Lajme Aktuale....

[Zero Cool]

Policia e Shtetit: Kujdes me të dhënat personale në internet








Policia e Shtetit tha të enjten, përmes një njoftimi për shtyp, se kohët e fundit janë evidentuar disa raste mashtrimesh të kryera nëpërmjet postës elektronike pre e të cilave kanë qenë qytetarë shqiptarë.


Autorët e këtyre mashtrimeve dërgojnë mesazhe elektronike ( e-mail), ku paraqiten si përfaqësues të kompanive Yahoo, Gmail, Hotmail, në të cilat njoftojnë se posta elektronike është e vjetër dhe kërkohet rinovimi i fjalëkalimit përkatës. Po ashtu autorët dërgojnë për plotësim një formular, përmes të cilit kërkojnë të dhëna për gjeneralitetet, numrin e dokumentit te identifikimit dhe fjalëkalimin aktual të postës elektronike. Duke marrë të plotësuar këtë formular këta persona bëhen në mënyrë të paligjshme posedues të postës elektronike dhe e përdorin atë për qëllime mashtrimi.

Konkretisht ata dërgojnë mesazhe mashtruese tek të njohurit e viktimës së këtij mashtrimi, të cilët janë të regjistruar si kontakte në postën elektronike, dhe u kërkojnë para për arsye nga më të ndryshmet.

Nga hetimet e kryera ka rezultuar se autorët e këtij mashtrimi janë kryesisht nga vendet e kontinentit Afrikan, Nigeria, Bregu i Fildishtë etj.

Policia e Shtetit fton qytetarët që të tregohen të kujdesshëm dhe të mos bien pre e mashtrimeve të tilla, të shmangin komunikimet në Internet me përdorues të panjohur prej tyre, të ruajnë fjalëkalimet dhe të dhënat mbrojtëse të postës elektronike apo të çdo lloj forme tjetër komunikimi duke mos i hedhur ato në çdo lloj faqe Interneti, të jenë të kujdesshëm gjatë navigimit në Internet, si dhe për çdo rast të informojnë policinë përmes numrit të telefonit 0964102688, të Sektorit Kundër Krimeve Kompjuterike në Drejtorinë e Përgjithshme të Policisë së Shtetit.

[Llapjani_HH]

Thaçi: Autostrada do të vazhdojë, pavarësisht kundërshtimeve

Kryeministri i Kosovës, Hashim Thaçi tha të enjten gjatë interpelancës të kërkuar nga Vetëvendosje, se projekti i autostradës nuk është projekt i tij personal. Ai tha se çfarëdo qeverie e i cila vjen në të ardhmen duhet të vazhdojë projektin e “autostradës së integrimit” .

Kryeministri Hashim Thaçi tha se dinamika e punimeve në autostradë tregon se në segmente te caktuara të autostradës punime do të kryhen 12 muaj para afatit.“40 kilometrat e para të autostradës Morinë- Suharekë do të përfundojnë deri në tetor apo në fillim të nëntorit. Punët do të vazhdojnë për ketë vit, Qeveria për autostradën ka paraparë rreth 250 milionë euro”ka treguar Thaçi.

Sipas tij, kundërshtimi i autostradës është “naivitet dhe padituri”, interpelanca për autostradën është kërkuar për të krijuar zhurmë e urrejtje politike e një grupi opozita.

Kryeministri ka thënë se me publikim e draft kontratës nga ana e lëvizjes Vetëvendosje është dëmtuar imazhi i Kosovës karshi investitorëve potencial. “Draft kontrata e publikuar është manipulim me opinionin publik. Duke bërë publike në mënyrë të paligjshme të kësaj kontrate i kanë shkaktuar dëme të mëdha. Veprim i pa matur dhe antiligjor do ta dëmtoj imazhin e Kosovës në raport me investitorëve potenciale”, është shprehur shefi i Qeverisë.

Sipas kryeministri aktualisht në autostradë janë duke punuar 3100 punëtorë prej tyre sipas tij, 68 për qind punëtor lokal. Kurse për krahasimin e kontratave ai tha se kantata e autostradës nuk është kontratë lokale. Procesi i ndërtimit ka qenë procesi më transparent. Është e pa logjikshme të krahasohet me kantatat lokale kjo kontratë është ndërkombëtare. Po ashtu është kantatat më e favorshëm krahasuar me të cilën do kontrata në rajon”, tha ai.

Kurse deputetët e opozitës parlamentare kanë përkrahur pjesërisht autostradën me vërejtje të caktuar, sipas tyre autostrada nuk do të nderohet deri në Merdar por vetëm deri në Prishtinë.

