Dardania.de - Thaçit i kërkohet shkarkimi i ministrit të korruptuar

[CENTER][SIZE=4][COLOR=Blue][B]Thaçi nuk i demanton raportimet e "Kohës Ditore"[/B][/COLOR][/SIZE]
[/CENTER]

Kryeministri i Kosovës, Hashim Thaçi nuk ka saktësuar nëse shefi i Zyrës Civile Ndërkombëtare (ICO), Pieter Feith ka kërkuar nga ai shkarkimin e njërit ministër të kabinetit qeveritar.

Shefi i ekzekutivit të vendit ka vlerësuar se lidhur me këtë çështje nuk ka çfarë t'i shtoj deklaratës së ambasadorëve të shteteve të Quintit, të cilët kishin theksuar se ndryshimet në Qeverinë e Kosovës janë përgjegjësi e kryeministrit dhe e partnerëve të koalicionit.

Por, në të njëjtën kohë ai nuk i ka kundërshtuar as shkrimet e "Kohës Ditore" rreth kësaj teme.

[COLOR=Blue]I pyetur nga gazetarët nëse mund t'i demantojë raportet e botuara në këtë gazetë, Thaçi është përgjigjur se nuk ka çfarë t'i shtojë qëndrimit të prezantuar. [/COLOR]

Ai ka pranuar zhvillimin e takimit me shefin e ICO-së, Pieter Feith, por pa dhënë hollësi të mëtutjeshme për bisedën e zhvilluar.

"Unë zhvilloj takime të rregullta me gjithë autoritetet vendore dhe ndërkombëtare, për të punuar në agjendën tonë të përbashkët, d.m.th edhe me ambasadorët e Quintit edhe me shefin e ICO-së, edhe me shefin e EULEX-it, edhe me Presidentin Sejdiu, edhe me kryeparlamentarin dhe bisedojmë për agjendën tonë të përbashkët, atë shtetndërtuese, atë të funksionalizimit më të mirë të institucioneve dhe unë nuk kam çfarë ti shtoj më tepër sesa potencimit të cilin e ka prezantuar Quinti, se riformatizimi i qeverisë është çështje e autoritetit kushtetues të kryeministrit dhe natyrisht të partnerëve të koalicionit", ka thënë kryeministri Thaçi, pas takimit të zhvilluar me autoritetet komunale të Prizrenit.

Ai ka bërë të ditur se ndryshimet në kabinetin e tij qeveritar do të ndodhin së shpejti, por pa presionin e faktorit ndërkombëtar.

Gjatë kësaj jave, në dy artikuj, “Koha Ditore” ka raportuar se si shefi i ICO-së Feith i ka kërkuar kryeministrit Thaçi të largojë një ministër të kabinetit të tij. Ministri, largimi i të cilit është kërkuar, sipas burimeve të gazetës, është i fuqishëm politikisht dhe vjen nga një dikaster i rëndësishëm i qeverisë. Ai dyshohet për përvetësimin e dhjetëra milionë eurove.

Burimet e gazetës kanë rikonfirmuar se kryeministrit Thaçi i është dorëzuar edhe një dosje me të dhënat rreth dyshimeve për ministrin në fjalë, ndërkaq që, të njëjtën dosje e ka edhe EULEX-i. Zëdhënësi i ICO-së, Andy McGuffie pati konfirmuar tërthorazi burimet e gazetës, duke mos e mohuar kërkesën e bërë nga Feith për Thaçin.

“Korrupsioni është identifikuar si një çështje të cilën institucionet e Kosovës duhet ta trajtojnë. Kjo bëhet e ditur veçanërisht në raportin e fundit të progresit”, ka deklaruar ditë më parë McGuffie. Sipas tij, luftimi i korrupsionit kudo që ai ekziston, është me rëndësi kyç në realizimin e perspektivës evropiane të Kosovës.

Gjatë vizitës në Prizren, Thaçi ka vlerësuar se vizita e ministrit të jashtëm shqiptar, Ilir Meta në Beograd paraqet një hap pozitiv për ndërtimin e raporteve fqinjësore dhe stabilitetin në rajon, që do të reflektohet veçanërisht në raportet Serbi-Kosovë. Sipas Thaçit, kjo vizitë do të lehtësojë procesin e njohjes së Kosovës nga Serbia.
[COLOR=Red][B]Koha.net[/B][/COLOR]