14/01/2012

[LOJETARI]

Kërbaçi i regjimit votëplaçkitës

Enver Robelli

I.

Një pamje nga Podujeva flet më shumë se një mijë fjalë. Kur para 22 vjetësh, në një ditë dimri, policia serbe e vrau Ylfete Humollin në Lupç të Llapit, shqiptarët e Kosovës e dinin se për ta kishte nisur një fazë e vështirë e historisë – ballafaqimi i gjithanshëm me terrorin e Beogradit. Kryesisht duarthatë, por në epërsi morale ndaj një regjimi kriminal shqiptarët e fituan njëherë lirinë, pastaj edhe pavarësinë. 22 vjet më vonë dhe sërish nga Llapi policia e Kosovës, me urdhër të Qeverisë, e cila, tekembramja, dominohet nga ata që e quajnë apo e ndiejnë veten shqiptarë, i ofroi publikut të Kosovës, me apo pa dashje, skena pothuaj të njëjta si atëbotë kur u vra Ylfete Humolli. Natyrisht, rrethanat janë krejt të ndryshme, nuk mund dhe nuk po krahasohen këtu pushtetarët e sotëm të Prishtinës me sundimtarët e atëhershëm jugosllavë dhe me puthadorët e tyre shqiptarë, nuk mund të krahasohet as policia e sotme e Republikës së Kosovës me milicët e atëhershëm. Por, megjithatë, nganjëherë një pamje flet më shumë se një mijë fjalë dhe publiku i gjerë televiziv i krahason ngjarjet me thjeshtësinë më të madhe të mundshme. Duket se qeveritarët e Kosovës, të cilët të shtunën e përcillnin me komoditet demonstrativ spektaklin brutal pranë pikave kufitare në Merdar dhe te Dheu i Bardhë, nuk kanë qenë të vetëdijshëm për peshën e pamjeve. Dhe si të jenë, kur kujtesa e tyre historike është rrudhur në tenderin e pardjeshëm dhe keqpërdorimin e djeshëm të arkës së shtetit.



II.

Mund të diskutohet nëse shefi i “Vetëvendosjes” me shokë e zgjodhi rrugën e duhur të shtunën për të protestuar në mbrojtje të një vendimi, i cili, sidoqoftë, nuk është votuar nga bashkësia lokale e Muçibabës, por nga Kuvendi i Republikës së Kosovës. A u shfrytëzuan të gjitha instrumentet e angazhimit brenda institucioneve? A u shfrytëzuan të gjitha mundësitë për denoncim publik të të gjithë atyre biznesmenëve që sjellin mallra nga Serbia në Kosovë, ku e realizojnë ekstra-profitin? A e kanë sa duhet të qartë liderët e “Vetëvendosjes” dallimin mes protestës që nuk kanos rendin publik dhe nuk shkakton dëme që në fund kompensohen nga xhepi i taksapaguesve, në emër të të cilëve kjo lëvizje thotë se po proteston, dhe monopolit që ka shteti për përdorimin e forcës legjitime? (Me forcë legjitime nuk mendoj assesi brutalitetin policor të së shtunës, por monopolin shtetëror në kuptim të asaj që kanë shkruar e shtjelluar Jean Bodin, Thomas Hobbes dhe Max Weber. Është e pabesueshme që partia e lexuesve të pasionuar, siç është “Vetëvendosja”, të mos ketë dijeni për këtë detaj politik, filozofik dhe sociologjik). A nuk do të kishte qenë më mirë sikur aktivistët e “Vetëvendosjes” të shpërndaheshin para vetëshërbimeve e dyqaneve nëpër Kosovë dhe të bënin kampanjë aktive kundër prodhimeve të padëshiruara? Lëvizja “Vetëvendosje” pretendon të jetë shumë kreative në organizimin e aksioneve politike. Kësaj radhe, për fat të keq, ajo nuk i dëshmoi këto aftësi kreative. Shumë pyetje mund t’u shtrohen drejtuesve të subjektit të tretë politik të Kosovës.



III.

Por edhe një mijë pyetje për “Vetëvendosjen” nuk e arsyetojnë brutalitetin e policisë së Kosovës, e cila të shtunën ose u urdhërua të veprojë ashtu si veproi ose nuk pati kush ta urdhëronte dhe e kaloi ditën duke u shfryrë në djem e vajza shqiptarë – kinse në përpjekje të mbrojtjes së rendit dhe ligjit. Ata policë që tundnin kërbaçin në emër të pushtetit, që gjakosnin qytetarë, që rrihnin e burgosnin deputetë të Kuvendit të Kosovës mund të pyeten – dhe kjo nuk është pyetje populliste – nëse do të vepronin me vendosmërinë e njëjtë ndaj strukturave paralele në veri ose ndaj atyre serbëve që edhe gati 13 vjet pas luftës në Kosovë qarkullojnë me vetura me tabela “UR”, “PR”, “PZ”, “DJ”, “GL” etj.?

