Stema me elemente të lashta Shqiptare

[Arb]

Stema me elemente të lashta Shqiptare

Familja e Presidentit historik të Kosovës, Ibrahim Rugova, ka dizajnuar një stemë të veten me simbole kombëtare dhe e më ato të fisit të lashtë familjar, Kelmendi.

Në stemën e kuqe, në formë të gjoksores, qëndron shqiponja e zezë dykrenore me nga një kurorë mbretërore dhe me yllin gjashtëcepësh e të verdh përmbi. Mbi to dhe mbi yll qëndron mbishkrimi “I. Rugova”, kurse në fund mbishkrimi “Clement”. Në gjoksin e shqiponjës, në një shenjë, që ka formën e diellit, janë edhe inicialet “IR”.

Kjo stemë u bë publike për herë të parë nëpërmjet ftesave për dasmën e të birit më të madh të kësaj familjeje, Mendimit, e cila do të mbahet këtë të shtunë në Prishtinë.
Sali Cacaj, bashkëpunëtor i afërt i Presidentit Rugova, thotë se kjo stemë përmban elemente të rëndësishme kombëtare e historike, të cilat gjithnjë i ka preferuar dhe i ka çmuar dr. Ibrahim Rugova.

“Në mes, është shqiponja e Skënderbeut, ylli Ilir, ylli i Skënderbeut”, thotë ai. “Klement e ka kuptimin e fisit Kelmend, çfarë janë edhe rugovasit”, shton ai.

Presidenti Rugova, si kritik letrar, ishte i njohur për fanatizmin e tij karshi historisë së lashtë shqiptare. Ai me krenari kishte folur kudo se Kosova e sotme është Dardani Antike e Ilirisë.

Në vitet e pasluftës, gjithnjë i dhënë pas kësaj historie, ai kishte dizajnuar edhe flamurin e Kosovës, i cili përmbante elemente të Dardanisë. Ky flamur edhe sot konsiderohet dhe përqafohet, jo vetëm nga institucionet, por është bërë pjesë e e ngrohtë e përjetimeve në masë të gjerë të popullit të Kosovës.

Stema e tashme familjare ngjason me atë të fisit Kastriot, të cilit i takonte Gjergj Kastrioti – Skënderbeu. Stema e Kastriotëve ka të njëjtën shqiponjë dykrerëshe krahulur, me kurora mbretërore mbi secilën kokë, si edhe yllin gjashtëcepësh lartë në mes.

“Clement - i mëshirshmi”

Ky epitet, mund të ketë lidhje edhe me lashtësinë e shqiptarëve, saktësisht me dy dekadat e para të shekullit 18, kur Vatikani ishte udhëhequr nga shqiptari Giovanni Francesco Albani, e që po ashtu e kishte shfrytëzuar këtë epitet sa ishte papë, Papa Clementi XI (1700-1721) (Clement, do të thotë i mëshirshëm).

Ndryshe, simbolet e Dardanisë të promovuara nga Rugova janë duke gjendur vend edhe jashtë selive partiake të Lidhjes Demokratike të Kosovës, apo Lidhjes Demokratike të Dardanisë, që të dyja pretenduese të jenë trashëgimtare të tij, por që ka gjetur shtrirje masive edhe të 90 për qind të komunave të Kosovës dhe të popullit të saj. Vetë nusja e ardhshme e të birit të Rugovës, Mendimit, stilistja Blerina Kllokoqi, ka lansuar së fundi një linjë rrobash ku dominojnë këto simbole.

Dasmë e madhe, të ftuar edhe Clinton e Albright

Blerina dhe Mendimi do të martohen të shtunën në një ceremoni të madhe që pritet të mbahet në sallën “1 Tetori” në Prishtinë.

Familja Rugova, sipas Sali Cacajt, njëri nga përgjegjësit e organizimit, ka ftuar për këtë dasmë më se 500 mysafirë, ndër ta bashkëpunëtorë të ngushtë të ish-presidentit, vendorë e ndërkombëtarë. Cacaj ka thënë se ftesat u janë dërguar edhe ish-presidentit amerikan, Bill Clinton, e sekretares së Shtetit, Madeleine Albright.

“Ftesë kanë marrë edhe kryeadministratori, presidenti, kryeministri, ministrat, deputetët, familjarët e dëshmorëve, përfaqësuesit e institucioneve të ndryshme, të partive politike, si dhe përfaqësuesit fetarë”, shpjegoi z. Cacaj. | Besnik RAMADANAJ