Lorena Cika

[Zero Cool]

Modelja shqiptare, nuk është turp të dalësh topless



Dinjiteti për të është më i rëndësishëm se çdo gjë, madje më i rëndësishëm edhe se vetë karriera. Lorena Cika është një vajzë shqiptare, e cila prej 7 vitesh ushtron suksesshëm profesionin e saj si modele në Itali.







Ëndrra e saj e parë ka qenë liria, ndërsa tani, ëndrra më e madhe që ka është të bëhet një modele e njohur dhe të depërtojë në tregun e vështirë të modelingut edhe përtej Italisë. Por pavarësisht pasionit dhe peripecive, Lorena tregon se asnjëherë dhe për asgjë nuk do të jepte gjithçka për t’u bërë e famshme edhe nëse në lojë do të ishte karriera dhe e ardhmja e saj.

“Njoh shumë persona që për të arritur diku “shesin trupin e tyre”. Jo, unë jam kundër këtyre gjërave edhe sepse po ta kisha bërë ndoshta në këtë orë do të isha në Hollywood”, tregon ndër të tjera për “Game Over” Lorena.

Lorena, keni hyrë në botën e modelingut në moshë fare të vogël. Si ka lindur ky pasion tek ty dhe çfarë ju ka shtyrë drejt modelingut?

Pasionin për modën e kam pasur që në moshë të vogël, por ëndrra ime e parë nuk ka qenë kjo. Në moshën 5 -vjeçare më kujtohet që rrija shpesh në dritare dhe shikoja shqiponjat, dëshiroja që të isha si ato, të fluturoja, të isha e lirë. Pastaj kur u rrita pak më pëlqente baleti dhe e vazhdova për pak kohë.

U detyrova që të hiqja dorë nga kurset e baletit, sepse nuk e përballonim dot ekonomikisht. Më vonë më pëlqente moda dhe bëja gjithmonë prova në shtëpi, sfiloja. Me shoqet organizonim gjithmonë konkurse bukurie, “Miss Shkalla”, apo “Miss Lagjia” dhe unë fitoja gjithmonë (qesh)

Cilat kanë qenë eksperiencat e tua në këtë fushë?

Eksperiencat kanë qenë të shumta. Unë nisa në moshën 9-10 vjeçare në televizionin shqiptar “TV-ALBA”. Më pas kam punuar në “Radio 1” së bashku me Dj-Florin. Më vonë kam punuar për dy vjet në “Radio-Intervista”, derisa në moshën 14 -vjeçare erdha në Itali. Këtu përveç studimeve pikësynimi im ishte moda. Nisi gjithçka tek konkurset e bukurisë në lagje dhe pak nga pak arrita të punoj në të gjithë Italinë.

E ka të vështirë që të arrijë pasarelat e firmave të njohura një modele shqiptare? Cilat janë vështirësitë që has një modele në profesionin e saj?

E vështirë është për të gjithë, jo vetëm për vajzat shqiptare. Gjithçka varet nga mënyra sesi futesh në atë botë, çfarë kërkon dhe mënyra sesi e kërkon. Në këtë profesion mund të përballesh me shumë njerëz jo të mirë, njerëz që të shfrytëzojnë, që të premtojnë, që kërkojnë diçka nga ty. Duhet të jesh ti ajo që komandon veten dhe jo të tjerët ty.

Je cilësuar si vajza që nuk buzëqesh kurrë. Është pjesë e karakterit tënd kjo cilësi? Mos ndoshta fakti që nuk buzëqesh kurrë përpara objektivit të aparatit fotografik është një mënyrë identifikimi për ty, apo krijimit të një personaliteti të veçantë si modele?

Është pjesë e karakterit tim. Nuk mund ta quaj një cilësi, nuk më pëlqen vetja kur qesh në sfilita, apo përpara aparatit fotografik. Aty e shoh veten më seksuale, sesa lozonjare. Në jetën e përditshme do të më pëlqente që të qeshja më shumë, por karakteri nuk ndryshon. Mundet vetëm që ta rregullosh atë.

Cilat janë aktualisht angazhimet tuaja në fushën e modës?

Aktualisht nuk jam duke punuar. Do të më pëlqente që të shkruaja një romancë, për të shprehur mendimet e mia në lidhje me këtë profesion.

