Më i mëshirshmi tregon mëshirë ndaj atyre që janë të mëshirshëm ndaj njëri-tjetrit

[Pause_Print_Scroll]

Më i mëshirshmi tregon mëshirë ndaj atyre që janë të mëshirshëm ndaj njëri-tjetrit
Shejh Muhamed Musa Nasr
Marrë nga revista "el-Esaleh", nr.21, f.17-19

Pejgamberi, salallahu alejhi ue selam, në një rast puthi el-Hasan Ibn Aliun [dmth nipin e vet] ndërsa el-Akra Ibn Habis ishte i pranishëm aty. Kështu që el-Akra i tha:"Ti i puth fëmijët tu! Pasha Allahun, unë kam dhjetë fëmijë dhe kurrë se kam puthur ndonjë prej tyre". Pejgamberi, salallahu alejhi ue selam, tha:"Ai që nuk tregohet i mëshirshëm [ndaj të tjerëve], nuk do të mëshirohet [nga Allahu]". Vërtet, mëshira në fenë tonë përfshin këtë botë dhe botën tjetër, si edhe njerëzimin, kafshët, shpezët, dhe mjediset rrethuese. Allahu thotë:


"Mëshira ime përfshin gjithçka".


Allahu e ka përshkruar veten me mëshirë dhe Ai po ashtu i ka përshkruar me këtë pejgamberët dhe robërit e drejtë të vet. Allahu thotë:


"Muhamedi është i dërguar i Allahut, dhe ata që janë me të janë të ashpër ndaj mosbesimtarëve dhe të mëshirshëm ndërmjet vete".


Allahu ka dërguar pejgamberin si mëshirë për gjithë krijimin, siç thotë Ai:


"Nuk të dërguam [O Muhamed] veçse si mëshirë për botët".


Fjala "botët" [alemiin] është e përgjithshme dhe kështu përfshin botën e njerëzve, botën e xhinëve, botën shtazore si dhe botën e shpezëve, e po ashtu edhe popujt që gjenden në tokë dhe në det.


Vërtet, Allahu ka urdhëruar që mëshira të zbatohet në gjithçka dhe në çdo vepër. Kështu, edhe kur ju therni kafshën për kurban, ju tregoni mëshirë ndaj saj duke thënë “bismilah” dhe duke mprehë shpatën [në mënyrë që vdekja të jetë e shpejtë dhe pa dhimbje]. Pejgamberi, salallahu alejhi ue selam, ka thënë:


"Vërtet, Allahu ka parashkruar mirësi [ihsan] për gjithçka. Kështu që kur të therni, bëjeni këtë në një mënyrë të mirë; kur të vritni, bëjeni këtë në një mënyrë të mirë. Dhe, secili prej jush le ta mprehë tehun dhe le ta kursejë nga vuajtja kafshën që po e prenë".


Vërtet që Allahu e fali një prostitutë nga Izraelitët, e cila tregoi mëshirë ndaj një qeni që po ngordhte nga etja. Ajo mbushi mbathjen e vet me ujë dhe duke e mbajtur gojën e qenit i dha ujë. Kështu, Allahu u tregua mirënjohës ndaj saj për çfarë ajo bëri dhe ia fali mëkatet.


Njëherë e një kohë, pejgamberi ynë, salallahu alejhi ue selam, pa njërin nga shokët e vet të kapte të voglin e një laureshe ndërsa ajo nisi të klithte mbi kokat e sahabëve. Pejgamberi, salallahu alejhi ue selam, tha:"Kush e la këtë laureshë pa të voglin e saj? Kthejani të voglin!"


Sa më shumë që njeriu të jetë i dobët dhe i varfër, aq më shumë duhet të tregojmë mëshirë ndaj tij. Dhe, të jemi të butë me të është e detyrueshme. Ky është shkaku që zoti ynë na ka ndaluar nga shtypja e jetimit. Allahu thotë:


"Ndaj, mos e shtypni jetimin dhe mos e përzini lypësin".


Pejgamberi, salallahu alejhi ue selam, ka thënë:


"Personi që përkujdeset për vejushën dhe nevojtarin është sikur muxhahidi [ai që bën xhihad] në rrugën e Allahut".


Dhe ai, salallahu alejhi ue selam, përkëdhelte kokën e jetimit dhe thoshte:


"Unë dhe kujdestari i një jetimi do të jemi kështu në parajsë - ai, salallahu alejhi ue selam, ngriti gishtin e mesëm dhe gishtin tregues".


