Ngrihen komisionet për mbikëqyrjen e gjuhës shqipe

[ARVANITI]

Ngrihen komisionet për mbikëqyrjen e gjuhës shqipe

Pas hartimit të projektligjit “Për gjuhën shqipe” dhe pas miratimit të tij në muajin shkurt nga Këshilli i Ministrave, kanë nisur të ngrihen strukturat përkatëse që do të mbikëqyrin zbatimin e ligjit të ardhshëm. Dje, në ambientet e Akademisë së Shkencave, Këshilli Akademik për mbikëqyrjen e gjuhës, në përbërje të të cilit janë gjuhëtarë nga Shqipëria, Kosova, hapësirat arbëreshe, si Jani Thomai, Emil Lafe, Seit Mancaku, Idriz Ajeti, Gjovalin Shkurtaj, Françesko Altimari, etj., ka zhvilluar një mbledhje për ngritjen e disa komisioneve që do të merren me aspekte të ndryshme të gjuhës. Kështu u diskutua ngritja e komisioneve të drejtshkrimit dhe transkriptimit nga gjuhët e huaja, komisioni për normat morfologjike, për normat sintaksore dhe pikësimin, për normat leksikore, për formimin gjuhësor në shkolla dhe përçimin tek publiku. Këto komisione do të drejtohen nga anëtarë të Këshillit Akademik, si Lafe, Thomai, Mancaku, Shkurtaj, Hysa e Çeliku. Sipas pjesëmarrësve në këtë mbledhje, çdo komision do të ketë funksionet e veta, të cilat gjithashtu do të përcaktohen nga këshilli, por një rol të rëndësishëm dhe më tepër punë duket se do të ketë komisioni i transkriptimit nga gjuhët e huaja, duke qenë se kohët e fundit është shtuar ndikimi i fjalëve të huaja në gjuhën shqipe, përdorimi i tyre edhe në ato raste kur ekziston sinonimja në gjuhën tonë. Kryesisht bëhet fjalë për shprehje dhe fjalë me prejardhje nga gjuha angleze, duke përfshirë edhe emrat, por edhe fjalë me prejardhje të tjera. Projektligji “Për gjuhën shqipe” parashikon ngritjen edhe të strukturave të tjera në rang qeverije, mundësisht në drejtimin e zv/kryeministrit. Gjithashtu janë parashikuar edhe sanksionet për shkelje të normave gjuhësore. Sipas projektligjit, të gjitha institucionet shtetërore, administratat, shkollat publike e jopublike janë të detyruara të respektojnë normat e shqipes standarde.