Depresioni

[LaDy_Diaspora]

Depresioni mund të prekë këdo!

"Nuk mund të përqendrohem dot dhe vazhdimisht jam i acaruar. Për çdo vogëlsi nevrikosem dhe hidhem përpjetë. Në punë, në shtëpi, madje edhe midis miqësh."
(E, 38 vjeç)

"Çdo vendim më duket i rëndë, qoftë edhe për një imtësirë. Madje edhe në treg. Gjithnjë mendoj se mund të bëj ndonjë gabim. Tashmë nuk e kuptoj veten time."
(S, 52 vjeçe)
__________

Keni dijeni për përvoja dhe vrojtime të këtilla? A ju ka vajtur mendja ndonjëherë se ndjenjat tuaja, gjendjet tuaja shpirtërore, ose shqetësimet fizike, mund të jenë shenja të një depresioni?

Ndonjëherë është vështirë që ta dallosh një depresion nga një sikletosje e zakonshme ditore. Ajo që sot karakterizohet si stres, nervozizëm ose burnout (kapitje), është në fakt shpesh një depresion. Sëmundja shfaqet shpesh ashtu si dhe diabeti ose shtypja e lartë e gjakut, pavarësisht nga mosha, profesioni, gjendja sociale, prejardhja ose besimi fetar. Megjithatë, sëmundja nuk perceptohet në masën e duhur në opinion dhe keqkuptohet.

I merrni seriozisht indikacionet që zgjasin shumë dhe drejtojuni një specialisti. Pas një hetimi të saktë është pothuajse gjithnjë e mundur një diagnozë e sigurt. Ky do të ishte hapi i parë për një trajtim të suksesshëm.

Depresioni është një sëmundje e shpeshtë e cila mund ta prekë këdo, pavarësisht nga mosha, profesioni, gjendja sociale, prejardhja ose besimi fetar. Depresioni sot mund të kurohet.

Depresioni ka shumë pamje

Ç’do të thotë depresion dhe cilat janë shenjat e tij dalluese?

"Presioni në punë është gjithnjë e më i lartë. Muajin e shkuar u larguan sërish tre kolegë të tjerë nga puna. Jam 54 vjeç dhe kam frikë se edhe mua do të më gjejë e njëjta gjë. Që prej tre javësh zgjohem gjatë natës, kam sulme paniku dhe nuk më zë gjumi më. Nuk dua që dhe gruan time ta ngarkoj me hallin tim." L., 54 vjeç, punëtor i ndërtimtarisë, i martuar, 3 fëmijë

"Jetojmë që prej 9 vitesh në Zvicër. Fëmijët e mi kanë lindur këtu dhe këtu ndjekin shkollën. Mirëpo e ardhmja jonë është e pasigurt. Për çdo vit duhet ta vazhdojmë lejeqëndrimin tonë. Buzëqeshja më ka humbur, gjithnjë jam e pikëlluar dhe nuk kam më fuqi."
S., 30 vjeçe, amvise dhe punonjëse në një ndërmarrje pastrimi, e martuar, 2 fëmijë

Një depresion shpesh ka një parahistori dhe shpeshherë është një reagim i psikës dhe trupit ndaj zoritjeve të vazhdueshme dhe situatave të rënda jetësore. Sëmundja mund të zhvillohet tinëzisht, simptomat bëhen gjithnjë e më të forta dhe nuk zhduken dot. Një depresion, ndërkaq, mund të shfaqet edhe befasisht dhe papritur. Mjekët, mjeket dhe i prekuri fi llimisht mendojnë shpesh për ndonjë sëmundje fizike.

Varësisht nga individi, simptomat janë të ndryshme. Shenjat e sëmundjes tek femrat dhe meshkujt mund të shfaqen të ndryshme. Simptomat e mundshme fillestare janë gjumi i çrregullt, pengesat në përqendrim ose zhytja në të thella (vështrimi i ngrirë). Disa të prekur nuk kanë më ndjenja gëzimi, tek të tjerët mbizotëron një angështi e madhe e brendshme. Një depresion mund të shfaqet edhe në formën e një acarueshmërie të shtuar ose sjelljeje agresive në punë dhe brenda familjes.

Dhimbjet e kokës, shpinës ose të barkut si shenja klinike të një depresioni mund të jenë në plan të parë. Të prekurit ndonjëherë mund të kenë sulme frike ose ndjesi të një ankthi / ngërçi fizik. Mund të zhduket dhe interesi për seksualitet. Shkallët e depresionit tek sëmundja mund të jenë shumë të ndryshme. Në rastin e një depresioni të rëndë, të prekurit nuk janë më në gjendje ta përballojnë jetën e tyre të përditshme. Është me rëndësi që të ndërmerret diçka sa më parë që të jetë e mundur. Bisedoni me një specialist.

Jo të gjithë të sëmurët nga depresioni kanë simptoma të njëjta dhe vuajnë nga i njëjti manifestim i sëmundjes.

Cilat mund të jenë situatat e rënduara jetësore dhe faktorët rrezikues?

> Kërkesat shumë të larta e konstante në punë dhe në shtëpi shtojnë rrezikun e sëmurjes nga depresioni.
> Kushtet e vështira fi nanciare, paga e ulët dhe frika nga largimi prej punës, mund të shkaktojnë presion të vazhdueshëm.
> Jeta në migracion përfaqëson për shumë migrantë dhe migrante një tendosje të vazhdueshme. Një status qëndrimi i pasigurt, frikërat për të ardhmen, mirëpo edhe një mungesë vlerësimi, përvojat nga racizmi dhe diskriminimi mund ta ngarkojnë shëndetin dhe të shpien në një depresion.
> Humbja e një njeriu të dashur është një plagë e thellë në jetë dhe mund të shkaktojë depresion.
> Kujdesi ndaj fëmijëve dhe familjes mund të shpjerë në një tendosje të vazhdueshme. Për migrantet dhe migrantët situata është sidomos e rënduar, pasi që janë në merak për integrimin e fëmijëve të tyre, ose ngaqë një pjesë e familjes ka mbetur në vendin e origjinës.
> Sëmundjet kronike të ndonjë familjari, sidomos sëmundjet psikike, mund të jenë shumë rënduese.
> Edhe mbështetja dhe përkujdesi ndaj pjesëtarëve më të moçëm të familjes mund të ketë kosto të lartë fizike dhe emocionale.
> Përjetimet traumatike dhe ngarkesat e larta shpirtërore, edhe po të ketë kaluar shumë kohë, mund të jenë bashkëshkaktarë të një depresioni.

Si në rastin e çdo sëmundjeje tjetër, ekzistojnë faktorë dhe shkaktarë që shtojnë rrezikun e sëmurjes nga depresioni. Po të jeni në mëdyshje nëse vuani ose jo nga depresioni, vizitoni mjekun ose mjeken tuaj familjar/-e, ose ndonjë tjetër specialist/-e që gëzon besimin tuaj.