Është e kuptueshme që njerëzit, qytetarët anekënd Kosovës të jenë të zemëruar me këtë sjellje të policisë, e cila paguhet me para të taksapaguesve. Të shtunën, reagimi i policisë ishte joprofesional, agresiv, me një fjalë: ishte keqpërdorim i ligjit nga mbrojtësit e rendit dhe ligjit. Këta janë fqinjët tanë, kushërinjtë tanë, miqtë tanë. Nuk janë armiq tanët. Edhe pse policët nuk mund t’i lajnë duart tërësisht në pafajësi, mllefi i qytetarëve të Kosovës duhet të drejtohet kundër urdhërdhënësve të këtij brutaliteti. Ata kanë emër e mbiemër dhe ushtrojnë funksione në qeverinë e Kosovës. A do të bëhej hata sikur protestuesit të rrinin dy-tri ditë afër pikave kufitare? Jo. Në Gjermani njerëzit bllokojnë me ditë të tëra hekurudhën, madje lidhen me zinxhirë për binarë për të penguar transportin e mbetjeve radioaktive. Ose ndalin trafikun për të protestuar kundër ndërtimit të ndonjë autostrade. Por policia nuk ndërhyn ashtu si kjo jona të shtunën. Çdo polici profesionale përgatit dhe zbaton planin për deeskalimin e situatës. Përdorimi i forcës është mjeti i fundit. Në policinë e Kosovës është ndryshe, sepse ajo u nënshtrohet urdhrave të një tarafi politik, i cili në kuadrin e të gjitha deformimeve që i ka bërë deri më tash ua ka kaluar të gjitha pushteteve të pasluftës, duke vendosur në disa pozita udhëheqëse agjentë të nëntokës, figura të lidhura me krimin e organizuar dhe pinjollë udbashësh.

Prandaj, ajo çfarë pa Kosova të shtunën ishte reagim i pritshëm i një regjimi, i cili nuk ka asnjë synim tjetër përveç se qëndrimin në pushtet me çdo mjet duke mos përjashtuar as dajakun për qytetarët, të cilëve gjoja u shërben. Dhuna e përdorur afër pikëkalimeve kufitare në Merdar dhe Dheu i Bardhë u ushtrua rrafsh 13 muaj pasi garnitura e tanishme sunduese erdhi në pushtet me vota të vjedhura. Një parlament me legjitimitet të cunguar zgjodhi një qeveri pothuaj pa legjitimitet demokratik. Rrjedhimisht një regjim i tillë – dhe kjo s’duhet ta befasojë askënd – për të ruajtur pushtetin sot është i gatshëm të rrahë qytetarë e nesër ndoshta edhe t’i vrasë. Tekembramja, atmosferës së dhunës dy-tri ditë para protestës i kontribuuan vetë eksponentët e regjimit, duke filluar nga kryeministri e deri te kalemxhinjtë e tij, të cilët tashmë e kanë pranuar tërësisht rolin e leckave publicistike, që zakonisht përdoren për çdo punë të fëlliqur. Por edhe për ta vlen porosia e Adem Demaçit që në vitet 90 ia kishte dhënë një figure publike: “Bacit, ti ke me u ba ikajl me e hongër krejt tirazhin e gazetës”.



IV.

Në krejt këtë rrëmujë një rol të neveritshëm luajti edhe qeveria e kryeministrit të Shqipërisë, Sali Berisha. Çdokush mund të ketë 1001 vërejtje e kritika me vend për Albin Kurtin dhe lëvizjen e tij, por të krahasosh forcën e tretë parlamentare të Kosovës me serbët që bllokojnë rrugët në veri të vendit, siç veproi Ministria e Jashtme e Shqipërisë, është nonsens. Është primitivizëm t’i krahasosh krerët e “Vetëvendosjes” me Zvonko Veselinoviqin, kryeshefin e kriminelëve serbë në veri, i cili madje ka marrë rrogë nga Postë-Telekomi i Kosovës, që kontrollohet nga Qeveria e Kosovës. Sjellja e Shqipërisë zyrtare është përzierje flagrante në punët e brendshme të një vendi sovran. Paternalizmi i Tiranës mbi Prishtinën ka arritur me këtë ndërhyrje kulmin dhe nuk duhet të durohet më.

Nuk është mirë që kryeministri Hashim Thaçi të vazhdojë të marrë yrnek në Tiranë për të qeverisur në Kosovë, sepse Shqipëria nuk është model, por është antimodel i demokracisë. Në verbërinë e tyre në favor të Berishës jo pak kosovarë nuk duan t’i shohin edhe anët e errëta të qeverisë së tanishme në Tiranë: Sali Berisha nuk do të mbahet në mend nga shqiptarët vetëm pse gjatë qeverisjes së tij shtetasve të Shqipërisë iu hoqën vizat për vendet e Schengenit. Berisha do të mbahet në mend për 26 të vdekur në Gërdec, për viktimat e 21 janarit 2010 në Tiranë, për koalicionin me Ilir M., i cili madje u incizua duke bërë pazare me pasuritë e shtetit, do të mbahet mend Berisha edhe për krijimin e një skene mediale me gazetarë oborrtarë e lecka publicistike, të cilat përdoren, njëjtë si në Kosovë, për të fshirë çdo fëlliqësi. Do të mbahet në mend Berisha edhe për shtrirjen e pushtetit familjar madje deri te vija bregdetare dhe lumenjtë e Shqipërisë. Të gjithë kosovarëve mund t’u pëlqejë ajo që po quhet rruga e kombit, por të paktë janë ata që shtrojnë pyetje rreth keqpërdorimeve të mëdha financiare që supozohet (nga drejtësia!) se janë bërë pikërisht në emër të rrugës së kombit. Gazeta e famshme franceze “Le Monde diplomatique” e pati quajtur “autostrada e korrupsionit nacional”.



V.