Blerim Shala nga AAK-ja tha se nuk ekziston autostrada Vërmicë Merdar, sepse siç tha ai
“kontrata e nënshkruar vlen për vijën Vermicë- Prishtinë.
Projekti ekziston por nuk e specifikon deri Merdarë.
Çmimi në faqen 25 të marrëveshjes së FMN-së ‘Stand By’ Autostrada Prishtinë Vermicë do të kushtoj 1.4 miliardë euro”, theksoi Shala.

Ndërkaq, Glauk Konjuvca nga Lëvizja Vetëvendosje tha se as një shqiptar që e do kombin e vetë nuk është kundër autostradës. “Nuk jemi kundër autostradës por kundër kontratës. Kryeministri nuk është aq i trashë për të dalluar autostradën dhe kontratën”, theksoi Konjuvca. Sipas tij Vetëvendosje dyshojnë se kontrata e lidhur me Bechtel & Enka e mbi ngarkon financiarisht shtetin e Kosovës dhe është e një anshme.

Ismet Beqiri nga LDK-ja tha se për qytetarët e Kosovës është nderi i veçantë që mban emrin presidentit Rugova ai tha se LDK- konsideron s ky projekt madhor është me një rendësi të veçantë. Beqiri tha se ka disa çështje të cilat kanë mbetur sekrete.

Rrëzohet mocioni i Vetëvendosjes

Ndryshe mocioni nga Vetëvendosje nuk i ka marr votat e mjaftueshme te deputetëve. Ai është rrëzuar me 35 vota kundër, 19 pro dhe 1 abstenim.

Lëvizja Vetëvendosje në mocionin e saj ka kërkuar nga Qeveria ta publikojë menjëherë gjithë dokumentacionin për autostradën, Kuvendi të angazhojë grup ekspertësh për rishikimin e kontratës me kompaninë Bechtel & Enka, të bëhen ndryshime në disa pjesë të kontratës të cilat janë të pafavorshme për buxhetin e Kosovës dhe të raportohet çdo tre muaj para Kuvendit për shpenzimet dhe pagesat që bëhen për autostradën Morinë-Merdar.
Telegrafi

Nuk diskutohet embargoja

Përfaqësuesit e vendeve anëtare të CEFTA-s janë duke mbajtur takimin parë në Prishtinë. Në këtë takim, sipas zyrtarëve të Ministrisë së Tregtisë dhe Industrisë, do të diskutohen çështje të hapura, si: liberalizimi i tregtisë mbi shërbime, pastaj zbatimi i CEFTA-s dhe çështje të tjera në kuadër të këtij mekanizmi.

Dardana Halimi, këshilltare në Ministrinë e Tregtisë dhe Industrisë, tha se takimi është i ndarë në dy pjesë - njëra në kuadër të grupit të ekspertëve të CEFTA-s, ndërsa pjesa e dytë do të jetë një prezantim nga zëvendësministrat e vendeve anëtare të CEFTA-s.

“Çështjet që do të diskutohen në këtë takim kanë të bëjnë me mbarëvajtjen e marrëveshjes së CEFTA-s, portalin e CEFTA-s, memorandumin e mirëkuptimit, zbatimin e CEFTA-s. Po ashtu do të diskutohen liberalizmi i tregtisë mbi shërbime, prezantimi i gjetjeve kryesore nga studimi i barrierave të fundit për tregtinë dhe shërbimet, një projekt i Bankës Botërore dhe shumë çështje të tjera që lidhen me mbarëvajtjen e CEFTA-s”, theksoi Halimi.

Por, bllokimi i produkteve kosovare tash e tre vjet nga Serbia dhe Bosnjë e Hercegovina nuk do të diskutohet. Dardane Halimi dha më shumë hollësi rreth kësaj:

“Në takimin e parë të CEFTA-s në Prishtinë nuk është paraparë të flitet për embargon, pasi është një çështje bilaterale në mes të shteteve, në këtë rast mes Kosovës dhe Serbisë e Bonjë e Hercegovinës. Çështjet që do të fliten në takim janë çështje multilaterale që përfshijnë të gjithë anëtarët e marrëveshjes së CEFTA-s”.

Ekspertët e ekonomisë thonë se çështja e embargos është dashur të jetë në agjendë të këtij takimi. Musa Limani u shpreh:

“Sot mbahet mbledhja e CEFTA-s me anëtarët e saj dhe në këtë takim nuk është shtruar bojkoti i mallrave të Kosovës nga ana e Serbisë dhe Bosnjë e Hercegovinës. Kjo është e palogjikshme. Kosova, jo vetëm si kryesuese, por edhe si anëtare e barabartë, duhet ta shtrojë ketë problem dhe të diskutohet, pasi paraqet një pengesë shumë të madhe”.

