Dardania.de - Schmitt: Kosova është një shtet i dytë Shqiptar

[I]Historiani i njohur zviceran, Oliver Jens Schmitt, tha se Kosova është një shtet i dytë shqiptar dhe jo një shtet shumetnik. “Deshëm apo nuk deshëm ta pranojmë ky është fakt”, tha Schmitt në një intervistë për mediat zvicerane.[/I]
Ai po ashtu vlerësoi se Serbia nuk mund të pranohet në Bashkimin Evropian, pa pranuar fajin dhe përgjegjësinë për luftërat e shkaktuara.

Historiani dhe eksperti zviceran për çështjen e Ballkanit në një intervistë për numrin e sotëm të gazetës me tirazhin më të madh në Zvicër, Neue Zürcher Zeitung, tha se është i pa mundur krijimi i një Kosove multi-etnike ashtu siç e parashikon Kushtetuta e vendit.

“Për të ndërtuar një shtet multi-etnik në Kosovë duhet hequr dorë nga historia duke kthyer vitin zero. Deshëm ne apo nuk deshëm Kosova është një shtet i dytë shqiptar, ndërkohë që po rriten tendencat për bashkim. Fuqitë e mëdha janë në fakt kundër këtij bashkimi, mirëpo në planin afatgjatë ata nuk mund ta pengojnë këtë proces të natyrshëm që mund të krahasohet me bashkimin e Moldavisë me Rumaninë në vitin 1861, apo bashkimin e Bullgarisë në vitin 1885’, vlerësoi ai.

Sipas Schmittit, falë autostradës së ndërtuar Tirana dhe Prishtina do të intensifikojnë bashkëpunimin, ndërsa revolucioni i quajtur internet ka sforcuar dukshëm diskursin nacional mes shqiptarëve.

Lidhur me Serbinë ai deklarohet kundër pranimit të saj në Bashkimin Evropian pasi ende nuk është shkëputur nga e kaluara. “Është e papranueshme të integrosh një shkaktar të konfliktit pa e pranuar fajin dhe përgjegjësinë për luftërat e shkaktuara”, tha historiani Schmitt. /rtk/