Shtesa dhe ndryshime per TVSH.
 

[CENTER][B]LIGJ

Nr.9712, datë 16.4.2007



PËR DISA NDRYSHIME DHE SHTESA NË LIGJIN NR.7928, DATË 27.4.1995 “PËR TATIMIN MBI VLERËN E SHTUAR”, TË NDRYSHUAR
[/B] [/CENTER]



Në mbështetje të neneve 78, 83 pika 1 dhe 155 të Kushtetutës, me propozimin e Këshillit të Ministrave,



[CENTER][B]KUVENDI[/B]

[B]I REPUBLIKËS SË SHQIPËRISË[/B]



[B]VENDOSI:[/B]
[/CENTER]



Në ligjin nr.7928, datë 27.4.1995 “Për tatimin mbi vlerën e shtuar”, të ndryshuar, bëhen këto ndryshime dhe shtesa:



[CENTER][B]Neni 1[/B]
[/CENTER]



Pika 3 e nenit 20 “Toka dhe ndërtesat” ndryshohet si më poshtë:

“3. Dhënia me qira e ndërtesave është furnizim i përjashtuar, përveç rasteve:

a) të dhënies me qira për një periudhë jo më shumë se dy muaj;

b) të strehimit në hotele ose vende pushimi.”.



[CENTER][B]Neni 2[/B]
[/CENTER]



Neni 22 “Banka e Shqipërisë” ndryshohet si më poshtë:



[CENTER][B]“Neni 22[/B]
[/CENTER]

Bankat



Furnizimi i arit nga Banka e Shqipërisë dhe bankat e nivelit të dytë, si dhe i bankënotave dhe i monedhave nga Banka e Shqipërisë është furnizim i përjashtuar.”.



[CENTER][B]Neni 3[/B]
[/CENTER]



Pas pikës 4 të nenit 26 “Importimi i mallrave” shtohen pikat 5 e 6 me këtë përmbajtje:

“5. Vlera e tatueshme për arin e përpunuar, të importuar, përcaktohet sipas pikave 3 e 4 më lart, pa përfshirë vlerën e arit të përdorur si lëndë e parë. Mënyra e llogaritjes së vlerës së arit të përdorur si lëndë e parë përcaktohet me udhëzim të Ministrit të Financave, në zbatim të këtij ligji. 6. Operatorët e telefonisë celulare do të vazhdojnë të ofrojnë shërbimet e tyre për të gjitha kartat SIM dhe numrat IMEI të aparateve celulare, që janë në përdorim në datën 1 tetor 2007. Me hyrjen në fuqi të këtij ligji, duke filluar nga data 1 tetor 2007, operatorët e telefonisë celulare do të ofrojnë shërbimet e tyre vetëm për numrat IMEI të aparateve celulare, për të cilat importuesit apo zotëruesit e tyre kanë ndjekur procedurën e mëposhtme:

a) importuesit e aparateve telefonike celulare, në çastin e deklarimit dhe të pagesës së detyrimeve fiskale pranë shërbimit doganor, duhet të deklarojnë edhe listën e numrave IMEI të aparateve të importuara;



b) individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është mbi minimumin e patatueshëm, të vendosur me ligj, ndjekin të njëjtën procedurë si në shkronjën “a” të kësaj pike;

c) individët, të cilët, në çastin e hyrjes në doganë, zotërojnë aparate celulare, që futen për herë të parë në Shqipëri, vlera e të cilave është nën minimumin e patatueshëm, të vendosur me ligj, duhet të plotësojnë dhe të dorëzojnë pranë shërbimit doganor një deklaratë individuale për numrin IMEI të aparatit telefonik celular.

Shërbimi doganor njofton zyrtarisht operatorët e telefonisë celulare për numrat IMEI, të deklaruar nga importuesit dhe individët, në përputhje me shkronjat “a”, “b” dhe “c” të kësaj pike. Forma e deklarimit të numrave IMEI nga importuesit dhe individët përcaktohet me udhëzim të Ministrit të Financave.”.