Vërtet, ai, salallahu alejhi ue selam, na ka urdhëruar të përkujdesemi për fëmijët dhe gratë si edhe për të vjetrit. Kështu, në fjalët e tija të fundit të thëna shokëve dhe popullit të vet, ai tha:


"Namazi dhe çfarë posedon dora juaj e djathtë!" "Kini kujdes gratë [dmth bashkëshortet]!"


Dhe ai, salallahu alejhi ue selam, ka thënë:


"Më i miri prej jush është ai që është më i miri më gratë e veta, dhe unë jam më i miri me gratë prej jush".


Mëshira është diçka e brendshme, të cilën Allahu e ka vendosur në zemrat e të gjitha krijesave, madje edhe në të luanëve – më të rrezikshmëve prej tyre – ngaqë edhe ata janë të mëshirshëm ndaj të vegjëlve te vet. Megjithëkëtë Allahu është më i mëshirshëm ndaj krijesave të veta, sesa një nënë ndaj fëmijës së vet. Për këtë shkak, në ditën që krijoi mëshirën, Ai e krijoi atë në njëqind pjesë dhe i mbajti nëntëdhjetenëntë pjesë me vete, me të cilat Ai do t'i mëshirojë robërit e vet në Ditën e Gjykimit, kurse ka zbritur një pjesë në tokë, të cilën e ndajnë ndërmjet vete njerëzit dhe shtazët.


I dërguari i Allahut, salallahu alejhi ue selam, e ka dënuar personin që është i pamëshirshëm dhe që nuk arrin të bëhet i mëshirshëm. Për këtë shkak, ai, salallahu alejhi ue selam, ka thënë:


"Lidhja familjare është e lidhur për Fronin [Arshin]. Ajo thotë:'Kushdo që më ndërpret, braktise atë; kushdo që më mban, mbaj lidhjet me të".


Dhe në një transmetim:


"Vërtet, lidhja familjare do të jetë e lidhur për Fronin e më të mëshirshmit në Ditën e Gjykimit. Ajo do të thotë:'Ky është vendi për atë që ka kërkuar shpëtim tek Ti nga ndërprerja [e lidhjeve familjare]'. Allahu do t'i thotë:'A je e kënaqur që të mbaj lidhjet me atë që të mban ty dhe t'i ndërpres lidhjet me ata që të ndërpresin ty?' Ajo do të thotë:"Jam i kënaqur me këtë, o Zoti im'".


Dhe ai, salallahu alejhi ue selam, ka dënuar udhëheqësit tiranë të cilët nuk tregojnë mëshirë ndaj popullit të vet, duke thënë:


"Udhëheqësit më të këqij janë tiranët [el-Hutameh]".


Allahu e ka emëruar vetveten er-Rrahman dhe er-Rrahim, kështu që Ai është më i mëshirshmi i kësaj bote dhe i botës tjetër [dmth er-Rahman] dhe dhurues e dhënës i mëshirës [er-Rrahim]. Muslimani fillon veprimin e vet duke thënë “bismilahir-rahmanir-rahim”, që Allahu ta bekojë në veprimin e tij. Pra, çdo veprim që është i lirë nga mëshira, në të s'ka mirësi e as ndonjë të mirë. Dhe, mëshira që robërit e Allahut e shfaqin ndaj njëri-tjetrit është shkak që Allahu të zbresë mëshirë mbi ta.


Pejgamberi, salallahu alejhi ue selam, ka thënë:


"Më i mëshirshmi tregon mëshirë ndaj atyre që janë të mëshirshëm ndaj njëri-tjetrit. Trego mëshirë ndaj atyre që janë në tokë, dhe Ai që është lart në qiell do të jetë i mëshirshëm ndaj teje".


O Allah, na mëshiro neve që jemi mbi tokë dhe nën tokë, dhe na mëshiro në Ditën kur veprat tona do të të prezantohen. Dhe bëj që të jemi të mëshirshëm më njëri-tjetrin mu siç kanë qenë shokët e pejgamberit Tënd, salallahu alejhi ue selam. Dhe ki mëshirë ndaj të vdekurve tanë dhe na i bëj përgjegjës mbi ne të mëshirshmit mes robërve Tu, o Rrahman, o Rrahim!

marrur tek mburoja.net