Për t’u zgjidhur problemet e prodhuesve kosovarë, sidomos embargoja e mallrave nga Serbia dhe Bosnja, ekspertët mendojnë se takimi është dashur të jetë në kuadër të zyrtarëve më të lartë shtetërorë të të gjitha vendeve anëtare.

Limani thekson se kjo çështje duhet të diskutohet dhe të zgjidhet.

“Kosova duhet të jetë në agjendë - nëse jo sot, duhet ta organizojë një mbledhje tjetër, ku me anëtarët e CEFTA-së do të diskutojë përse këto vende sillen në mënyrë jo të drejtë dhe të merren masa konkrete. Unë jam për atë se duhet të vlejë parimi i reciprocitetit dhëmbë për dhëmbë. Ky është mendimi im”, tha Limani.

Republika e Kosovës, këtë vit, kryeson Marrëveshjen për Tregti të Lirë me Evropën Qendrore, mekanizëm ky që në 2010-ën është udhëhequr nga Serbia.
Radio evropa e Lirë

Rrahje mes policëve në veri të Mitrovicës

Një përleshje fizike ka ndodhur mes kolegëve të Policisë së Kosovës, në stacionin në veri të Mitrovicës.

Burime të Kosovapressit kanë bërë të ditur se D. Gusniq, toger i policisë së Kosovës ka rrahur kolegun e tij M. Millunoviq, derisa ky i fundit është alivanosur.

Rrahja ka ndodhur të mërkurën mbrëma në stacionin e policisë në veri të Mitrovicës, derisa në mesin e tyre kanë hyrë policë të tjerë për t’i ndarë.

“Zëvendës-shefi i ndërrimit Millunoviq, është dërguar në spitalin në veri të Mitrovicës për kurim dhe pas ndihmës së parë ai është lëshuar në shtëpi”, kanë thënë burimet.

Sipas këtyre burimeve, rrahja në mes policëve ka ardhur për shkak të mospajtimeve në kryerjen e detyrave zyrtare të policisë, por nuk kanë specifikuar më tej shkaqet e kësaj rrahje.

Zëdhënësi i policisë së Kosovës për rajonin e Mitrovicës, Nystret Mehmeti, ka thënë për Kosovapress përmes telefonit se ka pasur një incident mes policëve në stacionin e policisë në veri të Mitrovicës.

“Një rast i një sulmi ndaj një polici është hapur dhe për këtë janë duke u zhvilluar hetimet e brendshme të policisë nga Prishtina”, ka thënë Mehmeti.
gazetaexpres

[Zero Cool]

Ndalohen arabet që vozitën makinat në Arabinë Saudite






Një aktiviste e të drejtave të njeriut në Arabinë Saudite, ka thënë se pesë gra janë arrestuar pasi e kanë sfiduar ligjin që ju lejon vetëm burrave të vozisin në mbretërinë e Arabisë.

Arrestimi shënon shtypjen e parë të fushatës nga autoritetet saudite që prej se ka nisur ajo, dy javë më parë. Mbi 10 gra që prej asaj kohe kanë vozitur nëpër Rijad dhe qytete të tjera.

Aktivistja e të drejtave të njeriut, Eman al Nafjan, i ka thënë AP-së, se nuk ka pasur informata rreth statusit të pesë grave që janë ndaluar të marten derisa kanë vozitur në Jiddah, qytetin bregdetar të Detit të Kuq.

[Zero Cool]

Dhjetë mijë myslimanë nga bullgaria u lutën për shi





Myslimanët nga Bullgaria u lutën të dielën sipas një zakoni tradicional për shi, ndërsa në lutjen kolektive të organizuar në qytetin jugor Asenovgrad të Bullgarisë morën pjesë 10.000 besimtarë.

Ata përsëritën lutjen në Chinara nëntë herë, derisa hoxhallarët lexonin Kuranin. Myslimanët e Bullgarisë këtë festë tradicionale e organizojnë çdo të diele të parë në muajin korrik dhe luten për shi pa marrë parasysh se a është stinë e thatë ose me shi.

Gjatë kësaj ceremonie organizohet edhe një drekë me kurbane, ku për përgatitjen e 50 kazanëve me ushqim u therën dhjetë lopë dhe 15 dele, ndërsa sponsorët siguruan edhe 3.000 bukë.