[CENTER][B]Neni 4[/B]
[/CENTER]



Pas nenit 27/1 shtohet neni 27/2 me këtë përmbajtje:



[CENTER][B]“Neni 27/2[/B]
[/CENTER]

Furnizimi i arit të përpunuar



Vlera e tatueshme e arit të përpunuar, të furnizuar brenda vendit, nuk përfshin vlerën e arit të përdorur si lëndë e parë. Mënyra e llogaritjes së vlerës së arit, të përdorur si lëndë e parë, përcaktohet me udhëzim të Ministrit të Financave.”.



[CENTER][B]Neni 5[/B]
[/CENTER]



Pika 8 e nenit 36 “Faturat” shfuqizohet.



[CENTER][B]Neni 6[/B]
[/CENTER]



Ky ligj hyn në fuqi 15 ditë pas botimit në Fletoren Zyrtare.



Shpallur me dekretin nr.5287, datë 8.5.2007 të Presidentit të Republikës së Shqipërisë, Alfred Moisiu

[CENTER][B]UDHËZIM

Nr.3, datë 26.2.2007



PËR DISA SHTESA DHE NDRYSHIME NË UDHËZIMIN NR.3, DATË 30.1.2006 TË MINISTRIT TË FINANCAVE "PËR TATIMIN MBI VLERËN E SHTUAR"
[/B][/CENTER]


Në mbështetje të nenit 102 pika 4 të Kushtetutës dhe në zbatim të ligjit nr.7928, datë 27.4.1995 "Për tatimin mbi vlerën e shtuar", i ndryshuar, Ministri i Financave



[B][CENTER]UDHËZON:[/CENTER][/B]



1. Në përmbajtjen e udhëzimit nr.3, datë 30.1.2006 të Ministrit të Financave, në pikën 16.1 "Rimbursimi i eksportuesve", bëhen shtesat dhe ndryshimet si vijon:

- Në përmbajtjen e paragrafit të parë, nënparagrafët e dytë, të tretë dhe të katërt shfuqizohen.

- Në përmbajtjen e paragrafit të parë, mbas nënparagrafit të parë, shtohet një nënparagraf me përmbajtjen si vijon:

"Teprica kreditore, që kërkohet si e rimbursueshme, duhet të jetë më shumë se 400.000 lekë.".

- Paragrafi i dytë shfuqizohet.

- Mbas paragrafit të pestë, shtohen dy paragrafë me këtë përmbajtje:

"Eksportuesve me risk zero, për shumat deri në 400.000 lekë, rimbursimi u bëhet në mënyrë automatike, me paraqitjen e kërkesës në degën e tatimeve.

Për kategoritë e tjera, rimbursimi i eksportuesve bëhet brenda 30 ditëve nga data e paraqitjes së kërkesës së tyre.".

2. Ky udhëzim hyn në fuqi me botimin në Fletoren Zyrtare.


[B]
MINISTRI I FINANCAVE

Ridvan Bode[/B]

[B][CENTER]UDHEZIM

Nr.8, datë 5.6.2007



Për një ndryshim në udhëzimin nr.3, datë 30.1.2006 “Për tatimin

mbi vlerën e shtuar”[/CENTER][/B]



Në mbështetje të nenit 102 pika 4 të Kushtetutës së Republikës së Shqipërisë, si dhe në zbatim të ligjit nr.7928, datë 27.4.1995 “Për tatimin mbi vlerën e shtuar”, të ndryshuar, Ministri i Financave



[B][CENTER]Udhëzon:[/CENTER][/B]



Në udhëzimin nr.3, datë 30.1.2006 “Për tatimin mbi vlerën e shtuar” bëhen këto ndryshime:

1. Në pikën 1.1 “Detyrimi për të kërkuar regjistrimin”, paragrafi i parë shfuqizohet dhe zëvendësohet me paragrafin e formuluar si më poshtë:

“ Çdo person fizik apo juridik që zhvillon veprimtari ekonomike, qarkullimi i të cilit tejkalon apo parashikohet të tejkalojë 8 milionë lekë për një vit kalendarik, ose do të kryejë veprimtari në fushën e importit, detyrohet të kërkojë të regjistrohet.”.

2. Pika 7.9.3 “Skema e shtyrjes së pagesës së TVSH-së”, shfuqizohet dhe zëvendësohet me pikën 7.9.3 të formuluar si më poshtë:

“7.9.3 Skema e shtyrjes së pagesës së TVSH.

