A e pine cigaren dhe pse?

40% e shqiptareve pine cigare

14 September 2011 - Kuriozitete - 46 shikime
Studimi më i fundit mbi duhanpirjen në Shqipëri dëshmon më së miri atë që shkruhet në paketat e cigareve, se ‘Duhani vret!’ Të dhënat nga studimi më i fundit i ngjasojnë një ‘bilanci lufte’, pasi në një vit, 3 mijë shqiptarë vdesin nga duhani. Nëpërmjet një studimi të publikuar dy muaj më parë, Instituti i Shëndetit Publik ka bërë transparente të dhëna tronditëse mbi vdekshmërinë në vend si pasojë e përdorimit të duhanit apo edhe qëndrimit në ambiente ku konsumohet duhan. Sipas specialistëve, 18-20 për qind e vdekjeve në vend i atribuohen duhanit. Padyshim nivelin më të lartë e zënë personat që humbin jetën nga kanceri, pasi 53% e të vdekurve nga kanceri i atribuohen konsumimit të cigares. Shifrat alarmante që janë bërë publike nga specialistët e ISHP-së, që janë të dhëna për vitin 2009. Ky studim është bërë në bashkëpunim me Organizatën Botërore të Shëndetësisë, si dhe Institutin e Statistikave në vendin tonë.
Raporti
Të dhënat i referohen një studimi të Organizatës Botërore të Shëndetësisë për vendin tonë, sipas të cilit, 18 për qind e sëmundjeve në vend që përfundojnë më pas me vdekje, shkaktohen nga përdorimi i duhanit dhe prek më së shumti grupmoshat nga 30-deri në 59 vjeç. Në vitin 2009, sipas INSTAT-it, mbi moshën 30-vjeç kanë vdekur 8 mijë e 13 meshkuj dhe 6 mijë e 867 femra. I nisur në vitin 2004, studimi është kryer nga specialistë të Organizatës Botërore të Shëndetësisë dhe përfshin të gjitha vendet anëtare të kësaj organizate. Sëmundjet më të përhapura ku duhani vret më shumë, sipas studimit janë sëmundjet kancero-gjene dhe ato kardiovaskulare, me 3.000 vdekje në vit. Specialistët u referohen vdekjeve që janë shkaktuar nga kanceri në vitin 2009, ku 870 meshkuj dhe 320 femra kanë vdekur nga përdorimi i duhanit. “Vetëm nga sëmundjet e qarkullimit të gjakut si dhe nga kanceri janë afro 3 mijë persona që kanë vdekur, duke iu atribuuar duhanpirjes si dhe qëndrimit në ambiente me tym duhani”, - kanë sqaruar specialistët. Me sa duket, të dhënat alarmante të këtij studimi kanë vënë në lëvizje strukturat përkatëse të Shëndetësisë. Bazuar në një urdhër të ministrit të Shëndetësisë, Petrit Vasili, është vendosur ngritja e një grupi të përbashkët Task-Forcë në zbatim të ligjit antiduhan.

Burimi: Gazeta Shqiptare