Sporti në Kosovë

[euro]

BOKS: Turneu i 5-të ndërkombëtar "Adem Jashari"



Në finalen e Turneut më prestigjioz në boksin kosovar, boksierët vendas kanë treguar boks atraktiv, cilësi dhe rezultate të larta



Afro 1000 shikues kishin ardhur në Pallatin e Rinisë dhe Sporteve në Prishtinë për të përcjellur meçet finale, të edicionit të pestë të turneut ndërkombëtar në boks “Adem Jashari”.



Në këtë mbrëmje u zhvilluan 13 meçe, nga kategoria 51 deri në atë 85 kg.



Boskierët kosovarë, patën paraqitje solide në këto gara, duke arritur që nga 11 meçe të fitojnë 9 prej tyre.



Gati në të gjitha kategoritë, shikuesit e pranishëm në palestër, patën rastin që të shohin cilësi mesatare të boksit, por që ishte dukshëm më e mirë sesa cilësia e para një viti.



Në dy meçet e para u demostrua boks i një niveli më të ulët.

Në duelin e tretë të kësaj finaleje, u zhvillua luftë në kategorinë deri në 57 kg, në të cilën matën forcat në ring boskieri kosovar Gëzim Galica dhe ai nga Shqipëria Elton Meta. Medalja e artë në këtë balafaqim i takoi Galicës së Kosovës.



Dueli ndërmjet Rasim Shabanit nga Kosova dhe Nexhip Mazllomit nga Kroacia, përfundoi me fitoren e Dokos.

Në këtë meç të dy boksierët ishin mjaft dinamikë dhe boksimi i tyre u prit me mjaft ovacione nga publiku. Iniciativa kryesisht ishte e Shabanit, të cilit edhe i takoi medalja e artë.



Dueli i kategorisë 69 kg, në mes dy boksierëve kosovarë, të riut Ismet Dobratiqi dhe gjakovarit Agron Nushi, i takoi Dobratiqit me rezultat 2 me 1.



Në të njëjtën kategori boksuan edhe Stanisllav Amaro i Bullgarisë dhe Damian Shell i Sllovenisë. Me vendimin unanim të gjyqtarëve, këtë meç e fitoi bullgari Amaro.



Kosovari Nazmi Terrakaj, në kategorinë 75 kg, u takua me sllovenin Vlladko Nikollov. Medaljen e artë me plot meritë e fitoi Nikollov, i cili pati paraqitje të shkëlqyer në këtë meç.



Një prej meçeve më interesante në këtë finale ishte ai ndërmjet boksierit të talentuar prishtinas Besim Brahimit dhe Eduard Hotit nga Shqipëria.



Pas 4 raundeve të cilat sollën dramaticitet dhe emocione në mesin e të pranishmëve, gjyqtarët vendosën që medalja e artë t’i takojë Brahimit të Kosovës.



Në kategorinë deri në 81 kg, u zhvillua meçi më interesant i kësaj finaleje ndërmjet boksierit të njohur kosovar Xhavit Visoka dhe atij nga Bosnjë dhe Hercegovina, Dejan Mikuliç.

Ndonëse në raundin e parë të dy boksierët ishin mjaftë të rezervuar në vendimet e tyre, raundi i tretë dhe i katërt i takoi plotësisht Visokës nga Kosova.



Në të njëjtën kategori boksoi edhe Mario Shivanja i Kroacisë dhe Svetozar Radevit nga Bullgaria.Vendin e parë e zuri kroati Shivanja.



Kosovari Xhemzhit Limari humbi nga Sandro Sandall, kurse në meçin e fundit ndërmjet Ilian Dimov dhe Robert Filipoviç, Dimov fitoi pa luftë.



Në fund të turneut u ndanë çmime për boksierët më të sukseshëm.



Kupa Adem Jashari i takoi Rasim Shabanit të Kosovës.

Tekniku më i mirë u shpall Mario Shivanja i Kroacisë, kurse epiteti i çiftit më luftarak i takoi dyshes Besim Brahimi nga Kosova dhe Eduart Hoti nga Shqipëria.



Në këtë ceremoni nuk u la anash as pjesëmarrësi më i ri. Këtë vit boksieri më i ri ishte Ismet Dobratiqi, i cili poashtu fitoi një çmim modest.



Gjyqtari më i mirë u shpall bullgari Vlade Kontov.