Me ligjin nr.9597, datë 27.7.2006, ndryshohet pika 2.1 e nenit 26 të ligjit nr.7928, datë 27.4.1995 “Për tatimin mbi vlerën e shtuar”. Për makineritë dhe pajisjet e importuara nga personat e tatueshëm, në funksion të veprimtarisë së tyre ekonomike, pavarësisht llojit të saj, zbatohet skema e shtyrjes së pagesës së TVSH-së për një periudhë deri në gjashtë muaj, sipas së cilës TVSH-ja nuk paguhet në doganë në çastin e importit.

I. Skema e shtyrjes së pagesës së TVSH-së për importimin e makinerive e të pajisjeve.

Kjo skemë zbatohet për makineritë dhe pajisjet e importuara nga personat e tatueshëm, të regjistruar si tatimpagues të tatimit mbi vlerën e shtuar. Kusht është që importi i kryer të jetë në funksion të veprimtarisë ekonomike të personit të tatueshëm dhe nuk kushtëzohet nga lloji i saj.

Përsa i përket kuptimit të termave, jepen përcaktimet e mëposhtme:

- “Makinë”, çdo konstruksion, i krijuar prej njeriut, që, duke marrë energji në një formë të përshtatshme dhe udhëzimet e duhura, është në gjendje të kryejë punë.

-“Linjë teknologjike”, tërësia e makinerive, pajisjeve dhe instalimeve të ndryshme, të lidhura ndërmjet tyre, që bëjnë të mundur realizimin e një procesi teknologjik.

- “Proces teknologjik”, tërësia e metodave, që duhen të ndiqen, hap pas hapi, për të bërë të mundur arritjen e qëllimit, për të cilin bëhet investimi përkatës.

- “Pajisje”, pajisjet dhe aparaturat, që shërbejnë si plotësuese të makinerive dhe që ndihmojnë për funksionimin e rregullt të tyre, si dhe për matjen dhe kontrollin e parametrave të punës.

1.1 Kushte të përgjithshme

Pagesa e TVSH-së shtyhet deri në gjashtë muaj nga çasti i kryerjes së importit.

Ky afat mund të jetë më i shkurtër, kur:

- nga vetë personi i tatueshëm, kërkohet të bëhet pagesa në një çast më të hershëm se mbarimi i periudhës gjashtëmujore;

- personat e tatueshëm importojnë makineri me qëllim shitjen e tyre te persona të tretë. Pagesa e TVSH-së nga këta persona shtyhet deri në periudhën tatimore (muajin) në të cilën bëhet edhe shitja e makinerive.

Personi i tatueshëm, përfitues i kësaj skeme, paraqet në organin doganor dokumentacionin e nevojshëm justifikues, shoqërues të makinerive e pajisjeve të importuara, bazuar në kërkesat e legjislacionit doganor.

Vlera e tatueshme e makinerive dhe e pajisjeve të importuara përcaktohet në përputhje me dispozitat e legjislacionit, doganor dhe tatimor, pavarësisht nëse makineritë e pajisjet e importuara janë apo jo të taksueshme me taksa doganore. Kjo vlerë përfshin, gjithashtu:

a) shpenzimet e transportit e të sigurimit dhe shpenzimet e tjera, të përfshira në importimin e makinerive e të pajisjeve, deri në çastin e hyrjes në territorin e Republikës së Shqipërisë;

b) tarifat, taksat dhe detyrimet e pagueshme, si pasojë e eksportimit të këtyre makinerive e pajisjeve nga shtete, prej të cilave ato eksportohen, apo të pagueshme si rezultat i importimit të tyre, përveç TVSH-së së pagueshme.

Organi doganor, pasi përcakton vlerën e tatueshme të makinerive dhe të pajisjeve, me të gjitha elementet përbërëse të saj, zbaton mbi këtë vlerë shkallën tatimore të TVSH-së, e cila është në fuqi në çastin e importimit të makinerive e pajisjeve.

TVSH-ja e llogaritur nga organi doganor nuk paguhet nga personi i tatueshëm në çastin e zhdoganimit të makinerive e pajisjeve të importuara; ajo paguhet nga personi i tatueshëm importues, brenda gjashtë muajve nga çasti i importimit të makinerive dhe pajisjeve. Pagesa e saj bëhet për llogari të degës doganore, ku janë kryer procedurat e importit.

