Ana Oxa, koncert në Gjakovë

[Kalt]

Ana Oxa, koncert në Gjakovë

Agron Krasniqi

Prishtinë - Këngëtarja e njohur italiane me origjinë shqiptare, Anna Oxa, do të jetë e pranishme në një koncert të madh sot në mbrëmje në Gjakovë. Koncerti mbahet për nder të çlirimit të qytetit të Gjakovës ndërsa pjesëmarrës do të jenë edhe këngëtarë të tjerë nga Shqipëria e Kosova si Alban Skenderaj, “Elita 5”, Ledina Çelo, Çiljeta Xhilaga, Shkëlzen Jetishi - Xeni. Oxa do të këndojë 15 këngë. Moderator është Ardit Gjebrea i cili përkundër angazhimeve të tij të shumta në Tiranë ka gjetur kohë për të marrë pjesë në këtë koncert, pasi ka qenë edhe një nga ndërmjetësit për të sjellë Oxan në Kosovë. Organizatori i këtij koncerti, Urim Arllati, ka thënë se u deshën dy vjet për të sjellë në Kosovë dhe në këtë mbrëmje këngëtaren e njohur, ish- bashkëshorte e një biznesmeni me mjaft influencë në Kosovë, Bexhet Pacolli. Ana Oxa mbërrin në Prishtinë sot në orën 15. 45, ndërsa janë paraparë edhe takime me udhëheqësit më të lartë të insitucioneve kosovare. Ajo do të vijë bashkë me të bijën e saj.
Organizatorët presin që në sallën e panaireve, të mblidhen deri në 30 mijë vetë për të ndjekur koncertin i cili po pritet me interesim të madh nga publiku kosovar. Në program ishte menduar që Oxa do të këndonte edhe himnin kombëtar, mirëpo për shkak të vështirësive për të mësuar tekstin ajo ka kërkuar që himni të këndohet nga të gjithë të pranishmit në këtë mbrëmje.

14/06/2006
Shekulli