“Kosova e Re”

[Zero Cool]

Kosova e Re nis më 2013






Punimet për ndërtimin e termocentralit “Kosova e Re”, pritet të fillojnë në vitin 2013, bëjnë të ditur zyrtarë të qeverise. Sipas tyre, për ndërtimin e këtij projekti, në garë gjenden katër konsorciume ndërkombëtare. Por, ekspertë të energjetikës, dyshojnë në kualitetin e kompanive të para - kualifikuar, madje i rekomandojnë ekzekutivit që të përsëritin tenderin për para - kualifikim.


Në muajin shtator të këtij viti, pritet që të shpallet tenderi për ndërtimin e termocentrali “Kosova e Re”, ndërsa në muajin mars të vitit 2012 pritet që të shpallet kompania fituese për realizimin e këtij projekti, bëjnë të ditur zyrtarë të Ministrisë së Zhvillimit Ekonomik.

Lorik Haxhiu, menaxher i projektit, thotë se deri në fund të vitit të ardhshëm do të përfundojë i tërë procesi, ndërsa punimet në terren për ndërtimin e termocentralit, sipas tij, do të nisin në fillim të vitit 2013. “Tenderi për Termocentralin Kosova e Re është në finalizim, pritet që të merren disa vendime nga Komiteti Drejtues i Projektit, në mënyrë që tenderi të shpallet rreth muajit shtator të këtij viti. Pas kësaj, pritet që ofertat të pranohen në muajin shkurt të vitit të ardhshëm, ndërsa fituesi për ndërtimin e këtij termocentrali të shpallet në muajin mars 2012”, theksoi Haxhiu.

Ndryshe, katër konsorciume ndërkombëtare, nga gjashtë sa kishin aplikuar për këtë projekt, i kanë përmbushur kriteret për ndërtimin e termocentralit, transmeton Radio Evropa e Lirë.

Konsorciumi Adani Power/PT Adani Global nga India dhe Indonezia, konsorciumi AES Electric lid/ Demir Export A.S nga SHBA-të dhe Turqia, Park Holding nga Turqia dhe konsorciumi PPC Contour Global LLP nga Greqia dhe Britania, janë ofertuesit e kualifikuar për ndërtimin e Termocentralit “Kosova e re”.

Por, ekspertë të energjetikës, vlerësojnë se autoritete kompetente duhet të rishpallin tenderin për para - kualifikim.

Eksperti Agron Dida, dyshon në kualitetin e kompanive që tashme janë në garë, pasi sipas tij, asnjëra nga këto nuk janë kompetente për të ndërtuar ndonjë termocentral. “Do të jetë një rrezik i madh që ato do të fillojnë eventualisht dhe do të lënë projektin në gjysmë. Ky projekt është shumë serioz, kurse kompanitë asnjëra, sipas meje, nuk janë kompetentet për të ndërtuar një termocentral të tillë” thekson Dida.

Sidoqoftë, termocentrali Kosova e Re, parashihet t’i ketë fillimisht 300 megavat, me mundësi të shtimit edhe të 300 megavateve të tjera, zhvillimin e minierës se Sibovcit dhe rehabilitimin e termocentralit Kosova B.

Termocentrali Kosova e Re llogaritet të jetë një ndër projektet më të mëdha në vend, ndërsa kostoja për ndërtimin e tij, vlerësohet të jetë 1.5 miliard euro.

[Zero Cool]

U harru Kosova e re e hajt :P

KEK-u në “luftë” me biznesin





9:41 / 15.09.2011

Vendimi i Korporatës Energjetike të Kosovës (KEK) për zbatimin e 25 për qind avans që bizneset të paguajnë, është refuzuar nga Zyra e Rregullatorit të Energjisë (ZRrE), si vendim i pafavorshëm për bizneset.


Kjo ka bërë që të përplasen mes vete drejtuesit e KEK-ut dhe kreu i Aleancës Kosovare të Biznesit (AKB), Agim Shahini.

Shahini ka thënë se AKB-ja nuk është në kundërshtim për furnizim të bizneseve me energji elektrike në kategorinë A+, por është kundër kushteve të reja të KEK-ut për avans prej 25 për qind, edhe pse zyrtarë të KEK-ut thonë se është e njëjta gjë, sikur ajo që ka qenë të paguhen 3 muaj avans sikur të paguhen 25 për qind avans, shkruan Zëri.

Sipas tij, KEK-u me rregullën e re që është 25 për qind avans, përveç kësaj ka obliguar bizneset që të paguajnë edhe me debit apo që të kenë qasje në llogaritë e tyre, e po ashtu edhe t’u bëhet kusht që të kenë qasje në trafo 10 Kw, që do të thotë se bizneset duhet t’i blejnë trafot.

