Dardania.de - Gruaja e forte apo viktime

Dardania.de (https://www.dardania.de/vb/upload/index.php)

- Gruaja dhe Familja (https://www.dardania.de/vb/upload/forumdisplay.php?f=143)

- - Gruaja e forte apo viktime (https://www.dardania.de/vb/upload/showthread.php?t=32517)

Gruaja e forte apo viktime

Ndarja e djalit me gruan, Familjen Thaçi e la pa shtëpi. Gjykata Komunale në Prishtinë vendosi që njëri kat t’i takojë gruas së shkurorëzuar. Familja kundërshton, pasi sipas tyre, patundshmëria nuk është ndarë ligjërisht. Por, kjo s’i bindi autoritetet. Policia të mërkurën i nxori ata në rrugë.

Nuk arritën ta mbarojnë as kafjallin. Familja Thaçi nga Prishtina, me teshë e plaçka, të mërkurën në mëngjes u dëbua nga shtëpia. Këtë familje që jeton në rrugën “Hajrullah Abdullahu” në kryeqytet, me mëngjes e vizitoi Policia e Kosovës. Urdhri ishte i prerë.

Shtëpia duhej liruar. E krejt kjo u bë për shkak të nuses së tyre të madhe, Haxhere Jusufit, ish-bashkëshorte e djalit të tyre të madh, Adem Thaçi. Ky i fundit së bashku me babanë Isufin dhe vëllanë më të ri, Bajramin, që nga e premtja gjenden në burgun e Pejës. Ata janë dënuar nga Gjykata Komunale e Prishtinës me nga 20 ditë paraburgim për, siç është thënë, “pengim të personit zyrtar në detyrë zyrtare”.

Sherri ndërmjet familjes Thaçi dhe ish-nuses së tyre, Haxhere Jusufit, ka filluar kur Gjykata Komunale në Prishtinë ka vendosur që një kat i shtëpisë t’i takojë Haxheres, e cila tashmë është e shkurorëzuar nga Adem Thaçi. Por familja e Isuf Thaçit po e kundërshton këtë vendim me arsyetimin se shtëpia është në emër të Isufit (ish-vjehrrit të Haxheres) dhe ajo nuk ka të drejtë pronësie. Pavarësisht kësaj, gjykata ka vendosur që një kat i shtëpisë pesëkatëshe t’i takojë Haxheres dhe dy djemve të saj, njëri 20 e tjetri 16 vjeç.

Derisa Rikia, bashkëshortja e Isuf Thaçit, të zotit të shtëpisë, kishte udhëtuar për në Pejë për t’i vizituar bashkëshortin dhe djemtë, të cilët gjenden në paraburgim, anëtarët e tjerë të familjes morën çka mundën nga shtëpia dhe dolën të mërkurën jashtë. Në mungesë të Isufit, në shtëpi me familjen po rrinte Lutfi Thaçi, vëllai i tij, së bashku me motrën. Por edhe ata u përzunë nga policia, e cila zbatoi urdhrin e gjykatës.

Expressi ishte në vendin e ngjarjes në kohën kur policia urdhëroi anëtarët e familjes Thaçi që ta lirojnë shtëpinë. Vëllai i Isuf Thaçit, motra e tij, vajza dhe reja tjetër me një fëmijë, i morën valixhet dhe dolën nga shtëpia. Ata mendojnë që të shkojnë te të afërmit e tyre për të fjetur, derisa nuk gjendet ndonjë zgjidhje tjetër.

Së bashku me ta, nga shtëpia u desh të largohej edhe një fëmijë, i cili ishte bërë operacion para disa ditësh. Nëna e tij, nga ngutia, harroi ta marrë djepin për të. Për këtë arsye, atyre iu desh që sërish ta thërrasin policinë, sepse pronarja e re, Haxhere Jusufi, nuk ua hapte derën. Expressi trokiti në derën që ajo e mban gjithnjë me çelës, por kur pa se kush janë, e mbylli derën me forcë. E vetmja mënyrë komunikimi që ajo bën me të tjerët, përveç me fëmijët e saj, është nëpërmjet policisë.

Këta të fundit nuk lejojnë asnjë të huaj që të hyjë në katin e shtëpisë ku jeton Haxhere Jusufi, ndërsa ajo u ka thënë atyre se nuk dëshiron të flasë për media. Por familja me të cilët kishte jetuar për shumë vjet, nuk përtojnë të flasin. Ata fajësojnë ish-nusen e tyre dhe thonë se nuk i takon asgjë prej pasurisë, sepse prona është në emër të Isuf Thaçit, ish-vjehrrit të Haxheres. Lutfi Thaçi është i revoltuar nga siç thotë ai, kjo sjellje e policisë dhe gjykatës. “I morën në qafë edhe fëmijët e vegjël”, thotë Lutfiu. Ky burrë me prejardhje nga Llapushniku i Drenicës fajëson sistemin e drejtësisë në vend që, sipas tij, është i korruptuar.

“Na qitën prej shtëpisë krejt familjen, pa bërë asgjë. Ajo e ka masën mbrojtëse prej gjykate. Gjyqi është i korruptuar”, thotë Lutfi Thaçi. Ndërsa gratë e familjes nuk lënë të zezë pa thënë për ish-nusen e tyre. Ato tregojnë se ajo është e rrezikshme dhe se shumë herë ka dashur ta therë me thikë ish-vjehrrën e saj. Derisa të merret vendimi i Shkallës së Dytë, familjes Thaçi do t’i duhet të jetojë sa më larg shtëpisë ku jeton tashmë Haxhere Jusufi.

Për avokatin e kësaj familjeje, vendimi i gjykatës është i padrejtë. Avokatja Fehmije Gashi-Bytyqi tha për Express se Gjykata Komunale ka marrë një vendim të padrejtë që detyron tërë familjen ta lirojë shtëpinë.

“Ajo nuk ka pronë mbi shtëpinë, nuk është as pronare, e gjykata thirret në pronësi. Në këtë rast, nuk është shqyrtuar fare trashëgimia dhe nuk e di se nga gjykata ka gjetur bazën që t’ia kalojë pronën në pronësi një personi që nuk bën pjesë në trashëgimi”, thotë avokatja Gashi-Bytyqi.

Sidoqoftë, avokatja thotë se vendimi mund të sjellë ndonjë pasojë edhe më të madhe, siç edhe kanë ndodhur në raste të tjera. Ajo sqaron se ka tre muaj që familja Thaçi ia ka paguar Haxheres së shkurorëzuar një banesë me qira, por ajo nuk ka pranuar të jetojë atje.

Megjithëkëtë, Haxhere Jusufi vetëm se po e zbaton vendimin e gjykatës, ndërsa policia urdhrat që i janë dhënë nga gjykata. Policët që ishin në vendin e ngjarjes nuk duan të përzihen në çështjet e tjera, por kanë obligim që urdhrin e gjykatës ta zbatojnë. “Pronarja e ka masën mbrojtëse dhe urdhri është që familja të jetë larg saj”, tha një polic të mërkurën.