1.2 Personat e tatueshëm importues

a) persona që importojnë makineri e pajisje, për investim për veprimtarinë e tyre

Në çastin e importit të makinerive e pajisjeve për t’u investuar, personit të tatueshëm që importon për të investuar, i lëshohet deklarata doganore (DAV) e importit (IM4) me një numër regjistrimi R. Në kutinë nr.37 të DAV-it, është vendosur kodi shtesë 991 për (shtyrjen e pagesës së TVSH-së për makineri e pajisje).

Në kutinë nr.47 (llogaritja e detyrimeve) të DAV-it, kolona MP, në zërin TVSH shënohet 2, që nënkupton mospagimin e TVSH-së në çastin e importimit. Kështu në totalin e detyrimeve që duhen paguar paraqitet vetëm shuma e detyrimeve doganore.

Në momentin e pagesës së TVSH-së printohet DAV-i, versioni i fundit i deklaratës, e cila ka të njëjtin numër regjistrimi R dhe në kutinë 37 do të jetë kodi shtesë 003 për (pagesën e TVSH-së për makineri e pajisje për investime).

Në kutinë nr.47 (llogaritja e detyrimeve) të DAV-it, kolona MP, në zërin TVSH shënohet 1, që nënkupton pagimin e TVSH-së.

Ky dokument, versioni i fundit, është edhe dokumenti justifikues i importit i vlefshëm për regjistrimet e mëtejshme për efekt të TVSH-së.

Data e pagesës së TVSH-së në doganë, e paraqitur në dokumentin justifikues që përmendëm, përcakton edhe periudhën tatimore (muajin), në të cilën pesoni i tatueshëm e regjistron (vetëm për qëllim të mbajtjes së dokumentacionit për TVSH) dhe deklaron TVSH-në si të zbritshme pranë organeve tatimore.

Regjistrimi në librin e blerjeve të TVSH-së, i vlerës së makinerive e pajisjeve, si dhe TVSH-së së zbatuar në import, bëhet në periudhën tatimore (muajin), që është paguar TVSH-ja në import.

Për çdo regjistrim vendoset dukshëm, në çastin e kryerjes së importit, shënimi “Import me shtyrje pagese të TVSH-së, referuar deklaratës doganore nr.____/datë____”.

Në formularin e deklarimit dhe të pagesës së TVSH-së, të kësaj periudhe tatimore, vlera e tatueshme e makinerive dhe e pajisjeve dhe TVSH-ja, e llogaritur dhe e paguar për importin e tyre, raportohen përkatësisht në rubrikat e importit (14) dhe (15).

b) Personat e tatueshëm, që importojnë makineri për t’i shitur

Këta persona nuk paguajnë TVSH në doganë për makineritë e përcaktuara në aneksin, që i bashkëlidhet vendimit të Këshillit të Ministrave nr.559, datë 16.8.2006.



Personat e tatueshëm, që importojnë makineri për furnizimin e personave të tretë, kanë të drejtë të përfitojnë nga skema e shtyrjes së pagesës së TVSH-së deri në periudhën tatimore (muajin), në të cilin bëjnë shitjen e tyre, por jo më vonë se gjashtë muaj nga çasti i importimit.

Në çastin e importit të makinerive, personit të tatueshëm i lëshohet deklarata doganore (DAV) e importit (IM4) me një numër regjistrimi R. Në kutinë nr.37 të DAV-it është vendosur kodi shtesë 992 për (shtyrjen e pagesës së TVSH-së së makinerive për shitje).

Në kutinë nr.47 (llogaritja e detyrimeve) të DAV-it, kolona MP, në zërin TVSH shënohet 2, që nënkupton mospagimin e TVSH-së në çastin e importimit. Kështu në totalin e detyrimeve që duhen paguar praqitet vetëm shuma e detyrimeve doganore.

Në të njëjtën periudhë tatimore (muaj) kur personi i tatueshëm shet makineritë e importuara, detyrohet të paguajë TVSH-në, për importin e tyre, në degën e doganës ku është bërë importi.

