Gazeta elektronike sportive: "FUTBOLLI

[Mendjen]

Iaquinta i frustruar nga minutazhi që i ofrohet

Sulmuesi i Juventusit, Vincenzo Iaquinta, ndjehet i frustruar pasi që vazhdimisht inkuadrohet nga banka rezervë.
Iaquinta ka nënshkruar për Zonjën e Vjetër, pas transferimit nga Udinese verën e kaluar, mirëpo ai vazhdimisht e ka ngrohur stolin dhe është inkuadruar në fund të lojës. Përkundër kësaj 28-vjeçari ka arritur të shënojë 8 gola për Juven, ndërsa goli i të dielës mbrëma kundër Napolit ua siguroi tre pikë shumë të rëndësishme Bianconerëve.

“Jam i lumtur se pas inkuadrimit kam shënuar dhe e di se jam i vlefshëm për skuadrën, megjithatë thuajse gjithmonë jam në rolin zëvendësues. E dija se në Juventus do të jetë ndryshe nga Udine ku e kisha vendin e sigurt në formacionin e parë, sepse këtu ka lojtarë shumë të mirë të cilët e kanë shkruar historinë e këtij klubi”, ka thënë italiani për “Tuttosport”.

Iaquinta ka thënë se ka frikë se do ta humb vendin në kombëtaren italiane për Kampionatin Evropian të futbollit, për shkak të minutave të vogla që luan.

“Secili lojtar dëshiron të jetë protagonist. Kur e kam nënshkruar kontratën e kam ditur se do të jem në stol, mirëpo s’e kam imagjinuar se do të jetë kaq keq. Ndihem si Del Piero në kohën kur trajner i Juves ishte Capello. Duhet të pranoj se është akoma më e vështirë për ta ruajtur vendin tek Azzurët”, ka përfunduar Iaquinta.

[Mendjen]

Kthehen Nistelrooy dhe Ramos

Ruud van Nistelrooy dhe Sergio Ramos pritet të luajnë në ndeshjen kundër Valencias të cilën Real Madrid do ta luaj të dielën në Bernabeu.
Sulmuesi holandez ka qenë jashtë fushës së blertë që gjashtë javë, ndërsa Sergio Ramos ka munguar për dy ndeshje në La Liga për shkak të suspendimit, megjithatë të dy lojtarët janë të gatshëm për t’u kthyer.

Trajneri i Realit, Bernd Schuster, i cili si shkak kryesor të eliminimit nga Liga e Kampionëve e ka konsideruar pikërisht mungesën e këtyre dy lojtarëve, do të jetë më i lehtësuar pas rikuperimit të tyre.

Që prej lëndimit të Nistelrooyt më 2 shkurt, Real Madridi ka fituar shtatë, ka barazuar një, dhe ka humbur tri ndeshje.

[Mendjen]

Milan dështon sërish në San Siro

Milan ka pësuar një goditje tjetër, duke u mposhtur në San Siro nga Sampdoria me rezultat 2-1 dhe duke humbur kështu rastin e artë t’i afrohet në një pikë Fiorentinës që pësoi humbje nga Napoli.
Rosonerët ishin në disavantazh 2-0, pas dy golave të shënuar nga mysafirët në 25 minutat e para të ndeshjes, përmes Cristian Maggio (12’) dhe Gennaro Delvecchio (25’). Golin e vetëm për Milanin e shënoi Alberto Paloschi, 20 minuta para fundit të ndeshjes (71’).

Fiorentina ka humbur me rezultat 2-0 në fushë të Napolit, me dy golat e shënuar nga Ezequiel Lavezzi (23’ dhe 31’), por që vazhdon të mbajë pozitën e katërt me katër pikë epërsi nga Milani.

