Michael Jackson, ylli i deshtuar i muzikes pop

[ARVANITI]

I pëlqyer apo i urryer, Jackson, 46 vjeç, që rrezikon deri në 20 vjet burg për abuzim seksual me të mitur, është një kërcimtar dhe këngëtar i mrekullueshëm me një trup burri dhe fëmije pas shumë operacioneve të kirurgjisë plastike. Këngët e këtij më të suksesshme si "Thriller" apo "Billie Jean" e kanë bërë të njohur dhe të admiruar në mbarë botën, ku numërohen ende shumë klube fansash. Ai u lind më 29 gusht të vitit 1958 në një familje të varfër në Gary (Indiana, veri). Babai i tij ishte minator, mamaja shitëse. Ata ishin nëntë fëmijë. Kariera muzikore e Jacksonit fillon me katër vëllezërit e tij. Në fillim ai shfaqet me flokë kaçurrela. Ishte koha e "Jackson Five" të lançuar nga shtëpia diskografike 'Motown" në fillim të viteve 1960. Më pas ai fillon të ndryshojë pak nga pak trupin, duke hedhur poshtë origjinën e tij të zezë për t'u bërë i bardhë, duke u shfaqur kështu me një fytyrë të zbehtë dhe me një hundë me majë, shumë të vogël në krahasim me fytyrën. Ai ka pranuar se ka bërë vetëm dy operacione plastike në hundë dhe se ngjyra e bardhë e lëkurës ishte për shkak të një sëmundje lëkure të quajtur "vitiligo". Kërcimtar mjaft i zoti, Jackson është quajtur "jashtëtokësor" për fobitë e tij higjenike ose "Bambi" për imazhin e tij të një fëmije të përjetshëm. Ai lëviz gjithmonë me çadër për t'u mbrojtur nga rrezet e diellit. Vitet 1980 janë vitet e suksesit të tij. I vetëshpallur "Mbret i pop-it" ai thyen rekordet e shitjes me albumin e tij "Thriller" (1982, më shumë se 41 milionë albume), i ndjekur më pas nga "Bad" (1987, 20 milionë) apo "Dangerous" (1991, 21 milionë). Por në vitin 1993 imazhi i yllit të pëlqyer prishet nga ankesa e një adoleshenti 13-vjeçar për ngacmim seksual, duke shfaqur pakënaqësi te të ftuarit në fermën e tij në Neverland (Californie), i transformuar në park lojrash dhe i pagëzuar me emrin "Piter Pan". Në maj të vitit 1994 Jackson martohet me Lisa Prestley-n. Një vit më pas, dalja e albumit "History" i cilësuar si një rikthim i suksesshëm i këngëtarit, ishte një dështim i vërtetë. Më 1996 ai martohet me një infermiere australiane, Debbie Rowe, të cilën e njihte që prej 15 vjetësh. Ata lindën dy fëmijë Prince Michael Jr dhe Paris Michael Katherine. Çifti divorcohet në vitin 1999. Jackson është gjithashtu babai i një fëmije të tretë Prince Michael II, të lindur me një grua tjetër në vitin 2002. Me albumin e fundit "I pamposhturi" që doli në treg në tetor të vitit 2001, ylli i muzikës nuk pati një sukses shumë të madh dhe u bë sërish objekt skandalesh në shtyp në nëntor të vitit 2002, duke i treguar fëmijën e tij më të vogël fansave, të varur vetëm me një dorë poshtë ballkonit të hotelit të tij në Berlin. Në shkurt të vitit 2003, një dokumentar i realizuar nga stacioni televiziv britanik ITV, në të cilin Jackson mohon çdo sjellje të pahijshme dhe shprehet se nuk ka asgjë të keqe të flesh me fëmijët, i shkakton probleme serioze me drejtësinë dhe që mund t'i japin fund karierës së tij muzikore.