Përveçse modele, jeni diplomuar edhe si stiliste. Ke menduar që të punosh në këtë profesion?

E kam menduar. Kam studiuar shumë për stilim, por nuk është ky pikësynimi im në jetë. Stilimi është thjesht një profesion më shumë. Megjithëse jetës nuk i dihet asnjëherë.

Do të ndjeheshe më mirë si stiliste gjatë një sfilite, apo si modele?

Ka shumë diferencë mes të dyjave. Si stiliste do të më rrihte zemra më shumë, ndërsa si modele... ç’të të them është pasioni im.

Lorena, je ndër të paktat modele shqiptare që kanë pozuar topless, apo gjysmë nudo. Ka qenë e vështirë ta pranoje që të bëjë diçka të tillë?

Besoj se jam një ndër vajzat e para shqiptare që ka pozuar topless. Herën e parë e kam pasur të vështirë. Më kujtohet që kur pozoja më lëvizte këmba nga nervozizmi, por me kalimin e kohës më kaloi.

Është thyerje tabush të pozosh nudo, apo një domosdoshmëri për të rënë në sy në tregun e modës?

Nuk është domosdoshmëri, por në modë ekziston edhe kjo. Adami dhe Eva kanë qenë të mbuluar nga një gjethe. Tani jemi në 2011-ën dhe të dalësh topless nuk është turp. Turp është të bësh gjëra të paligjshme.

Je përballur me paragjykues për këtë fakt, ndoshta familjarë që kanë qenë kundër, apo të tjerë?

Familja ime nuk ka qenë asnjëherë kundër vendimeve të mia dhe fotografitë që kam bërë nuk janë vulgare. Për të tjerët nuk më intereson, çdonjëri të vlerëson siç do vetë. Pastaj, jam unë ajo që mund t’ju ndryshoj mendjen.

Cilat kanë qenë emocionet e tua kur je gjendur gjysmë lakuriq përpara aparatit fotografik dhe fotografit?

Në Itali organizohet një herë në vit festivali i fotografisë më të mirë. Përpara 8, apo 9 vjetësh konkurrova dhe u zgjodha si modele, kështu bëmë foto nudo artistike. Emocionet janë shumë, por në atë moment nuk mendoj asgjë.

Ke menduar ndonjëherë që të rikthehesh në Shqipëri, ndoshta edhe për të ushtruar këtu të njëjtin profesion, atë të modeles?

Po, e mendoj shpeshherë dhe do të më pëlqente, por mesa kam vënë re në Shqipëri nuk të vlerësojnë për profesionin, por për gjëra të tjera.

Cilat janë synimet e tua për të ardhmen? Ku do të arrijë Lorena?

Kjo pyetje më vë në mendime. Jam në rritje dhe ndryshoj mendim çdo ditë. Do të më pëlqente të bëja shumë gjëra, por për momentin nuk jam në gjendje të vendos për të ardhmen time.

Ke ndjekur një model gjatë fillimit të karrierës tënde? Cili është idhulli yt në modë?

Jo, nuk kam ndjekur asnjë model dhe nuk kam ndonjë idhull të veçantë në këtë profesion.

Do të jepje gjithçka për t’u fotografuar nga ... (kush)?

Kjo pyetje më pëlqen dhe e dini pse? Sepse unë jam krenare që kam ecur gjithmonë me këmbët e mia, kështu që asnjëherë dhe për asgjë nuk do të jepja gjithçka. Njoh shumë persona që për të arritur diku “shesin trupin e tyre”. Jo, unë jam kundër këtyre gjërave edhe sepse po ta kisha bërë, ndoshta në këtë orë do të isha në Hollywood.

Cilat janë sipas teje cilësitë që duhet të ketë një vajzë për të qenë një modele e suksesshme?

Janë të shumta cilësitë, por ajo që është më kryesore për mendimin tim është serioziteti.

Cilat janë sakrificat që duhet të bëjë një vajzë për të qenë një modele e suksesshme?

Sakrifica ka shumë. Nuk është lojë, por është punë, të cilën nëse e merr seriozisht, ndoshta arrin diku.

[tipi engjellor]

qenka shume e bukur edhe per modele mendoj qe do kete suksese..........

[Zero Cool]

[Zanzi/M]

Me te mira se te Lopezes i paska ;).