Sali Berisha sa herë që e ka pasur punën pisk në Tiranë është përpjekur të përdorë e keqpërdorë Kosovën për interesa të tij. Në fund të vitit 1996 dhe në fillim të vitit 1997, kur Shqipëria ndodhej para shembjes së piramidave financiare - dhe këto i kishte lejuar qeveria e atëhershme - Berisha u përpoq që krizën ta bartte në Kosovë, duke e ndërsyer, mes shumë të tjerëve, edhe folësin Reis Çiço që në TVSH-në e atëhershme të këndojë komente në stilin: “Kosovarët duhet t’i përkrahin demonstratat e opozitës serbe në Beograd... Studentët serbë do të fitojnë... Demokracia në Serbi do të fitojë”. Sipas kësaj logjike shqiptarët e Kosovës, të terrorizuar nga Serbia, duhej të dilnin në rrugë jo për të kërkuar lirinë e tyre, por për t’i ndihmuar Vuk Drashkoviqit të demokratizojë Serbinë. Që nga atëherë Reis Çiço ma kujton Hajrije Spikericën e Televizionit të Prishtinës të pushtuar nga regjimi serb. Ky rol destruktiv i atëhershëm i Berishës ndikoi në keqësimin e marrëdhënieve të tij me kryetarin e Kosovës, Ibrahim Rugova. Këta dy nuk u takuan kurrë në truallin e Kosovës. Në këtë mes dhe nga perspektiva e sotme duket vetëm qesharake ajo që Berisha kishte thënë për Ushtrinë Çlirimtare të Kosovës (UÇK) në mars të vitit 1997: i pyetur nga revista “Der Spiegel” se ç’mendonte për aksionet e UÇK-së, ai së pari kishte shprehur dyshimin e tij nëse këto “të ashtuquajtura grupe terrori” vërtet përbëheshin nga shqiptarët, pastaj kishte supozuar se prapa sulmeve të UÇK-së qëndronte vetë Arkani, shefi i bandave paramilitare serbe. Kjo i bie se Arkani paskësh qenë shef i Hashim Thaçit. Është mirë që kryeministri i tanishëm i Kosovës t’ia shpjegojë homologut të tij shqiptar si ka qenë puna, nëse takohen këto ditë për t’i dhënë këshilla njëri-tjetrit dhe për të shkëmbyer eksperiencën e begatshme për atë se si luftohen “armiqtë e brendshëm”.



VI.

Nga gjithë ajo që ndodhi të shtunën duhet të nxirren disa mësime e përfundime: së pari Qeveria e Kosovës duhet të merret vesh se ç’janë protestuesit e “Vetëvendosjes” – “faqezi” (sipas Hashim Thaçit) apo “patriotë të sinqertë” (sipas hyzmeqarit të tij të parë Hajredin Kuçi?) “Vetëvendosja” dhe sidomos Albin Kurti duhet ta pyesin veten nëse politika është vetëm art i asfaltit dhe i gurëhedhjes, i cili në fund më shumë u kushton qytetarëve se sa qeveritarëve, apo art i së mundshmes dhe i krijimit të alternativave e aleancave që i bëjnë të arritshme ndryshimet. Albin Kurti po ashtu do të ishte mirë të koncentrohej në politikën e prekshme dhe ta linte njëherë ad acta idenë e tij për bashkim kombëtar, sepse kjo s’bëhet me entuziastë që zënë vend në dy autobusë, as me monopolizim të patriotizmit dhe në kundërshtim frontal retorik me politikën ndërkombëtare. Mbi të gjitha “Vetëvendosje” dhe partitë e tjera opozitare në muajt në vijim duhet të formulojnë një plan të përbashkët për evitimin e plaçkitjes së votave në zgjedhjet e ardhshme dhe një platformë për një qeverisje të pastër. Nëse opozita nuk është e vendosur dhe e organizuar, atëherë ky regjim sërish do t’i vjedhë zgjedhjet, sepse kjo është njëra prej shkathtësive më të rrezikshme të tij. “Vetëvendosje” ka bërë njëherë gabim duke hyrë symbyllur në parlamentin që doli nga votat e vjedhura.

Rruga drejt pushtetit është e gjatë – Joschka Fischerit, aktivistit majtist dhe gurëhedhës kundër policisë gjermane, i janë dashur 20 vjet derisa arriti në kulm të pushtetit. Në këtë rrugëtim ai modifikoi e modernizoi shumë qëndrime, duke u bërë politikan i moderuar: prej urrejtësit të NATO-s u bë përkrahës i intervenimit të NATO-s në Bosnjë dhe Kosovë, prej armikut të kapitalizmit të egër u bë mbështetës i një shoqërie të majtë liberale. Në ditët në vijim Albin Kurti është mirë të lexojë disa libra të Joschka Fischerit dhe jo pak tekste mbi karrierën politike të gjelbëroshit gjerman, nëse nuk dëshiron të qëndrojë 20 vjet në opozitë.

[Alima]

...






.

[UniCorN]

BIZNESET E KRIMINELIT

BOGOLUB KARIÇ NË KOSOVË



Shkruan: Moderatori i pashtriku.org - 20. 11. 2010

__________________________________________________ _________________

LEXONI:
KARIĆ NESMETANO TRGUJE NA KOSOVU SA ALBANCIMA
Karici pa kurfare pengese ben tregti ne Kosove me shqiptare.



