[Shqiptare]

Askush nuk shpëton nga sprovat

Kur sprovohen në mënyrë të tillë besimtarët dhe të përqendruarit në fenë e Allahut, atëherë të mos u shkoj nëpër mend jobesimtarëve, injorantëve dhe atyre që pasojnë epshet, se do të shpëtojnë nga sprovat, dhimbjet dhe mundimet, të cilat nuk ka dyshim se për ata do të jenë shumë e shumë më të mëdha nga ato të besimtarëve. Allahu thotë:
"Elif, Lam, Mim. A mendojnë njerëzit se do të lihen pa u trazuar ngaqë thonë: ‘Ne besojmë’ dhe nuk do të sprovohen?
Dhe sigurisht që Ne i sprovuam ata të cilët ishin para tyre. Dhe vërtet që Allahu do ta bëjë të njohur (të vërtetën e) atyre që janë të vërtetë dhe (po kështu) vërtet që Allahu do ta bëjë të njohur (gënjeshtrën e) atyre që janë gënjeshtarë (edhe pse Allahu di gjithçka para se t’i vërë ata në provë). Apo ata që bëjnë poshtërsi, a mos mendojnë se ata mund të na kalojnë Ne (pa u dënuar nga Ndëshkimi Ynë)? Sa i lig është gjykimi i tyre! Kushdo që shpreson për Takimin me Allahun dhe sigurisht që Përcaktimi i Allahut po vjen. Dhe Ai është Gjithëdëgjuesi, i Gjithëdituri. Dhe kushdo që përpiqet, ai përpiqet vetëm për veten e vet. Sigurisht që Allahu është i Lirë nga çdo nevojë për askënd në univers."Ankebut, 1-6.
Ibn Kajim el Xheuzije -Allahu e mëshiroftë!- thotë në lidhje me komentimin e këtij ajeti: "Allahu i Madhëruar në këtë sure ka përmendur se Ai patjetër do t’i sprovojë robërit e Tij, në mënyrë që të dallohet i drejti nga gënjeshtari, besimtari nga qafiri, ai që e falënderon dhe e adhuron Atë të vetëm, nga ai i cili e lë pas dore adhurimin e Tij dhe adhuron në vend të Tij të tjerët. Ai në këtë sure ka treguar për gjendjen e tyre në këtë botë dhe ato që i presin në botën tjetër. Më pas Ai tregon gjendjen e prijësve në sprova, profetëve dhe pasuesit e tyre dhe atë që do të përfitojnë ata në botën tjetër. Ndërsa ata të cilët pretendojë se besojnë dhe që mendojnë se nuk sprovohen, Ai i ka qortuar duke u bërë të ditur se nuk është ajo që ata mendojnë Urtësia e Tij tek krijesat…
Po ashtu Ai ka qortuar edhe ata të cilët nuk e besojnë Atë dhe të dërguarit e Tij nga frika se mos vihen në sprovë, duke menduar se me këtë që po veprojnë po shpëtojnë nga sprovat. Por këta njerëz janë të pavëmendshëm ndaj sprovave, të cilat i kërcënojnë ata, vërtetë se para tij gjenden sprova, mundime e dënim shumë herë më shumë nga ato prej të cilave ai është larguar.
Njerëzit, pas ardhjes së profetëve, janë mes dy zgjedhjesh: ose të thonë besuam, ose të thonë nuk besuam dhe të vazhdojnë në kundërshtimin e Zotit të tyre. Ata që thonë besuam do t’i sprovojë Allahu, në mënyrë që sprovat të nxjerrin në pah besimin dhe përqendrimin e tij në fenë e Allahut. Ndërsa ata të cilët nuk besojnë të mos mendojnë se me mohimin e tyre ata do të shpëtojnë, përkundrazi ata to t’i kapin sprova dhe mundime shumë herë më të mëdha se sprovat e besimtarëve…
Patjetër që çdo person do të sprovohet, besimtarë apo jobesimtarë qoftë, porse besimtari përjeton mundime dhe dhimbje në këtë botë më pas ato mbarojnë e në botën tjetër ato kthehen në kënaqësi. Ndërsa jobesimtari përjeton kënaqësi në fillim (pra në këtë botë) pastaj ato ndërpriten dhe menjëherë pas tyre ai nuk do të përjetojë vetëm se dhimbje, mundime e dënim të pa imagjinueshëm.” Shefau el-Alil 345-346.
Allahu për këtë thotë në Kuran:
"Jo, por (ju njerëz) e doni shumë jetën e shpejtë të kësaj bote. Dhe e lini pas shpine të Pastajmen (Ahiretin). Disa fytyra atë Ditë do të jenë që shkëlqejnë, duke parë Zotin e tyre. Dhe disa fytyra do të jenë të nxira, (të zymta, të mjeruara), Duke menduar se ndonjë fatkeqësi shkatërruese është duke u rënë sipër. Por kur të arrijë (shpirti) tek fyti (te gryka, në dalje e sipër), Dhe kur të thuhet (nga të afërmit): ‘Kush mund ta shërojë dhe ta shpëtojë atë nga vdekja?’ Dhe ai (që po jep shpirt) do ta kuptojë më në fund se ishte ndarja (koha e vdekjes); Dhe t’i bashkohen këmbët me njëra-tjetrën. Drejtimi atë Ditë do të jetë drejt Zotit tënd (Allahut)! Kështu pra, ai (mosbesimtari) as nuk besoi, as nuk u fal (në namaz)! Por përkundrazi, ai përgënjeshtroi dhe ktheu shpinën. Pastaj shkonte gjithë krenari drejt familjes së vet duke i pëlqyer vetja. Mjerë për ty (o njeri mosbesimtar)! Dhe pastaj (prapë) mjerë për ty! Përsëri mjerë për ty (o njeri jobesimtar)! Dhe pastaj (prapë) mjerë për ty"! Kijame, 20-35.
Pra Allahu i Madhëruar ka qartësuar në këto ajete përfundimin e besimtarëve dhe të atyre të cilët ia kthyen shpinën Allahut dhe pëlqyen jetën e kësaj bote para ahiretit. Ndaj le t’i bëj apel çdokush prej nesh vetvetes së tij dhe ta pyesë atë se kë nga këto dy përfundime dëshiron?
Si përfundim, meqenëse njerëzit besimtarë qofshin apo jo do të vihen në sprovë e do të kenë mundime, atëherë lum për atë i cili zgjedh të jetë besimtar dhe të sprovohet e mundohet në këtë dynja, me sprova e mundime kalimtare dhe mjerë për atë që zgjedh mos bindjen ndaj Allahut dhe sprovat e mundimet e jetës tjetër që janë të përjetshme e pa fund.
Një herë një çifut i varfër dhe i vobektë pa një dijetar musliman të pasur që kishte hipur në një kalë të stolisur dhe i tha:
-Ç’është me ju xhanëm, besoni se Muhamedi, profeti juaj ka thënë: "Dynjaja është burg për besimtarin (musliman) dhe xhenet për qafirin." (Muslimi), kurse ti je në bollëk e unë i varfër e në gjendje të mjerueshme, të lutem si ta kuptoj një gjë të tillë? Dijetari me qetësi ia ktheu:
-Të vërtetën ka thënë Profeti ynë, kjo begati që jam unë në krahasim me atë që i është përgatitur besimtarit në xhenet nuk llogaritet, prandaj dhe ai është në këtë botë si në burg, ndërsa gjendja që ti je tani në krahasim me atë që i ka përgatitur Allahu jobesimtarëve është si të ishe në xhenet.
E lusim Allahun të na bëjë besimtarë të denjë, të na bëjë prej atyre të cilët sprovat nuk u sjellin vetëm se të mira, siç ka thënë Profeti (Paqja dhe bekimi i Allahut qofshin mbi të!): "E habitshme është çështja e besimtarit! Vërtet çështja e tij është e gjitha mirësi dhe një gjë e tillë nuk është vetëm se për të. Atij nëse i vjen ndonjë mirësi, ai falënderon dhe kjo është dobi për të, por edhe nëse i vjen ndonjë fatkeqësi dhe ai bën durim sigurisht që edhe kjo është dobi për të." (Muslimi, 2999)
Betohem në Allahun se Profeti ka thënë të vërtetën. Nëse besimtarit i dhurohen mirësi dhe ai është falënderues ndaj Allahut, sigurisht që Ai do t’ia shtojë atij mirësitë, por nëse e godasin fatkeqësitë dhe ai duron atëherë ato janë shlyerje gjynahesh.
Edhe njëherë, lum për atë që ka zgjedhur këto sprova e mundime, të cilat nuk vijnë vetëm se me mirësi për besimtarin dhe mjerë për atë që i ka zëvendësuar ato me sprovat dhe mundimet e kësaj bote dhe botës tjetër, të cilat janë të pa fundme dhe të padurueshme dhe në të cilat nuk ka as edhe një lloj mirësie, porse vetëm vuajtje dhe mjerim!
E lusim Allahun të na bëjë besimtarë të devotshëm! E lusim Allahun të na dhurojë xhenetin Firdeus, të na bashkojë në të me profetët dhe të mirët! E lusim Allahun t’i kthejë muslimanët në fenë e Tij me një kthim të bukur!
Kjo ishte e tëra dhe paqja dhe bekimi i Allahut qofshin mbi të dërguarin e Allahut, Muhamedin, familjen e tij dhe të gjithë besimtarët e vërtetë deri në Ditën e Gjykimit! Amin!

Bledar Haxhiu
27.10.2006