[Mendjen]

Tottenham vs. Chelsea – dramë me tetë gola

Tottenham ka frenuar ca shpresat e Chelseat për të fituar titullin e Premierligës, duke barazuar si vendas në një ndeshje e cila solli plot tetë gola.
Në përballjen, e cila pa dyshim do të mbahet mend si një prej ndeshjeve më të mira në Premierligë, Tottenham ishte në disavatazh 1-0, pastaj 3-1 dhe 4-3, por në fund gjeti mënyrën për të nxjerrë një pikë nga kjo ndeshje.

Chelsea kaloi në epërsi pas vetëm 3 minutash lojë, përmes sulmuesit Didier Drobga, por 9 minuta më pas vendasit barazuan me anë të Jonathan Woodgate (12’). Vetëm pas 7 minutash tjera, Joe Cole asistoi për Michael Essien, i cili risolli avantazhin për blutë.

Joe Cole, që ishte lojtari i ndeshjes, po ashtu shënoi golin e parë të pjesës së dytë (51’), duke çuar Chelsean në avantazh 3-1, por që shpejt u ngushtua nga goli i bullgarit Dimitar Berbatov (61’). Tom Huddlestone arriti të barazojë për vendasit (75’), para se sërish Cole të sjellë avantazhin për Chelsean (79’).

Kur u mendua se Chelsea do të siguronte një fitore të rëndësishme, që do ta barazonte në pikë me Arsenalin, Tottenham shënoi edhe një gol tjetër për të barazuar me anë të Robbie Keane, dy minuta para fundit të kohës së rregullt të ndeshjes.

Chelsea mbetet në vendin e tretë më 65 pikë, dy më pak se Arsenali që gjendet në vendin e dytë. Manchester United pas fitores prej 2-0 ndaj Boltonit, mban vendin e parë me 70 pikë.

[Mendjen]

Bogdani i sjell një pikë Livornos

Sulmuesi i kombëtares kuqezi Erjon Bogdani ka shënuar golin e barazimit në ndeshjen që Livorno e zhvilloi në fushë të vet ndaj Regginas, ndeshje e cila përfundoi me rezultat 1-1.
Reggina në pjesë të parë kishte kaluar në epërsi me anë të Franco Brienzas (33’), por goli i shqiptarit, i cili erdhi në pjesë së dytë (60’), ruajti 1 pikë në stadiumin Armando Picchi. Për sulmuesin shqiptar ky është goli i dytë i tij gjatë këtij sezoni jo aq të mirë në Serie A.

Bogdani erdhi në Livorno në fillim të këtij sezoni, si huazim nga Chievo ku kaloi në pjesën e dytë të sezonit të kaluar. Më parë Bogdani ka luajtur edhe me Sienan, me të cilën shkëlqeu në sezonin 2005/06 duke shënuar 13 gola në Serie A.

[Mendjen]

United tri pikë mbi Arsenalin

Manchester United ka marrë kontrollin e kreut të Premierligës me tre pikë diferencë ndaj Arsenalit, pas fitores prej 2-0 në Old Trafford ndaj Bolton Wanderers, derisa Cristiano Ronaldo i ka shtuar edhe dy numrit të tij të golave këtë sezon.
Dy golat e portugezit që i sollën fitoren Djajve të Kuq erdhën mjaft herët në ndeshje. I pari u shënua pas vetëm 9 minutash lojë, derisa ai dyti erdhi në minutën e 20-të. Me këto gola, Ronaldo i çon në 24 numrin e golave të tij në Premierligë, derisa pas tij ndjek Fernando Torres me 20.

Manchester United me këtë fitore ruan vendin e parë me 70 pikë, tre pikë të pastra mbi Arsenalin që gjendet në vendin e dytë. Pas barazimit 4-4, Chelsea mbetet në vendin e tretë më 65 pikë.

[Mendjen]

Lotito: Ky ishte Lazio i vitit të kaluar

Pas fitores heroike të Lazios në derbin e mbrëmshëm të kryeqytetit italian përballë Romës, presidenti Claudio Lotito ka lavdëruar paraqitjen dhe disponimin e ekipit të tij.
“Kemi qenë në situata mjaft të vështira këtë sezon, të cilat e rrëzuan pozicionin tonë në tabelë. Kemi pasur si rezultate negative po ashtu edhe mjaft të lënduar, por sonte ekipi gjeti unitetin, qetësinë dhe shpirtin e vitit të kaluar”, ka thënë Lotito.