Bogoljub Kariç, njëri nga biznesmenët më të afërt të familljes së kryekriminelit e varrmihësit të Kosovës Sllobodan Millosheviç, edhe pas shpalljes së pavarësisë së Kosovës duket se është njëri nga bizensmenët më të fuqishëm në Kosovë. Bogoljub Kariç, biznesin dhe pasurinë e tij e ka fituar në bashkëpunim të plotë më familjen e Sllobodan Millosheviçit. Në këtë kontekst thuhet se biznesi i Bogoljubit është ndërtuar mbi një fakt shumë të rëndësishëm - ai ishte bankieri personal i Millosheviçit. Më 27 korrik 2010 gazeta Blic e Beogradit ndër të tjera shkruan: ”Mnogi spremno tvrde da je njihovo bogatstvo (Bogoljuba Kariča) zasnovano na prijateljskim odnosima sa porodicom Slobodana Miloševića. A da se Bogoljubov biznis zapravo zasnivao na jednoj činjenici - bio je lični bankar Miloševića.” ( Për më tepër lexoni: Miloševićev tajkun Bogoljub Karić kupio azil u Rusiji dhe Ovde živi Bogoljub Karić … )



* * *

“Bisnesmeni i famshëm Kariç, në Kosovë ka një zinxhir supermarketesh ETC, së bashku me biznesmenin Ramiz Kelmendi nga Peja” - kështu ka shkruar më 27 tetor 2010 gazeta serbe „Kurir“ në artikullin “Karić nesmetano trguje na Kosovu sa albancima“ - (Kariç i papenguar tregëton në Kosovë me shqiptarët). Sipas kësaj gazete, “Bogoljub Karic, mban supermarketet zinxhir ETC në të gjitha qytetet e mëdha të krahinës, së bashku me biznesmenin e njohur, Ramiz Kelmendin”. “ETC marketet, gjinden në Prishtinë, Lipjanë, Podujevë, Vushtrri, Pejë dhe në Mitrovicë.. dhe janë hapur para pesë - gjashtë vitesh... Ky nuk është i vetmi biznes i përbashkët i Kariçit me Kelmendin, ata kanë edhe aktivitete tjera“ - raporton Kurir.

„Kurir“ ka theksuar se, Bogoljub Kariç për shkak të marrëdhënieve të mira që ka me Ramiz Kelmendin dhe biznesmenin tjetër kontraverz Ekrem Lluka nga Peja, është plotësisht i mbrojtur në Kosovë. Sipas kësaj gazete Kariç akoma i ka katër shtëpi në Pejë, dhe një vilë luksoze në një kodër mbi Patriarkanën e Pejës. “Në vilë është pothuajse e pamundur për të arritur, sepse gjendet në lartësi më të madhe se 100 metra. Pronën e tij e ruajnë shqiptarët dhe janë të vetmet shtëpi serbe në Pejë, të cilat nuk janë djegur”, ka shkruar “Kurir”. Sipas këtij mediumi, njëra nga shtëpitë e biznesmenit Kariç është liruar për universitetin e qytetit të quajtur “Braça Karic” (Vëllezërit Kariç).

Biznesmeni serb, Bogoljub Karic, i kërkuar nga Interpoli që nga viti 2006, dyshohet se fshihet në Pejë. Sipas të përditshmes serbe “Blic”, Kariç është duke u fshehur në Pejë dhe po ndihmohet nga biznismenët Ekrem Lluka e Ramiz Kelmendi. ( Për më tepër lexoni: Karić putuje sa lažnim pasošem ) Edhe ministri i brendshëm në dorëheqje, Bajram Rexhepi, nuk e ka mohuar se Kariç ndodhet në Pejë. “Unë nuk e di nëse ai (Kariç) ka një biznis plotësisht të pavarur juridik këtu (në Kosovë), por në marrëdhënie me disa biznesmenë të fuqishëm nga Peja ai ka aksione në disa kompani”, citohet të ketë thënë Rexhepi për një agjensi serbe. ( Për më tepër lexoni: Redžepi: Za hapšenje Bogoljuba Karića potreban nalog Interpola )

Autoritetet serbe, sipas Balkan Insight në Beograd, kanë ngritur tri aktakuza ndaj Bogoljub Kariçit e njëra prej tyre ka të bëjë me një favor që ai ka kryer ndaj biznesmenit pejan, Ekrem Lluka. Kariç akuzohet se ia ka transferuar një pjesë të licencës së telefonisë mobile “Mobtel” Ekrem Llukës, pronar i kompanisë “Mobikos”, i cili sipas marrëveshjes ndërmjet dy palëve do të operonte në territorin e Kosovës.

Ekrem Lluka është pronar i korporatës Dukagjini, njërës prej kompanive më të mëdha të Kosovës, me mbi 300 të punësuar. Në kuadër të Korporatës janë disa kompani që kryejnë veprimtari të ndryshme, si shtypshkronja, kompania e sigurimeve, fabrika e duhanit, rrjeti tregtar, ndërtimtaria, radio e televizioni, Birraria e Pejës, Fondi Sloveno-Kosovar i Pensioneve e tjera.

