Kosovarët, të interesuar për plazhin e Durrësit

Kosovarët, të interesuar për plazhin e Durrësit

Ll. Kallço

Në takimin e zhvilluar me pushtetarë lokalë të Durrësit, kryetari i Odës Ekonomike të Kosovës, Ismail Kastrati, konfirmoi interesin e kosovarëve për të frekuentuar plazhin e Durrësit. Nga ana tjetër, ai kërkoi që standardet e akomodimit të këtij fluksi të jenë të pranueshme në garantimin e pushuesve kosovarë në drejtim të pikave turistike në Shqipëri. Delegacioni nga Kosova vizitoi njësitë akomoduese në plazhin e Durrësit si dhe disa nga qendrat e kulturës dhe historisë së qytetit. Ata u takuan me përfaqësuesit e biznesit turistik në Durrës. Autoritetet e Shqipërisë kanë premtuar masa të jashtëzakonshme policore gjatë sezonit turistik, ndërkohë që për pushuesit kosovarë do të ketë lehtësira në pikat kufitare dhe në shërbime të natyrave të tjera. 176 hotele me mbi 1700 shtretër do të jenë të gatshme për pritjen e fluksit të turistëve nga Kosova. Burime nga zyra e turizimit në prefekturë thanë se tashmë është prezantuar oferta turistike për sezonin veror të këtij viti. Zona e plazhit është sistemuar në një gjatësi prej 4,3 km, ndërsa janë hapur dhe 15 banja publike që mungonin në sezonin e kaluar. Burime nga bashkia e Durrësit thanë se është bërë largimi i gardheve që pengonin hapësirat e plazhit si dhe është akorduar një fond i veçantë për pastrimin e plazhit, që në fillim të sezonit mendohet të jetë krejtësisht i pastër.