[Zero Cool]

Hiqet dogana për makinat





Cmimet e automjeteve në tregun e brendshëm pritet të ulen ndjeshëm, pasi qeveria ka vendosur të heqë doganën dhe taksën e shitjes brenda vendit.

Top Channel ka mësuar formulën e re të përgatitur nga Ministria e Financave që shumë shpejt do i dërgohet si draft qeverisë dhe më pas kuvendit për votim së bashku me ndryshimet në buxhet. Sipas draftit, qytetarët që importojnë një automjet nga jashtë tani nuk do të paguajnë më doganë, por ajo do të zëvendësohet nga një taksë tjetër, e cila do të paguhet cdo vit, kur bëhet kolaudimi i makinës.

Taksa e re bazohet pak a shumë tek e njëjta formulë si ajo e taksës së importit, por duke qenë se do jetë e shtrirë në vite, shuma që do paguhet për cdo vit është dhjetëra herë më e ulët nga taksa ekzistuese, e cila në disa raste ishte sa tre apo katërfishi i cmimit të vetë automjetit. Edhe taksa e re varet sërish nga numri i viteve të përdorimit të automjetit dhe cilindratat e saj.

Por ajo që ndryshon është se nëse tani qytetari që importonte një automjet e paguante menjëherë detyrimin në doganë, taksa e re e shtire atë në vite. Paralelisht me doganën dhe taksën e shitjes brenda vendit do të hiqet edhe taksa e qarkullimit dhe ajo e regjistrimit, të cilat nuk do të paguhen më cdo vit, sikurse është bërë deri më tani, por do të mblidhen në mënyrë indirekte përmes rritjes së taksave të karburanit.

Burime i thanë Top Channel, se qeveria do të rrisë me 2 lekë për litër taksat e karburanit, cka sipas tyre bën një shpërndarje më të drejtë të taksës. Pasi aktualisht taksa e qarkullimit është e njëjtë si për ata qytetarë që i përdorin shumë automjetet e tyre ashtu edhe për ata familjarë që i përdorin më pak. Me formulën e re, taksa që një qytetar do paguajë për qarkullim dhe regjistrim do të varet nga sa ai e përdor automjetin e tij sepse do jetë e inkorpurar në karburant.

[Zero Cool]

Hagë, Mlladic nxirret jashtë sallës së gjyqit





Përkundër asaj qe kishte deklaruar se do ta bojkotonte seancen e sotme në Gjykatën e Krimeve të Luftës në Hage, Ratko Mlladic eshte paraqitur ne salle.

Por ish-lideri ushtarak serbo-boshnjak eshte urdheruar te dale jashte pasi ka nderprere gjykatesin Alfons Orie ne menyre te perseritur. Ky i fundit refuzoi kerkesen e avokatit mbrojtes per shtyrjen e seances.

Mlladiç, i cili akuzohet për krime lufte në konfliktin tre vjeçar të Bosnjes që përfundoi në vitin 1995, ishte planifikuar të dilte në seancë për të deklaruar nëse i pranon ose jo akuzat. Nëse nuk paraqitej, atëhere gjykata do ta konsideronte këtë si një pohim se ai nuk i pranon akuzat.

Ratko Mlladiç është akuzuar për orkestrimin e masakrës së Srebrenicës në vitin 1995, ku u vranë 8,000 burra dhe djem myslimanë – vrasja më e rëndë masive në Europë që prej Luftës së Dytë Botërore – si të rrethimit të Sarajevës për një periudhë 44-mujore, gjatë të cilit vdiqën 10 mijë njerëz. Nëse shpallet fajtor, Mlladiçi mund të dënohet me burgim të përjetshëm. Ai u arrestua në Serbi në muajin maj, pas 16 vjetësh në arrati.

[Zero Cool]

Miratohet kontrata e blerjes së helikopterëve






Rreth 50 milionë euro do të jetë shuma që qeveria shqiptare do të paguajë për blerjen e pesë helikopterëve shumëfunksionalë, të cilët do të vihen në shërbim të forcave ajrore.


Në mbledhjen e komisionit të sigurisë, u votua në parim projektligji mbi miratimin e kontratës, ndërsa helikopterët e tipit Kugar do të shërbejnë në rritjen e efikasitetit të forcave ajrore, por edhe në shërbim të emergjencave civile.