Ndërsa, biznesmeni Ramiz Kelmendi, sipas një sondazhi të bërë paradokohësh, është personi i tretë më i pasur në Kosovë. Pronar i vetëm i organizatës “Elkos Grup”, e themeluar para 20 vjetëve, ka 1.200 të punësuar, qindra hektarë tokë pjellore, kullota dhe pyje në komunën e Pejës dhe në Rugovë. Posedon pastaj edhe rrjetin tregtar tashmë të njohur si ETC - bashkë me biznesmenin serb Bogoljub Kariç, rrjetin e shitjes me shumicë të mijëra artikujve, jo vetëm ushqimorë, në secilën komunë të Kosovës të populluar me më shumë banorë, si dhe hapësirën prodhuese të ish’Fabrikës së autopjesëve në Pejë, e njohur si “Zastava“ me 40 mijë metra katrorë. Multimilioneri R.Kelmendi disa herët ka pranuar publikisht që ka miqësi me kryetarin e Partisë Aleanca për Ardhmërinë e Kosovës, Ramush Haradinajn, dhe ai shpesh, është parë në fushatën elektorale të AAK’së gjatë zgjedhjeve të kaluara në Kosovë.

Ramiz Kelmendi i propozuar nga dega e AAK’së në Pejë, është kandidat për deputet në listën e Aleancës për Ardhmërinë e Kosovës - nën numrin rëndor 56.

http://pashtriku.beepworld.de/files/...t_20.11.10.htm

[UniCorN]

Importuesit kërcënojnë me rritje çmimesh
Petrit Sherifi | 14-01-2012 02:06 CET


Protesta e paralajmëruar nga Lëvizja Vetëvendosje, më 14 janar (sot) për bllokimin e dy pikave kufitare, asaj në Merdar dhe te Dheu i Bardhë, ka bërë që disa nga importuesit kryesorë të prodhimeve serbe në Kosovë, që të paralajmërojnë forma tjerë të futjes së mallrave në Kosovë. Ata kanë thënë se kësaj bllokade do t’ia shohin sherrin konsumatorët, duke thënë se si pasojë do të ketë ngritje të çmimeve.

Ramiz Kelmendi, pronar i zinxhirit të ETC-ve, i cili është edhe nga importuesit më të mëdhenj nga Serbia, ka thënë se kjo bllokadë që do të bëhet për dy pikat kufitare, atë në Merdar dhe të Dheu i Bardhë, ka pak të bëjë me bllokimin e produkteve serbe.

Ai ka thënë se përmes këtyre dy pikave kalon rreth 85 për qind e importit që vjen drejt Kosovës. “Rreth 85 për qind e importeve që bën Kosova, kalojnë përmes këtyre dy pikave, e jo vetëm produktet serbe, ndërkaq Vetëvendosje ka thënë se asgjë nuk do të hyjë nga këto dy pika, prandaj dëmi do të jetë shumë i madh”, ka thënë Kelmendi.

Ai ka shtuar se nuk do të ketë dëme të mëdha për bizneset që bëjnë import nga Serbia. “Ne nuk do të dëmtohemi shumë, ngase atë do ta paguajnë qytetarët. Nëse protesta zgjat pak, nuk do të ketë problem, mirëpo nëse zgjat bllokada, atëherë ne duhet të bëjmë importin përmes vendeve tjera, ku do të rriten shpenzimet dhe normalisht që ne bëjmë ngritjen e çmimeve dhe atë do ta paguajnë qytetarët”, ka pohuar ai.

Të kundërtën, e mendon drejtori ekzekutiv në kompaninë “M&Sillosi”, i cili ka thënë se duhet të bllokohen produktet serbe. Ai ka thënë se përderisa kamionët me produkte kosovare dhe me targa të vendit nuk mund të kalojnë në Serbi, atëherë duhet t’i kthehet në të njëjtën mënyrë.

“Kjo bllokadë është dashur të ndodhë edhe më parë. Fjalën e kam vetëm për produktet serbe”, ka thënë Shehu, duke shtuar se ato mallra po hyjnë në vend pa kurrfarë kontrolli dhe janë shkatërrimi i ekonomisë së vendit.

“Nuk ka lidhje kush e organizon këtë protestë dhe këtë bllokadë, e rëndësishme është që produktet serbe të mos kalojnë në Kosovë, ngase po shkatërrojnë ekonominë e vendit”, ka thënë Shehu.

Agim Shahin, kreu i Aleancës Kosovare të Biznesit (AKB) ka thënë se protesta e paralajmëruar nga Lëvizja Vetëvendosje do të shkojë në dëm të kompanive tregtare dhe të importit, e po ashtu do të dërgojë edhe një mesazh të keq për investimet e huaja direkte.

Ai ka thënë se kjo do të tregojë se në këtë vend nuk ka rend dhe ligj, por ka organizime të partive politike që del të jenë mbi ligjin. Sipas tij, bizneset kishte me qenë mirë të gjejnë rrugë alternative përmes vendeve të treta gjatë bllokimit të pikave kufitare.

“E kam fjalën që bizneset të shfrytëzojnë transportin përmes Shqipërisë, Maqedonisë e Malit të Zi, që të mos provokojnë protestuesit”, ka thënë ai, duke shtuar se ose duhet t’i pezullojnë importet nga Serbia të shtunën (sot).

Ai ka thënë se dëmet do të jenë shumë të mëdha për bizneset e po ashtu edhe për shtetin. “Përafërsisht 700-800 mijë euro është importi ditor nga Serbia, dhe nëse e shohim humbjen që do t’i shkaktohet shtetit nga vjelja e TVSH-së, dëmi do të jetë rreth 100 mijë euro në ditë”, ka thënë ai.

Kurse, për bizneset, Shahini ka thënë se dëmi do të jetë shumë më i madh. “Nëse bizneset përdorin rrugë tjera alternative, atëherë do të shtohen shpenzimet dhe dëmet për bizneset do të shumëfishohen”, ka thënë ai.