“Në fushë ishin edhe dy lojtarë të rinj të ardhur gjatë janarit, por struktura bazë e ekipit mbetet e njëjta”, ka shtuar presidenti i Lazios.

Në ndeshjen e mbrëmshme, Lazio fitoi ndaj Romës me rezultat 3-2, derisa golin vendimtar të fitores e shënoi shqiptari Valon Behrami, në çastet e fundit të ndeshjes.

[Mendjen]

Spalletti: Ende besojmë në skudeto

Trajneri i Romës, Luciano Spalletti, thotë se ekipi i tij ende do të luftojë për skudeton, pavarësisht që humbën me rezultat 3-2 në derbin ndaj rivalit romak, Lazios.
“Gjithmonë duhet të tregojmë mentalitet bindës, entuziazëm bindës dhe do të përpiqemi të zvogëlojmë diferencën ndaj Interit. Lojtarët e Lazios luajtën shumë mirë në pjesën e parë, ata ishin gjithkund dhe na nxorën mjaft vështirësi”, ka thënë Spalletti.

“Në pjesën e dytë e kishim ndeshjen në duart tona dhe mund të kishim arritur më shumë. Do jemi të qetë rreth penaltisë dhe do ta pranojmë vendimin e referit. Mënyra se si e humbën derbin dhemb ca, por ajo çka është më e rëndësishme është se ekipi përpiqet të fitojë çdo ndeshje”, ka shtuar trajneri italian.

Roma mbledh 61 pikë dhe mbetet 7 pikë prapa liderit të Serie A, Interit, që pas barazimit të mbrëmshëm ndaj Genoas grumbullon 68 pikë.

[Mendjen]

Ancelotti: Kjo ishte skandaloze

Trajneri i Milanit, Carlo Ancelotti, ka nxjerrë tym pas humbjes së mbrëmshme të ekipit të tij nga Sampdoria me rezultat 2-1, në ndeshjen e luajtur në San Siro, duke rrezikuar shanset e klubit për kualifikim në Ligën e Kampionëve.
“Kjo nuk është mirë. Ishim në disavantazh 2-0 pas një paraqitje skandaloze. Bëmë dy gabime të pafalshme dhe pastaj u bë mjaft e vështirë për tu kthyer në lojë. Qasja e ndeshjes ishte tërësisht e gabuar”, ka thënë Ancelotti.

“Mbase ekipi po bëhet ca i lodhur dhe i vjetër në kuptimin e mentalitetit, por duhet të presim deri në fund të sezonit për ta diskutuar këtë. Ka shumë gjëra të cilat duhet t’i shqyrtojmë në qershor. Sidoqoftë nuk mendoj të largohem nga posti”, ka shtuar italiani.

Derisa edhe Fiorentina po ashtu u mposht nga Napoli, Milan mund të quhet mjaft me fat. Kur kanë mbetur edhe nëntë ndeshje deri në fund të sezonit, dallimi mes Milanit në vendin e pestë dhe Fiorentinës, e cila mban të katërtin, mbetet katër pikë.

[Mendjen]

Ronaldinho: Kritikat nuk mund të ma marrin shpirtin

Superylli brazilian i Barcelonës, Ronaldinho, ka thënë se kritikat e mëdha ndaj tij nuk do të mund ta shkatërrojnë kurrë.
“Ka shumë njerëz xhelozë të cilët dëshirojnë të më shkatërrojnë, mirëpo kurrë s’do t’ia arrijnë qëllimit të tyre. Askush s’mund ta shkatërrojë Ronaldinhon. Nuk ka kritikë në botë që do të mund të ma marrë shpirtin”, ka thënë braziliani.

