Korrupsioni e Spiunazha Përmes Biznesit

[LUMI_007]

KORRUPSIONI E SPIUNAZHI PËRMES BIZNESIT

Në këtë kohë, përmes biznesit armiqtë po ndërmarrin aksione kundër Kosovës. Le të dihet, për veprimtari kundër Kosovës forcat antikosovare e antikombëtare gjenden në aksione që përmes biznesit të korruptojnë sa më shumë shqiptarë, por edhe ndërkombëtarë brenda e jashtë Kosovës. Në rend të parë, armiqtë janë duke vepruar që drejtpërsëdrejti ose tërthorrazi t’i korruptojnë “liderët” e Kosovës, ndonjë anëtar të familjeve të tyre dhe prijësit e partive politike. Aktualisht, forcat antikosovare kanë arritur t’i përfitojnë dhe po bashkëpunojnë me disa “shqiptarë”, por edhe me disa ndërkombëtarë në Kosovë. Në veprimtari kundër Kosovës armiqtë i kanë angazhuar edhe disa tregtarë e mërgimtarë shqiptarë. Mjerisht e për çdo denim, tani dihen disa me të cilët po bashkëveprojnë armiqtë, kurse të tjerët janë në survejim e përcjellje.

Sado që të akuzohet, të mbulohet ose të mjegullohet, e vërteta, realiteti nuk mund të ndryshohet. Faktet dokumentojnë që z-nja Marie Fuçi e z. Bernard Llamsdorf, drejtues të Agjencisë Kosovare të Mirëbesimit - Shtylla e Katërt e UNMIK-ut, duke vepruar kundër privatizimit kanë krijuar pakënaqësi në popull, e kanë dëmtuar Kosovën, e kështu e kanë ndihmuar destabilizimin në vend e në regjion. Urrejtje, destabilizim e dëme në Kosovë kanë shkaktuar edhe disa ndërkombëtarë me veprimtaritë e padrejtësitë e tyre gjatë hetuesive, në Prokurori, në gjykata, por edhe me plaçkitje në Korporatën Energjetike të Kosovës e në sipërmarrje të tjera. Rast befasues dhe tepër habitëse ishin përpjekjet, e pastaj edhe aksionet kundër propozimit të disa diplomatëve të Përfaqësive të tyre në Prishtinë, pra të shteteve tona mike, që të rishqyrtohet edhe njëherë dhënia e telefonisë së dytë mobile Mobikosit! Deklerata e zyrtarit përkatës vendor se pohimet e Zyrës së Amerikës, të asaj të Britanisë së Madhe dhe pastaj edhe të Qeverisë së Kosovës lidhur me këtë rishqyrtim ishte paushalle, nuk ishte mençuri e as në interes të Kosovës. A mund të ketë individë të cilët mendojnë që shërbimet e Amerikës e të Anglisë nuk e dinë të vërtetën rreth këtij përcaktimi? Të pa mençura, por edhe të tmerrshme ishin kritikat e këtyre qëndrimeve ndaj deklaratave të diplomatëve të lartëshënuar, të atyre të Grupit të Kuintit, e sidomos shkrimet e dërguara Brukselit kundër të nderuarit e të respektuarit z.Petersen, Përfaqësues Special i Sekretarit të Përgjithshëm të Këshillit të Sigurimit të OKB-së.

Mes të tjerash, drejtuesi i Zyrës së Britanisë së Madhe në Prishtinë kishte deklaruar : “Askush nga Anglia e as unë nuk kemi konkurruar në këtë tender të telefonisë mobile. Mirëpo, duhet të kuptoni që rrjeti i telefonisë ka rëndësi të madhe strategjike për Kosovën dhe këtë kurrsesi nuk duhet lejuar të gjendet në duar të armiqve.

Në Amerikë e gjetiu, u shkokërdhuam duke kërkuar që ndërkombëtarët t’u japin sa më shumë kompetenca institucioneve të Kosovës. Këto kërkesa drejtuar qendrave të vendosjes nderkombëtare janë parashtruar edhe në librin “Nuk Mposhtet Shqiptari”. Duhet kuptuar që këto veprimtari i dëmtojnë interesat dhe mund të shtyjnë ose të rrezikojnë pavarësinë e Kosovës. Pra, nuk po korruptohen, nuk po spijunojnë, plaçkisin dhe neglizhojnë zbatimin e rregullave në Kosovë vetëm ndërkombëtarët! Fatkeqësisht, kundër interesave të Kosovës janë duke vepruar edhe disa “shqiptarë”! Si është e mundur që shqiptari tani të veprojë kundër Kosovës? A mund t’i shiten sot shqiptarët armikut dhe çfarë krijesash janë këto?!

Pastaj, jo shqiptare, të mjera dhe të dëmshme janë aksionet, deklaratat dhe konfrontimet në mes të disa shqiptarëve rreth lirimit të jetimes Shqipe Hebibi në Afganistan?!

Si popujve e shteteve të tjera, edhe popullit shqiptar i takon çlirim, jeta në liri, gëzimi, zhvillimi ekonomik dhe përparimet e tjera. Prandaj, duhet të kuptohet që korrupsionit, spijunazhit, plaçkitjeve e tradhtive duhet t’u jepet fund njëherë e përgjithmonë.

Dr.R.Xhema
Prishtinë, më 04 nëntor 2004