Sipas Shahinit, kështu nuk ka zgjidhje, as përmes protestës e as përmes politikëbërjes, ngase siç ka thënë ai, këtë e determinojnë konsumatorët. “Konsumatorët vendosin për import duke bërë përzgjedhjen e produkteve, prandaj as protesta e as politikëbërja nuk vendos, por konsumatorët”, është shprehur ai.

http://www.zeri.info/artikulli/2/8/4...ritje-cmimesh/

[Neferta]

Si e perjetuan kuqezinjet. 14 janarin

Djemtë nga Tirana nuk ishin shoqëruar në qeli nga Policia e Kosovës por kishin zhvilluar biseda pas një godine ku lotët nga të dyja palët nuk kishin munguar
Aktivistët ishin rrahur barbarisht përse qëndruan ulur sikurse bënë serbët në Bërnjak dhe Jarinjë për javë të tëra dhe nuk u hyri gjemb në këmbë
Udhëtimi
I ftohti dhe shiu që mbuloi Tiranën në mëngjesin e 14 janarit nuk i ndali 80 aktivistët nga Shqipëria të cilët përmes dy autobusëve shoqëruan gjithë rrugën me këngë patriotike drejt Merdarës dhe Dheut të Bardhë. Të rinjtë të veshur kuqezi e shoqëruan gjithë rrugën drejt pikës kufitare të Morinës me këngë patriotike ndërkohë që entuziazmi se mbërritja pranë aktivistëve të “Vetëvendosjes” nuk fshihej dhe nga parullat anti-serbe që hera-herës ishin të ekzagjeruara dhe shoqëroheshin me tone të ashpra. I habitshëm dukej fakti se përveç këngës “Xhamadani vija-vija”, udhëtarët e dy autobusëve mosha mesatare e të cilëve nuk i kalonte të 23 vjetët ishin të informuar dhe mbi këngët folklorike si “Thrret Prizreni mori Shkodër” e shumë të tjera. Mirëpo i gjithë ku hov dhe adrenalinë të cilën nuk e mposhti as i ftohti me temperaturat nën zero gjatë një ndalese pushimi në atë që quhet “Rruga e Kombit” do të ndërpritej në pikën kufitare të Morinës. Për hir të së vërtetës, gjithë rrugës ekzistonte frika e kthimit mbrapsht nga pala e policisë së Shqipërisë. Një zot e di se për çfarë arsye por kjo erdhi nga deklaratat e Ministrisë së Jashtme të Tiranës se “Vetëvendosja” po imitonte ekstremistët serbë dhe nga përkrahja që kryeministri Berisha i kish dhënë në vazhdimësi deklaratave të Hashim Thaçit. E megjithatë, mbërritja në Morinë kaloi në qetësi. Policia e Shqipërisë i kaloi dy autobusët në heshtje ndërkohë që tentoi të pengonte mediet e shumta të pranishme për të filmuar rrugëtimin e aktivistëve nga Tirana. E ndërsa autobusët me targa të Tiranës dhe të mbuluar me flamurin kuqezi në pjesën e parme të tyre, hynë në pikën e kontrollit të palës kosovare, një vonesë e cila i kaloi dy orë u bë e padurueshme. Shkaqet e vonesës nuk bëheshin të ditura por aktivistëve nuk iu lejua të zbrisnin nga autobusët e ndërsa ky është një veprim taktik i Policisë së Kosovës. Siç u mor vesh më pas, ishin lajmëruar përforcime nga Prizreni pasi pika kufitare nuk kishte më shumë se 10 policë. Aktivistët e zemëruar pasi hapën derën e autobusit me forcë, zbritën në tokë ndërsa policia e Kosovës përdori spraj me spec djegës për ndaj syve të tyre si dhe dhunë fizike. Dy aktivistë u shoqëruan dhe u mbajtën për rreth gjysmë ore ndërsa gjithë pjesa tjetër e vullnetarëve nisi protestën në kufirin e Kosovës. Në tentativat për të negociuar me policinë, u ra dakord që kufirin të kalohej në këmbë ndërkohë që atyre iu kujtua se Shqipëria nuk ja mbylli derën Kosovës më 1999. Siç treguan aktivistët e ndaluar në kufi, policët që i shoqëruan pasi u kishin kërkuar falje u ishin shpjeguar se urdhri vinte nga Prishtina zyrtare dhe se ata ndjeheshin në siklet. Në fakt, djemtë nuk ishin shoqëruar në qeli por pas një zyre dhe duke folur për bllokimin ishin prekur të dyja palët dhe biseda ishin shoqëruar me rrënqethje dhe me lot. Pas negociatave u ra dakord që aktivistët të iknin në këmbë në autostradën “Ibrahim Rugova” pasi autobusët nga Tirana, sipas policisë, kishin probleme në dokumentacion. Në pritje të një autobusi nga Prishtina, të rinjtë udhëtuan rreth 1 orë në këmbë ndërsa në informacioni se ç’po ndodhte në Merdarë dhe në Dheun e Bardhë mungonte.
Mbërritja në Prishtinë
Pas një pritje disi të gjatë në një lokal buzë autostradës, një autobus mbërriti për të marrë aktivistët ndërsa ishte rënë dakord që fillimisht ata të mbërrinin në selinë e “Vetëvendosjes” në Prishtinë e më pas të shpërndaheshin në pikat kufitare ku po zhvillohej protesta për të mbështetur lëvizjen. Autobusi u ndal 100 metra larg selisë së “Vetëvendosjes” ndërsa edhe pse pas 8 orëve rrugë me peripeci, të gjithë gjetën forcat për të rinisur këngët patriotike deri në dyert e lëvizjes. Marshimi ato 100 metra habiti çdo kalimtar të cilët pyesnin se nga vinim. Përshëndetjet e makinave të Prishtinës nuk mungonin përmes borive ndërsa hyrja në ambientet e Lëvizjes u përshëndet nga Xhelal Sveçla i Vetëvendosjes i cili pasi raportoi situatën ku dhjetëra ishin arrestuar mes të cilëve edhe 6 deputetë, bëri thirrje për të pritur derisa të vendoset nëse protesta do mbaronin atë natë apo të ardhurve nga Tirana do u duhej të udhëtonin drejt pikave kufitare. Ndërkohë, Dardan Molliqaj kish deklaruar para policisë së Kosovës gjatë tubimit në kufi se “Kosova ja mbylli me dhunë derën Shqipërisë dhe ja hapi po me dhunë Serbisë”. Në fakt, entuziazmi mbaroi kur u raportua se bllokimi do merrte fund atë natë për shkak të temperaturave dhe arrestimeve të shumta.
Mikpritja e “Vetëvendosjes”
Kushdo kish dëgjuar për mikpritjen shqiptare por shumë besojnë se ajo është një traditë që i përket së shkuarës. E në fakt të rinjtë e Vetëvendosjes vërtetuan se mikpritja ekziston. Pas disa orë bisedimeve ku dhe u prezantuan në një kafene modeste të lëvizjes, aktivistët nga Tirana u ndanë në shtëpitë e atyre nga Prishtina për të fjetur. Ai 24 orësh në Prishtinë ngjante sikur të ishin 3 ditë. Të nesërmen në mëngjes lajmi se disa prej aktivistëve ishin liruar nga stacionet e policisë i gëzoi të gjithë dhe u përshëndet me duartrokitje dhe me këngë po në kafenenë e vogël ku ishin një natë më parë. Pas një mbledhje kryesie të Lëvizjes, aktivistët u përshëndetën në një takim dhe nga Albin Kurti. Mërzia nga një udhëtim që dukej se shkoi dëm dukej hapur në sytë e të gjithëve por në fakt u mësua shumë teksa shihje të rinj të Kosovës që hynin të shoqëruar nga të tjerë me grafitë e këmbëve të thyera nga rrahjet në Merdarë apo të tjerë me rroba me baltë dhe me sy të ënjtur nga lotsjellësit. Ata ishin rrahur barbarisht përse qëndruan ulur në Merdarë dhe në Dheun e Bardhë sikurse qëndruan serbët e veriut në Bërnjak dhe Jarinjë për javë të tëra dhe nuk u hyri gjemb në këmbë.
nga shekulli.