Kritikat për simulime dhe për një formë jo të mirë, e kanë bërë më këmbëngulës ish-lojtarin e Paris Saint-Germain, dhe ai qëndron i vendosur se vetë ai dhe klubi i tij janë duke shkuar drejt suksesit.

“Barca duhet ta shfrytëzojë Ronaldinhon e fuqishëm për të fituar tituj. Jeta është e bezdisshme nëse ne nuk fitojmë trofe, ndërsa unë ndjehem i frustruar nëse nuk mund t’i ndihmoj skuadrës në fushë. Do të bëj çfarëdo që është e nevojshme të bëhem kampion me Barcelonën”, ka vazhduar Ronaldinho.

[Mendjen]

Anglia e Capellos plot befasi

Trajneri i Anglisë, Fabio Capello, e ka bërë listën e lojtarëve të cilët do të luajnë në ndeshjen kundër Francës javën e ardhshme. Capello ka grumbulluar 30 lojtarë për përgatitje, ndërsa vetëm 23 prej tyre do të udhëtojnë në Francë. Në listë figurojnë edhe David Beckham e Theo Walcott.
Në kombëtare janë kthyer Frank Lampard dhe John Terry, për t’u përgatitur në ndeshjen të cilët “Tre Luanët” e luajnë kundër të “Kaltërve” në stadiumin “Stade de France”, javën që vjen.

Lojtari i Middlesbrough, David Wheater, ka marrë një ftesë debutuese, derisa janë thirrur edhe David James, Jermain Defoe dhe Gabriel Agbonlahor.

Prej lojtarëve të cilët do të mungojnë më të spikatur janë emrat e Michael Carrick, Ben Foster dhe Paul Robinson.

Lista e plotë e lojtarëve:

Portierë: David James (Portsmouth), Scott Carson (Aston Villa), Chris Kirkland (Wigan).

Mbrojtës: Wayne Bridge (Chelsea), Ashley Cole (Chelsea), David Wheater (Middlesbrough), Rio Ferdinand (Manchester United), Glen Johnson (Portsmouth), John Terry (Chelsea), Wes Brown (Manchester United), Joleon Lescott (Everton), Matthew Upson (West Ham), Jonathan Woodgate (Tottenham).

Mesfushorë: Gareth Barry (Aston Villa), Frank Lampard (Chelsea), Steven Gerrard (Liverpool), David Beckham (LA Galaxy), Jermaine Jenas (Tottenham), Owen Hargreaves (Manchester United), Joe Cole (Chelsea), Ashley Young (Aston Villa), Stewart Downing (Middlesbrough), David Bentley (Blackburn), Shaun Wright-Phillips (Chelsea).

Sulmues: Michael Owen (Newcastle), Gabriel Agbonlahor (Aston Villa), Theo Walcott (Arsenal), Wayne Rooney (Manchester United), Peter Crouch (Liverpool), Jermain Defoe (Portsmouth).

[Mendjen]

Redknapp: Ronaldo është më i mirë se Kaka

Menaxheri i skuadrës së Premierligës, Portsmouth, Harry Redknapp ka thënë fjalë shumë të mira për yllin e Manchester Unitedit, Cristiano Ronaldo.
Portugezi ka shënuar dy herë në takimin e mbrëmshëm kundër Bolton Wanderers duke çuar në 33 numrin e golave në të gjitha garat këtë sezon dhe duke e thyer rekordin e George Best, i cili kishte shënuar 32 gola në një sezon për Manchesterin.

“Ronaldo është gjeni. Ai ka teknikë të cilën nuk e kemi parë asnjëherë. Ai është një talent i veçantë. Kaka është një lojtar i shkëlqyer, mirëpo nuk do ta shkëmbeja atë me Ronaldon”, ka thënë Redknapp për gazetën “The Sun”.

Sa i përket golit të cilin Ronaldo e kishte shënuar kundër Portsmouthit nga gjuajtja e lirë, Redknapp pranon se e kishte frikësuar. “Topi lëvizi sikur të mos kishte ajër brenda”, ka thënë ai.