“Në 2014-ën Shqipëria do të ketë një flotë ajrore helikopterësh pa krahë që do të përballonte një emergjencë siç ishte emergjenca e 2010-ës e janarit apo e dhjetorit në Shkodër. Pra, krejtësisht me kapacitetet tona do të kishim mundësi që të kishim kërkim-shpëtimin tonin të pajisur mirë me helikopterë. Do të kishim helikopterë transporti, të cilët, siç e dini, gjatë dy emergjencave na u gjendën në ndihmë italianët dhe grekët. Do të kishim sigurisht edhe helikopterë të vegjël të cilët edhe sot i kemi në punë dhe kanë bërë një punë të lavdërueshme në këto dy emergjenca. Pra, me këtë flotë që po krijojmë besoj se do të përballojmë emergjencat në vend”, tha ministri i Mbrojtjes, Arben Imami, raportoi AS.

Një tjetër fond do të përcaktohet për trajnimin e pilotëve. 5 helikopterët do të shërbejnë dhe në mbështetjen e misioneve të mundshme të NATO-s, pasi parashikohet edhe pajisja e tyre me municione luftarake.

[Zero Cool]

Hungaria kërkon statusin kandidat për Shqipërinë





Kryeministri hungarez, Viktor Orban, iu kërkoi vendeve anëtare të BE-së t’i japin Shqipërisë statusin e vendit kandidat.


Zoti Orban, i cili iu dërgoi një memorandum udhëheqësve të BE-së, kërkoi që ky status t’i jepet Shqipërisë deri në fund të vitit. Ai theksoi gjithashtu nevojën për një riangazhim më të fuqishëm në Ballkanin Perëndimor.

Kryeministri hungarez nënvizoi se pavarësisht nga ngërci politik dhe domosdoshmëria për rinisjen e dialogut, debatet në Shqipëri nuk e kanë rrezikuar funksionimin e demokracisë në vend.

Duke folur për Kosovën, zoti Orban bën apel në këtë memorandum për nisjen e procesit të integrimit dhe të liberalizimit të vizave. “Ne të gjithë jemi të vetëdijshëm se kjo është posaçërisht e vështirë për arsyen se jo të gjitha vendet anëtare të BE-së e kanë njohur Kosovën. Por, ne mund të bëjmë progres në fushën, siç është adoptimi i një udhërrëfyesi për liberalizimin e vizave”, theksoi ai.

Kryeministri hungarez thotë gjithashtu se dialogu ndërmjet Prishtinës dhe Beogradit mund të sjellë rezultate konkrete për qytetarët në një afat të shkurtër, por edhe të ndihmojë në realizimin e qëllimit të bashkëpunimit afatgjata.

[Zero Cool]

Gjykata: Holanda është përgjegjëse për tri vrasje në Srebrenicë






Një gjykatë e apelit në Holandë sot ka publikuar vendimin sipas të cilit Holanda është përgjegjëse për vrasjen e tre myslimanëve në Bosnjë, gjatë masakrës në Srebrenicë, në vitin 1995.


Gjykata ka gjetur se qeveria e Holandës është përgjegjëse për vrasje, sepse siç ka shpjeguar zëdhënësja e gjykatës, paqeruajtësit holandezë të vendosur atje “nuk do të duhej t’i dorëzonin ata” te forcat invaduese serbe të Bosnjës, raportojnë mediat.

Gjykata ka urdhëruar që familjeve të viktimave t’u paguhet kompensim. Srebrencia ishte “bazë e sigurt” e deklaruar nga Kombet e Bashkuara, nën mbrojtje të paqeruajtësve holandezë, kur serbët e Bosnjës e kishin invaduar qytetin dhe në mënyrë sistematike i kishin vrarë afro 8 mijë djem e burra myslimanë.

Qeveria e Holandës thotë se ushtarët e saj ishin braktisur nga OKB-ja gjatë incidentit.

Rasti në gjykatën e apelit ishte ngritur nga Hasan Nuhanovic, përkthyes, që në masakër e kishte humbur vëllanë dhe babanë, dhe farefisi i viktimës së Srebrenicës, Rizo Mustafic.

Vëzhguesit thonë se vendimi mund të ndikojë që edhe viktimat e tjera të kërkojnë kompensim nga Holanda.

[Zero Cool]

Berisha përuron bustin e ish-presidentit Bush







Kryeministri Sali Berisha, mori pjesë të mërkurën në përurimin e vendosjes së bustit të ish-Presidentit amerikan, George Bush, në Fushë Krujë.


Kryeministri Berisha, gjatë fjalës së tij tha se ngritja e këtij busti tregon dashurinë e shqiptarëve për popullin amerikan.