[Naki]

Fait accompli


Muharrem Nitaj
Ngjarjet e së shtunës, në dy pikat e kontrolluara doganore të Kosovës me Serbinë, kanë qenë ngjarjet më të pazakonshme në bile dhjetë vjetët e fundit, dhe cilado që të jetë analiza për to, ajo mund të shkaktojë reagimin zinxhir të njërës ose palës tjetër. Por, është vetëvrasje politike e profesionale të mos flasësh e të mos shkruash për to.
Gjykimi për këto ngjarje rrezikon të mos kuptohet drejt, sepse ato tashmë më tepër sesa ngjarje politike, janë shndërruar në luftë emocionale dhe në betejë për votë. Prandaj edhe heshtja e medies në Prishtinë, pas protestave të së shtunës dhe debatet e munguara, kanë qenë më shumë sesa vetëvrasje profesionale, sepse opinioni këtë herë më shumë se asnjëherë më parë ndoshta ka pasur nevojë të dijë se cilat ishin të drejtat e Vetëvendosjes e cilat të Qeverisë.
Protestat e Vetëvendosjes, megjithëse të paralajmëruara si paqësore, brenda vetes përmbanin një kundërthënie të fuqishme, sepse ishte e pamundur të kuptoheshin si të tilla, për shkak se qëllimi kryesor i tyre ishte të ishte bllokimi i kufijve shtetërorë, ose Serbia s’do të kalojë (no passaran) që për logjikën e shteteve normale mund të jetë edhe përpjekje për grusht shtet.
Qeveria e Kosovës edhe mund të ketë bërë shumë gabime në të gjitha marrëveshjet me Serbinë, të shkruara ose me fjalë, por që nga momenti që bisedimet me Serbinë e kanë marr trajtën e marrëveshjes, ato do të duhej të ishin të zbatueshme, bile për klasën politike. Mbreti i shqiptarëve në kohën e mbretërisë së tij, kishte guxuar që t'ia falte kralit të Serbisë, njërën prej perlave shqiptare, Shën Naumin, por patriotët e përgjegjshëm shqiptarë, kurrë më vonë nuk thanë se Shën Naumi ishte shqiptar, sepse në një moment Mbretit Zog mund t’i ishte bërë mendja zog.
Por, cilat mund të jenë efektet ose mesazhet e ngjarjeve të së shtunës.
E para, protestat e krahut radikal të një force politike, janë një dëshmi e fortë, se qeveria e vendit nuk e ka komoditetin të bëjë çfarë të dojë, sepse ka një moment kur disa qindra ose mijëra njerëz mund të përballen me aparatin e dhunshëm të saj, dhe pasojat mund të jenë të paparashikueshme.
E dyta, Kosova edhe si një shtet i vogël e me demokraci të brishtë, rezulton t'i ketë kapacitetet dhe fuqitë që ta mbrojë rendin e ligjin e të përballet me ata që e shkelin ato, pavarësisht arsyeve që kanë. Për më tepër, kjo do të duhej të ishte dhe një mesazh për partnerët ndërkombëtarë, që më në fund të kërkojnë që të njëjtën gjë ta bëjë edhe Serbia dhe të mos luajë as me durimin e shqiptarëve e as me gjenerozitetin e Bashkimit Evropian.
E treta, ngjarjet e së shtunës kanë dëshmuar se integrimi ose bashkimi i shqiptarëve nuk mund të bëhet duke marrë anë. Shqipëria ose Kosova, mund ta mbështesin tërësinë e njëra tjetrës, por kurrë e asnjëherë nuk mund të bëhen palë në hesapet e brendshme.
A mund të imagjinohet që disa qindra ose mijëra shqiptarë të Kosovës të ishin në mbështetje ose kundra kryeministrit shqiptar, në ngjarjet e Tiranës së janarit të shkuar. Ithtarët ose militantët e Vetëvendosjes do të mund të vazhdojnë të thonë se janë në të drejtën e tyre, sepse marrëveshjet me Serbinë janë të dëmshme e kundërkushtetuese, por kjo nuk nënkupton që ata mund t'i shkelin ato në të njëjtën mënyrë.
Është krejtësisht legjitime që një forcë politike të provojë ta përmbysë qeverinë, por jo vendimet e saj, aq më tepër nëse ato janë të karakterit ndërkombëtar. Kjo është alfa dhe omega e veprimit politik që mëton të jetë i nivelit shtetëror. Sikur forcat politike, të moderuara ose nacionaliste, në pozitë ose në opozitë, të mëdha ose të vogla, ta kishin fuqinë e shkeljes së marrëveshjeve të qeverive, atëherë bota do të ishte në një kaos.
Lufta fillon e përmbyllet, deri në fazën kur një proces negociatash nuk ka rezultuar me një marrëveshje dhe gjithçka pas kësaj është “fait accompli”.
(Autori është kolumnist i rregullt i gazetës “Zëri”)

