që ballafaqohen me këto probleme, dhe vota e tyre do tu mungoj kësaj here).

[bert]

mos tju mbaje mendja per zgjedhje