Fillimi i fundit të AKR ?!

[Zero Cool]

A është ky fillimi i fundit të AKR ? A do të ketë edhe kjo parti fatin e LDD-së ?


Rebelim në AKR





10:02 / 17.09.2011

Degët e Aleancës Kosova e Re po rebelohen dita ditës. Kjo ka ndodhur në Prishtinë, Mitrovicë dhe Kamenicë. Ato po kërkojnë funksionalizimin e udhëheqjes së partisë.
Sekretari për Marrëdhënie me Jashtë në AKR, Gëzim Mehmeti, i cili udhëheq Degën e Dytë në Prishtinë, ka dhënë parashikime të zeza për partinë e pestë në Kosovë. Ai ka thënë se AKR-ja po shkon drejt shkatërrimit, nëse vazhdon të mbetet pa kryetar.
“AKR-ja nuk funksionon që gjashtë muaj”, ka thënë Mehmeti për “Express”.

Mehmeti, që ka qenë i përfolur për një post të zëvendësministrit në Qeveri, kërkon që sa më shpejt të mblidhen organet e partisë dhe të marrin vendime për plotësimin e posteve vakante.

Por, ushtruesi i detyrës së kryetarit të AKR-së, Ibrahim Makolli, mohon se partia po shkon drejt shkatërrimit.

“Nëse individë në parti janë të pakënaqur dhe kanë ide të ndryshme, është shumë e natyrshme për një parti politike”, ka thënë Makolli.

Megjithëkëtë, shumica e degëve të AKR-së nëpër komuna kërkojnë funksionalizimin e udhëheqjes së partisë.

“AKR-ja është pa zot shtëpie”, ka thënë Ibrahim Balaj, kryetar i Degës së AKR-së në Mitrovicë.

Kërkesë të njëjtë ka edhe njëra nga degët më të mëdha të AKR-së në Kosovë- ajo e Kamenicës.

“Partia po shkon drejt rrënimit, për shkak se asnjë strukturë nuk po funksionon”, ka thënë Sekretari i Degës së Kamenicës, Blerim Mavriqi.

Për këto kërkesa u.d. i shefit të AKR-së thotë se ka mirëkuptim dhe premton se Këshilli Drejtues do të mblidhet shpejt për të plotësuar postet në parti.

Por, a mund të rikthehet Zëvendëskryeministri Pacolli në krye të AKR-së?

Makolli e lë një mundësi të hapur.

“Këshilli Drejtues ia ka pranuar dorëheqjen dhe me një vendim tjetër mund ta kthejë në krye të partisë”, ka shtuar ai.