"Qytetarët e Fushë Krujës e pritën presidentin amerikan, George W. Bush, me ndjenjat më miqësore, si presidentin e një vendi me të cilin shqiptarët janë më të lidhur se me çdo komb tjetër. Mesazhi juaj i dashurisë për SHBA dhe popullin e madh amerikan, shpërtheu më fuqishëm se kurrë, ju përfaqësuat dinjitetin tuaj më të madh për çdo shqiptar, që ndodhet në Shqipëri dhe në botë”, tha zoti Berisha, raportoi BW.

Monumenti i ish-presidentit të SHBA, Xhorxh W. Bush, vepër e skulptorëve Qazim Kërtusha dhe Ibrahim Reçi, është vendosur në qendër të qytetit të Fushë Krujës dhe është një shenjë respekti dhe nderimi për ish-presidentin amerikan, i cili më 10 qershor të vitit 2007 vizitoi qytezën e vogël, 20 km larg Tiranës.

Monumenti i derdhur në bronx nga skulptorët durrsakë Kërtusha dhe Reçi ka një lartësi të përgjithshme prej 5 metra. Në bazamentin me pllaka shkruhet "Xhorxh W. Bush, mik i madh i shqiptarëve". Figura është e plotë dhe me qëndrim përshëndetës në këmbë. Realizimi i saj si dhe studimi i sheshit ku është vendosur monumenti, është financuar nga bashkia e qytetit të Fushë Krujës.

[Llapjani_HH]

Tërhiqet vendimi për largimin e rrethojave

Negociatat gjysmëorëshe që janë zhvilluar të enjten në oborrin e UNMIK-ut në Mitrovicë mes ushtruesit të detyrës së përfaqësuesit special të sekretarit të përgjithshëm të KB-ve, Robert Sorenson, kryetarit të Mitrovicës, Avni Kastrati, përfaqësuesve të KFOR-it dhe të policisë së Kosovës, kanë rezultuar me tërheqjen e vendimit të Komunës së Mitrovicës për largimin e rrethojave të UNMIK-ut në qendër të Mitrovicës.

Mirëpo, një burim i Kosovapress-it ka bërë të ditur se në këtë kompromis ndikim të madh ka pasur komandanti i KFOR-it në Kosovë, Erhard Buhler.

Sipas të njëjtit burim, gjenerali Buhler përmes një telefonate ka porositur një emisar të tij, i cili i ka thënë një zyrtari të Komunës së Mitrovicës, se rrethojat e UNMIK-ut kanë imunitet diplomatik dhe nuk guxojnë të preken.

“Nëse rrethojat preken pa pëlqimin e UNMIK-ut, KFOR-i është i detyruar të mbështesë UNMIK-un, sepse kjo është e përcaktuar me Rezolutën 1244 të KS të OKB-së”, ka thënë burimi.

Në anën tjetër, burimi ka shtuar se edhe kryetari i Mitrovicës, Avni Kastrati, ka zhvilluar një bisedë përmes telefonit me komandantin e KFOR-it lidhur me rrethojat e UNMIK-ut.

Lidhur me porosinë e gjeneralit Buhler përmes emisarit të tij, si dhe telefonatën e tij me kryetarin Kastrati, zyrtarët komunalë për informim të Mitrovicës, nuk e kanë mohuar, por as pohuar.
gazeta expres

[Llapjani_HH]

Bllaca denoncon ata që dëshmuan kundër Ramush Haradinajt në Hagë

Nazim Bllaca është rikthyer në cilësinë e dëshmitarit bashkëpunues në rastin kundër Fahredin Gashit e Hysri Ramës, për t'u përgjigjur në disa pyetje shtesë.

Ai ka zbuluar detaje të reja rreth veprimtarisë së tij të pasluftës.

Ashtu siç ka thënë shkurt në seancat e mëparshme, Bllaca ka lidhur Fahredin Gashin e Azem Sylën me, siç ka thënë ai, montimin e gjykimit të Ramush Haradinajt në Hagë.

Duke iu përgjigjur pyetjeve të prokurorit, Bllaca ka rrëfyer se si kishin shumëzuar një CD , përmbajtjen e së cilës e ka sqaruar para trupit gjykues. "

Ajo CD ka qenë një dëshmi që Fahredin Gashi i kishte dhënë Tribunalit të Hagës , ku të gjitha krimet ia hedh Ramush Haradinajt si para ashtu edhe pas luftës", ka thënë Bllaca, duke treguar se këto CD ja pastaj i kishte marrë Shaban Syla dhe ia kishte dërguar Azem Sylës.