[Zanzi/M]

Mediat elektronike njoftojne qe protestuesit te dheu i bardhe jane rrah ne mes veti. Kjo ka ndodhur pasi eshte marr vendimi per te nderprer protesten, pasi qe protestuesit jane shtyer kush per te ikur me shpejt ka filluar nje perleshje mes tyre.

[prishtinasi]

Postimi origjinal është bërë nga Zanzi/M

Mediat elektronike njoftojne qe protestuesit te dheu i bardhe jane rrah ne mes veti. Kjo ka ndodhur pasi eshte marr vendimi per te nderprer protesten, pasi qe protestuesit jane shtyer kush per te ikur me shpejt ka filluar nje perleshje mes tyre.

Diqysh duhet mu nxe shoki...haha...

P.s:
Hashimi qysh eshte, me idare qysh i ka punte? Ishalla s'hjek keq, se qe 11 vjet se ka livru aren ne Broje:D

[e_martumja]

Postimi origjinal është bërë nga Zanzi/M

Mediat elektronike njoftojne qe protestuesit te dheu i bardhe jane rrah ne mes veti. Kjo ka ndodhur pasi eshte marr vendimi per te nderprer protesten, pasi qe protestuesit jane shtyer kush per te ikur me shpejt ka filluar nje perleshje mes tyre.

Mu kujtu nje thenje e Milloshoviqit: pat thone kemi gabu, kemi vyt mi lon me nes veti ishin mbyt vet me veti. Gati ashtu ndodhi me 14 ja nisin vet me veti mu rreh... Ska koment, Per me mbeshten Iniciativen Serbia nuk kalon nuk duhet mo me shku ne ETC, e disa shitore te mdhaj qe shesin vetem prodhim serbe, e qka bejn njerz shkojn blejn harrgj dhe knaen tu ndejt tu pi kafe. S0kan faj VV Por edhe me protesta nuk shkon, japin nje imazh te keq per Kosoven. Mu kujtu sod njeri thoshte nga Protestuesit Posht Qeveria, thash mire e ka me gjithe kete Flamurin se kan ndash mi perngjah me Bosnen qe edhe ajo pat luft e Flamurin e Gabelave na dha Evropa. Bosna sna pranoj ah . Kan vyt te Qeveria me protestu dhe me lyp zgjedhjet te parakoheshme.

Intersant cfar dallimi te Policis sone, sod me 14 janar... Gabimet i kan permirsu.

[GURI SYLAJ]

Pse po heshte "baba i kombit"!??
Kah me iamajt tash se ???
Jan prishe Edi e Hashimi,nermjet ju ka hi Albini!!??
E Rexhepi asht ne siklet ,kah me majte s'po din as vet!!

[Gjumashja]

Postimi origjinal është bërë nga Zanzi/M

Mediat elektronike njoftojne qe protestuesit te dheu i bardhe jane rrah ne mes veti. Kjo ka ndodhur pasi eshte marr vendimi per te nderprer protesten, pasi qe protestuesit jane shtyer kush per te ikur me shpejt ka filluar nje perleshje mes tyre.

vv mos me i rreh policia ata rrehen ndermjet veti