[Zero Cool]

Hiqet monopoli


KOSTT`i ka përpiluar modelin e ri të tregut të energjisë elektrike në Kosovë. Propozon që të hiqet monopoli, duke u mundësuar më shumë kompanive tjera të tregtojnë energji elektrike. Kjo planifikohet të ndodhë pas privatizimit të KEK`ut. Projekti është dërguar për miratim në ZRRE.





Nga Albulena Maloku më 18 shtator 2011 në ora 08:15
Pas privatizimit të Korporatës Energjetike, kosovarët do të kenë mundësi të furnizohen me rrymë edhe nga kompani të tjera. Kjo parashihet me modelin e tregut të energjisë elektrike, i hartuar nga operatori i tregut - KOSTT.

Më saktësisht, dizajni i modelit të hartuar nga KOSTT parasheh një treg bilateral, të mbështetur në një mekanizëm balancues.

Në këtë dizajnim janë specifikuar rolet dhe përgjegjësitë e gjithë pjesëmarrësve në tregun e energjisë në Kosovë.

Krejt kjo është bërë me qëllim që në vend të sigurohet tregtimi i energjisë elektrike me rregulla jo diskriminuese. Ky model, i cili është përfunduar gjatë muajit gusht, tash po e pret lejen e Zyrës së Rregullatorit të Energjisë.

Zëdhënësja e KOSTT’it, Zana Rama, tregon për Express se hartimi i dizajnit të tregut të energjisë elektrike të Kosovës ka përfunduar dhe në gusht të këtij viti është dorëzuar në ZRRE për aprovim.

Rama tregon se KOSTT, përmes këtij modeli, ka paraparë një treg bilateral në vend.
“Dizajni i tregut të energjisë elektrike parasheh që në Kosovë do të jetë një treg bilateral i mbështetur me një mekanizëm balancues”, thotë zëdhënësja Rama.

Në dizajnin e tregut, ajo thotë se janë specifikuar rolet dhe përgjegjësitë e pjesëmarrëseve të tregut, janë përcaktuar relacionet kontraktuale, relacionet financiare dhe rrjedhat e informatave ndërmjet pjesëmarrësve duke krijuar kështu një model të përshtatshëm dhe të dakorduar të tregut.
Qëllimi i dizajnimit të këtij tregu, sipas saj, është bërë për të siguruar tregtim të energjisë elektrike në Kosovë duke zbatuar rregulla jo diskriminuese në tregun e energjisë.

Pas aprovimit të dizajnit të tregut nga ZRrE, Rama thotë se KOSTT do të modifikojë rregullat e tregut bazuar në dizajnin e tregut të energjisë elektrike në mënyrë që të mundësojë zbatimin e tij.
Zëdhënësja e ZRRE’së, Adelina Murtezi, thotë se tashmë ky dokument është në proces të shqyrtimit dhe të analizimit nga ekspertët e brendshëm.

“Tashmë ky model që është një dokument shumë i rëndësishëm, është në proces të adaptimit të legjislacionit sekondar dhe marrjes së informatave shtesë dhe pastaj pritet të dalë në aprovim”, thotë Murtezi.
Njohësi i energjetikës, Et’hem Çeku, thotë se ideja ka qenë që të krijohen sa më shumë mundësi për blerjen e energjisë në periudha më afatgjate.

Sipas tij, është dashtë të krijohet mundësia që në tregun kosovar të hyjnë edhe kompani të tjera për të furnizuar me energji elektrike.

“Qytetarët prapë do të kenë një operator, por si furnizues të jashtëm do të kenë edhe kompani të tjera. Pra, do të paraqitet mundësia e furnizimit më lirë me energji elektrike”, tha ai. Qytetarët, sipas tij, do të kenë mundësinë që në rast të rënies që blloqeve nga sistemi, të kyçen drejtpërdrejt në ndonjë kompani tjetër.

“Kjo do të varet varësisht prej marrëveshjes që ZRRE i ka me kompanitë tjera që shesin energjinë elektrike”, tha Ceku.

Menaxherja për privatizimin e rrjetit në KEK, Fllanza Hoxha, tregon për Express se për këtë proces ZRRE’ja ka filluar edhe përpilimin e legjislacionit sekondar si pjesë e të cilës është edhe metodologjia e tarifave-rregullt për vënien e çmimeve.
“Ky dokument i rëndësishëm është në fazën përfundimtare të diskutimeve publike, por ende nuk është aprovuar përfundimisht”, thotë Hoxha.

Procesi i privatizimit të KEK’ut, sipas saj, është duke shkuar sipas agjendës së paraparë. Kompanitë e parakualifikuara, Elsewedy, Çalik, Limak dhe TAIB Bank thotë se janë duke i marrë këto dokumente dhe të dhënat për sektorin e distribucionit dhe furnizimit të KEK, nëpërmes Dhomës së të Dhënave.