"Kur u kthye, Shabani tha se e ka një mesazh nga Azem Syla, të cilin po e citoj: Farukun nuk bon me ma nguc, se më duhet në të ardhmen për zhvatje", ishte sipas Bllacës mesazhi i Azem Sylës.

Krejt këto sipas tij kanë ndodhur në maj të vitit 2009. Gjatë ditës dëshminë e tij e ka dhënë edhe Adem Salihaj. Ai ka treguar se si bashkë me Gani Gecin në shtëpinë e tij kishin xhiruar DVD në e famshme të Nazim Bllacës, të bërë publike pastaj prej dy ish deputetëve. "Kur ka zbritur në oborr timin, Bllaca më është drejtuar. Baca Adem, shumë paska ndërruar shtëpia e oborri. Kam qenë shumë herë këtu natën, kur kemi provuar të vrasim", ka rikujtuar Salihaj fjalët e Bllacës.
QIK-u

[Zero Cool]

Edhe një padi për sulm seksual





Një shkrimtare franceze ka paraqitur ankesë juridike, me të cilën pretendon se politikani Dominik Shtraus Kan kishte tentuar ta dhunonte atë tre vjet më parë.

Avokati i Tristan Banonit, Dejvid Koubi, tha se ia ka dorëzuar ankesën e klientes së tij 32-vjeçare prokurorëve në Paris, të cilët tash do të vendosin nëse ka bazë për të nisur hetimet.

Banon pretendon se Shtraus Kan ishte përpjekur ta dhunonte atë derisa ajo po e intervistonte në apartmentin e tij në Paris, në vitin 2003.

Në muajin maj, Shtraus Kan, dha dorëheqje nga posti i shefit të Fondit Monetar Ndërkombëtar për t’u marrë me akuzat për sulm seksual të kryer ndaj një shërbyeseje, në një hotel të Nju Jorkut.

Avokatët e Shtraus Kanit hedhin poshtë pretendimet e Tristan Banonit, duke i quajtur ato si ”imagjinare”, ndërkaq njoftojnë se ish-shefi i FMN-së i ka udhëzuar ata që të ngrenë padi kundër shkrimtares 32-vjeçare, Tristan Banon, për shpifje.

Avokati i Banonit, Dejvid Koubi, konfirmoi se incidenti pretendohet që ka ndodhur kur ajo kishte shkuar ta intervistonte ish-ministrin e Financave në apartamentin e tij në Paris.

”Mund të konfirmoj udhëzimet që i kam marrë nga klientja ime Tristan Banon. Ato janë jashtëzakonisht të qarta dhe kanë të bëjnë me paraqitjen e ankesës penale për tentim-dhunim kundër zotit Dominik Shtraus Kan. Faktet datojnë nga fillimi i 2003-s. Faktet kanë të bëjnë me një dhunë ekstreme. Ankesa do t’i dorëzohet prokurorit në Tribunalin e Instancës së Lartë në Paris. Ajo që mund të them është se nëse ky rast nuk përfundon në gjykatë, dhe nëse ky rast nuk dëgjohet nga një juri popullore, siç është rregulli, atëherë do ta dimë se sistemi francez i drejtësisë nuk është në rregull”, tha Koubi.

Banon pretendon se i është dashur të luftojë kundër Shtraus Kanit, kur ai kishte filluar ta zhvishte në apartamentin e tij në Paris.

Tristane Banon
”Kur e kuptova se ai vërtet dëshironte të më përdhunonte, nisa ta shqelmoj me çizmet e mia”, i ka thënë Banon, të përjavshmes franceze ”L'Express”.

”Unë isha e tmerruar”, ka thënë ajo.

Banon nuk e ka paraqitur rastin në polici në atë kohë, por ka thënë se e kishte përmendur incidentin e pretenduar gjatë një emisioni televiziv në vitin 2007.

Nëna e Banonit, En Mansuret, tha se e kishte shkurajuar të bijën nga ngritja e padisë në atë kohë. Tash, Mansuret thotë se i vjen keq për vendimin.

Akuzat për tentim-dhunim, sipas ligjit francez, mund të ngrihen edhe 10 vjet pas kohës kur pretendohet se ka ndodhur krimi.

Shtraus-Kan është liruar nga arresti shtëpiak javën e kaluar në Nju Jork- ku në një rast tjetër është përballur me akuzat për sulm seksual.

Prokurorët në Shtetet e Bashkuara, thanë të premten, se ka pasur dyshime mbi kredibilitetin e shërbyeses së hotelit, e cila pretendon se zoti Shtraus-Kan e ka sulmuar seksualisht atë në njërën nga dhomat e hotelit.