[Mendjen]

Ancelotti ose Lippi në drejtim të kombëtares italiane?

Siç ka shkruar sot Corriere dello Sport, ose Carlo Ancelotti ose Marcello Lippi pritet ta marrë detyrën e trajnerit të kombëtares italiane nga Roberto Donadoni, pas përfundimit të Kampionatit Evropian gjatë kësaj vere.
Federata italiane e futbollit ka zbuluar dje se vazhdimi i kontratës së Donadonit nuk do të diskutohet deri në Euro 2008. “Do ta diskutojmë marrëveshjen e re vetëm pas skadimit të kontratës aktuale, në korrik”, është thënë në deklaratën zyrtare.

Edhe pse shumica mendojnë se Donadoni do të mund të qëndrojë nëse arrin të kualifikohet në gjysmëfinale të Euro 2008, Corriere beson se trajneri aktual nuk do të jetë në detyrën e trajnerit pavarësisht se çfarë përfundimi do të ketë në Austri dhe Zvicër.

Sipas kësaj gazete sportive, Carlo Ancelotti ose Marcello Lippi, do të marrë postin e menaxherit të kombëtares italiane në futboll, me më shumë gjasa që ky të jetë ish-trajneri i saj, Lippi.

[Mendjen]

Benitez mendon vetëm për tri pikë

Menaxheri i Liverpoolit, Rafael Benitez, thotë se ai është i fokusuar ta fitojë ndeshjen dhe të marrë tri pikë të pastra nga takimi të cilin të kuqtë e luajnë të dielën me rivalin e përjetshëm, Manchester United në Old Trafford.
“Ne kemi shumë ndeshje të rëndësishme që po vijnë, mirëpo rivaliteti ndërmjet këtyre dy skuadrave e bën shumë të rëndësishëm këtë takim. Nëse fitojmë, do të jemi shumë afër dhe do të vazhdojmë të fitojmë që të afrohemi gjithnjë e më shumë. Është shumë e vështirë t’u afrohemi atyre, prandaj ne duhet të mendojmë për pozitën e katërt dhe për ndeshjen me Everton”, ka thënë Benitez.

Pyetjes se a është Liverpooli ende në garë për titull, Benitez i është përgjigjur: “Po mendoj për të fituar tri pikët. Po e përsëris, nëse fitojmë do të jemi më afër, dhe pastaj mund të jemi më optimistë”.

“Kemi shumë besim se do të fitojmë dhe takimi me United do të jetë testi më i madh, sepse ka shumë lojtarë të mirë. Kemi besim, po luajmë mirë dhe nëse vazhdojmë kështu, nuk kemi nevojë të frikësohemi nga askush”, ka përfunduar Benitez komentimin për formën e mirë aktuale të skuadrës së tij.

[Mendjen]

Agjenti: Fabiano do transferohet në Itali

Sportivja spanjolle Sport ka cituar agjentin e sulmuesit Luis Fabiano, Jose Fuentes, i cili ka thënë se ka gjasa të mëdha që braziliani të transferohet nga Sevilla në një klub të madh italian, qoftë më herët ose më vonë.
Agjenti i lojtarit ka thënë se “tre ose katër klube të mëdha italiane”, janë në garë për të marrë shërbimet e sulmuesit më të mirë të La Ligas dhe se kanë bërë oferta konkrete dhe jo vetëm të shfaqin një interesim të thjeshtë.

Fuentes po ashtu ka bërë të ditur se dyert për vazhdimin e qëndrimit të Fabianos në Spanjë nuk janë tërësisht të mbyllura, duke thënë se “pas tre ose katër javësh” ai do të takohet me presidentin e Sevillas Jose Maria del Nido rreth kësaj çështje.

Fabiano, i cili është golashënuesi më i mirë në La Liga me 12 gola të shënuar, ka kontratë me Sevillan deri në vitin 2009. 27-vjeçari arriti në klubin spanjoll në vitin 2005 nga Porto.