Blerja më e madhe në historinë bankare

[Dilaver]

Konzorciumi evropian i udhëhequr nga Royal Bank of Scotland shpalli të mërkurën fitoren në betejën për blerjen e grupit bankar holandez ABN Amro. Kjo paraqet blerjen më të madhe në histori në sistemin bankar. Oferta nga konzorciumi, që pos Royal Bank of Scotland, ka në përbërje edhe grupin belgo-holandez Fortis dhe atë spanjoll Banco Santander, e kanë vlerësuar ABN Amron rreth 100 miliardë dollarë (71 miliardë euro). Konzorciumi njoftoi se rreth 86 për qind të aksionarëve të grupit holandez e kanë pranuar ofertën e tyre. Pjesa tjetër e aksionarëve, prej 14 për qind sipas konzorciumit, kanë edhe një shans që të pranojnë ofertën e tyre deri në fund të tetorit. Konzorciumi kërkon mbështetjen e 95 për qind të aksionarëve që të detyrojë pjesën minoritare të aksionarëve të pranojnë ofertën. Royal Bank of Scotland dhe partnerët e tij kanë arritur të fitojnë në betejën për ABN Amro pas largimit të rivalëve të tyre, bankës britanike Barclays, që kishe hedhur një ofertë prej 63 miliardë dollarësh.
Menaxhmenti i grupit holandez fillimisht kishte pranuar ofertën e Barclays, por më vonë e kishte tërhequr mbështetjen sepse konzorciumi i udhëhequr nga RBS kishte dhënë më shumë para. Blerja e ABN Amro nga konzorciumi fitues tejkalon dukshëm blerjen e mëparshme të një banke. Këtë rekord më parë e mbante grupi amerikan Travelers që kishte blerë CitiCorp. për 72.56 miliardë dollarë më 1998.