Dy ditë pas arrestit të Strauss-Kahn, Banon deklaroi se Kan ishte përpjekur që edhe atë ta sulmojë seksualisht gati një dekadë më parë.

Dobësimi i rastit të Shtraus Kanit, ka çuar në spekulime se ai mund t’i kthehet politikës në Francë.

Para arrestimit në Nju Jork, Shtraus Kan- anëtar i Partisë Socialiste të Francës- ishte konsideruar si shansi më i mirë për të fituar zgjedhjet presidenciale të vitit 2012.

Megjithatë, zëdhënësi i partisë, Benoit Hamon, tha se ideja që Shtraus Kan të garojë tash për presidencë, është skenari ”më i dobët” i mundshëm.

Po qe se Banon bën ankesën, do të nisë një hetim preliminar për të përcaktuar nëse ka dëshmi të mjaftueshme për të mbështetur akuzat kundër Shtraus -Kanit.

Mund të marrë kohë të gjatë, para se të vendoset nëse rasti duhet të shkojë para një gjykatësi.

I njëjti proces aplikohet edhe në ankesën për shpifje kundër Banonit.

[Zero Cool]

Hitleri i urryer në vendlindje





Këshilli bashkiak i Braunaut në Austri ka vendosur t’ia marrë çmimin “Qytetar Nderi” diktatorit nazist, Adolf Hitler, pasi ky shpërblim i ishte ndarë atij vite më parë.

Hitleri tani edhe zyrtarisht është një person non grata në qytetin e tij të lindjes. Këshilli i bashkisë lokale me një vendim unanim prej 78 votash ka vendosur t’ia marrë çmimin rreth 78 vjet pasi i ishte ndarë ky nder.

Hitleri ishte lindur në fshatin e vogël të Ranshofenit afër Braunaut dhe ishte bërë qytetar nderi në vitin 1933. Ky fshat ishte bërë më vonë pjesë e zonës së Branuanut dhe kështu ishte krijuar baza ligjore për pretendimin se Hitleri ishte i biri më i famshëm i Braunaut. Historianë të shumtë kanë vënë në dyshim këtë vendim pas vdekjes së liderit nazist, por këshilltarët komunalë kanë thënë se duan ta kryejnë një detyrim moral ndaj atyre që kanë vuajtur nën regjimin e dhunshëm të Hitlerit.

[Neferta]

BETLEHEM, AKTIVISTËT NDËRKOMBËTARË PROTESTOJNË MURIN IZOLUES TË IZRAELIT

Pavarësisht peripecive të shumta dhe përpjekjeve intensive të Tel-Avivit për t'i penguar, aktivistët arritën të japin përkrahjen e tyre edhe në territoret e pushtuara palestineze.






Vazhdojnë manifestimet e aktivistëve ndërkombëtarë, ndërsa Izraeli po bën përpjekje të mëdha që të pengojë mbërritjen e tyre në territoret e pushtuara palestineze.

Aktivistët e tubuar në qytetin Betlehem, protestuan kundër murit të ngritur nga Izraeli.

Këta vullnetarë u mblodhën për t'i dhënë fund barbarisë izraelite ndaj popullit palestinez.

Aktivistët kërkonin të thyenin bllokadën ndaj Gazës nëpërmjet Flotiljes së Lirisë.

Por Greqia, për shkak të presionit diplomatik të Tel-Avivit, nuk lejoi që anijet e flotiljes në fjalë të largohen nga portet e saj.

Megjithatë aktivistët u munduan të shkojnë në Izrael me anë të linjave ajrore për të treguar se janë gjithnjë në përkrahje të popullit palestinez.

Autoritetet e aeroporteve evropiane shumicën e tyre nuk e lejuan të hipin nëpër avionë.

Po ashtu bëhet e ditur se gati 120 aktivistë janë ndaluar nga forcat e sigurisë izraelite në Aeroportin Ben Gurion.

Pritet që Izraeli t'i deportojë aktivistët ndërkombëtarë.

Pas gjithë këtyre peripecive disa prej aktivistëve ia dolën të mbërrijnë në territoret e pushtuara palestineze.

Një grup prej tyre organizoi në Betlehem protestë përpara murit, që Izraeli ka ndërtuar në kundërshtim me të drejtën ndërkombëtare.

Ata qëlluan me gurë në drejtim të portës së pikës së kontrollit të Izraelit.

Aktivistët ndërkombëtarë e mbyllën protestën me mesazhe përkrahëse për popullin e Palestinës.