Në momentin e pagesës së TVSH-së printohet DAV-i, versioni i fundit i deklaratës e cila ka të njëjtin numër regjistrimi R dhe në kutinë 37 do të jetë kodi shtesë 004 për (pagesën e TVSH-së për makineri për t’u shitur).

Në kutinë nr.47 (llogaritja e detyrimeve) të DAV-it, kolona Mp, në zërin TVSH shënohet 1, që nënkupton pagimin e TVSH-së.

Ky dokument, versioni i fundit, është edhe dokumenti justifikues i importit i vlefshëm për regjistrimet e mëtejshme për efekt të TVSH-së.

Data e pagesës së TVSH-së në doganë, e paraqitur në dokumentin justifikues që përmendëm, përcakton edhe periudhën tatimore (muajin), në të cilën personi i tatueshëm e regjistron (vetëm për qëllim të mbajtjes së dokumentacionit për TVSH) dhe deklaron TVSH-në si të zbritshme pranë organeve tatimore.

Regjistrimi në librin e blerjeve të TVSH-së, i vlerës së makinerive e pajisjeve, si dhe TVSH-së së zbatuar në import, bëhet në periudhën tatimore (muajin), që është paguar TVSH-ja në import.

Për çdo regjistrim vendoset dukshëm, në çastin e kryerjes së importit, shënimi “Import me shtyrje pagese të TVSH-së, referuar deklaratës doganore nr.____/datë____”.

Në formularin e deklarimit dhe të pagesës së TVSH-së, të kësaj periudhe tatimore, vlera e tatueshme e makinerive dhe TVSH-ja, e llogaritur dhe e paguar për importin e tyre, raportohen përkatësisht në rubrikat e importit (14) dhe (15).

c) Personat që importojnë pajisje me qëllim për t’i shitur

Për importin e pajisjeve me qëllim shitjeje nuk zbatohet skema e shtyrjes së pagesës së TVSH-së.

Në çastin e importit të pajisjeve, bëhet edhe pagesa e TVSH-së në doganë lidhur me këtë import.

Regjistrimet e mëtejshme bëhen njëlloj si ato të importeve të zakonshme të mallrave.

[B](vazhdon)[/B]

3. Pika 7.12 “Importuesit e vegjël” shfuqizohet.

4. Paragrafi i dytë i shkronjës a, në pikën 15.2, shfuqizohet dhe zëvendësohet me paragrafin e formuluar si më poshtë:

“Me autorizim me shkrim nga Drejtoria e Përgjithshme e Tatimeve, kur gazoili i domosdoshëm për të ushtruar veprimtari ekonomike zë një peshë të konsiderueshme në shpenzimet e bëra nga personi i tatueshëm. Në këtë rast personi i tatueshëm paraqet kërkesë me shkrim në degën përkatëse të tatimeve. Kërkesa shoqërohet me të dhënat e nevojshme për të gjykuar mbi situatën tatimore të personit të tatueshëm, si konsumi mesatar mujori i gazoilit, inventari i makinerive ose mjeteve të transportit, pagesa e taksave për makineritë dhe mjetet e transportit, pagesa e detyrimeve të tjera tatimore (TVSH, tatim mbi fitimin) për vitin në të cilin bëhet kërkesa dhe vitin paraardhës, si dhe një vërtetim për shlyerjen e të gjitha detyrimeve tatimore dhe kontributet nga dega e tatimeve ku personi është regjistruar.

Kërkesa së bashku me dokumentet shoqëruese dërgohet nga personi i tatueshëm në Drejtorinë e Përgjithshme të Tatimeve. Drejtoria e Përgjithshme e Tatimeve brenda 30 ditëve nga data e protokollimit të kërkesës, lëshon ose jo autorizmin për lejimin e kreditimit dhe e dërgon atë zyrtarisht, një kopje në adresë të personit të tatueshëm dhe një kopje degës së tatimeve ku personi i tatueshëm është regjistruar. Autorizimet e lëshuara nga Drejtoria e Përgjithshme e Tatimeve evidentohen në një regjistër të veçantë.”.

5. Ky udhëzim hyn në fuqi me botimin në Fletoren Zyrtare.



[B]Ministri i Financave

Ridvan Bode[/B]