[Era1]

“Uzurpimi i mjediseve të Pallatit të Kulturës “Naim Frashëri” në Përmet nga kisha ortodokse ka sjellë reagimin e dhjetëra figurave të njohura të vendit, të cilët i kanë dërguar një peticion titullarëve më të lartë të shtetit shqiptar. Në letrën e hapur dërguar presidentit Moisiu, kryeministrit Berisha dhe kryeparlamentares Topalli, kërkohet që kisha ortodokse të lërë mjediset që posedon në kundërshtim flagrant me ligjin, si dhe të rikthehet në detyrë drejtori i pallatit të kulturës, Kastriot Bezati. “Hirësia e Tij, zoti Janullatos, duhet të lirojë Pallatin e Kulturës ‘Naim Frashëri’. Shteti duhet të zbatojë ligjin, të mbrojë e të lartësojë Pallatin e Kulturës ‘Naim Frashëri’, në tokën e rilindësve të mëdhenj, të vëllezërve ‘Frashëri’ dhe të shumë figurave të tjera madhore, që na nderojnë si komb në Ballkan e në Europë”, - thuhet në peticionin e firmosur nga akademikët dhe intelektualët e njohur shqiptarë. Letra vazhdon më tej: “Institucionet e kulturës dhe të fesë, si çdo institucion, duhet të veprojnë brenda ligjit të Shqipërisë. S’duhet të ketë padronë, por vetëm shërbëtorë të ligjit. Në fund të letrës së hapur kërkohet nga pushteti qendror dhe ai vendor që të rikthehet në detyrë drejtori i pallatit të kulturës. “Kërkojmë të rikthehet në punë drejtori, Kastriot Bezati, që i ka dhënë shumë kulturës dhe historisë së Përmetit. Kërkojmë zbatimin e ligjit nga shteti sa më shpejt në Përmet, për pallatin e kulturës ‘Naim Frashëri’” përfundon peticioni.
Pak kohë më parë, kryetari i ri i Bashkisë së Përmetit firmosi urdhrin për lirimin e Bezatit nga detyra së bashku me shumë punonjës të tjerë të administratës. Ai ishte ndër personat që kundërshtoi në mënyrë të vazhdueshme kalimin në pronësi të Kishës Ortodokse të mjediseve të Pallatit të Kulturës. Por menjëherë pas pezullimit të tij nga detyra, u ndryshua totalisht edhe destinacioni i objektit. Kjo solli fillimisht reaksionin e intelektualëve të qytetit të Përmetit dhe së fundi, në mbështetje të Bezatit, por mbi të gjitha në respektimin e ligjit, dolën plot 34 figura të shquara të shkencës, kulturës, artit dhe historisë së vendit.


PETICION

Drejtuar:
Presidentit të Republikës së Shqipërisë, zotit Alfred Moisiu
Kryeministrit të Shqipërisë, zotit Sali Berisha
Kryetares së Kuvendit Popullor, Jozefina Topalli
TIRANË

Ju drejtohemi për mbijetesën e Pallatit të Kulturës “Naim Frashëri” në Përmet, sepse kemi mendimin që kush mbron kulturën e kombit, mbron edhe Pallatin e Kulturës “Naim Frashëri”. Ligji, të gjitha shkallët e Gjyqësorit, Shkalla I, Apeli, Gjykata e Lartë dhe Gjykata Kushtetuese, kanë vendosur që Pallati i Kulturës “Naim Frashëri” të mos tjetërsohet e të kthehet në kishë, por të mbetet e lartësohet si tempull i kulturës në zemër të Përmetit, para të cilit ngrihet emblema e kulturës shqiptare, busti i Naim Frashërit.
Si në çdo shtet të Europës, edhe në Shqipëri askush nuk duhet të dalë mbi ligjin: asnjë njeri, asnjë komunë apo bashki, asnjë institucion qendror i vendit, as edhe Kryeministria, apo Presidenca. Institucionet e kultit, që janë të domosdoshme, duhet të respektojnë dhe t’i binden ligjit të Shqipërisë. Hirësia e Tij, zoti Janullatos, duhet të lirojë Pallatin e Kulturës “Naim Frashëri”. Shteti duhet të zbatojë ligjin, të mbrojë e të lartësojë Pallatin e Kulturës “Naim Frashëri”, në tokën e rilindësve të mëdhenj, të vëllezërve “Frashëri” dhe të shumë figurave të tjera madhore, që na nderojnë si komb në Ballkan e në Europë. Shteti duhet të ndeshet dhe asgjësojë valët helenizuese, që vijnë në Shqipërinë e Jugut nga disa qarqe të caktuara të Greqisë, nën emrin e Vorio-Epirit, të cilat kërkojnë atë që s’mund të kërkohet dhe që duan të godasin apo cënojnë marrëdhëniet e mira Shqipëri – Greqi.
Institucionet e kulturës dhe të fesë, si çdo institucion, duhet të veprojnë brenda ligjit të Shqipërisë. S’duhet të ketë padronë, por vetëm shërbëtorë të ligjit. Pushohet drejtori i Qendrës Kulturore të Përmetit, studiues i kulturës dhe historisë, zoti Kastriot Bezati, vetëm se mbron ligjin, vetëm se bëri që shteti të fitonte në të gjitha shkallët e Gjyqësorit, duke ia lënë Pallatin e Kulturës “Naim Frashëri” qytetit me emër të Përmetit. Është ky një paradoks: Drejtori mbrojti shtetin dhe shteti e pushon nga puna drejtorin. E kundërta duhej të ndodhte: Ata që e pushuan drejtorin duhet të pushoheshin apo largoheshin nga puna e shtetit. Shteti s’mund të veprojë kundër shtetit, kundër ligjit të Shqipërisë.
Kultura jonë kombëtare e nderon kudo Shqipërinë. Jemi në mbrojtje të Pallatit të Kulturës “Naim Frashëri”, që mban emrin “Naim Shqipëria”. Kërkojmë të rikthehet në punë drejtori, Kastriot Bezati, që i ka dhënë shumë kulturës dhe historisë së Përmetit. Kërkojmë zbatimin e ligjit nga shteti sa më shpejtë në Përmet, për Pallatin e Kulturës “Naim Frashëri”
Me besim tek Ju:

FIRMËTARËT

1. Prof. Dr. Ylli Popa, kryetar i Akademisë së Shkencave të Shqipërisë
2. Dritëro Agolli, shkrimtar, Nderi i Kombit
3. Prof. Dr. Kristo Frashëri, historian e studiues i çështjes kombëtare
4. Ibrahim Toshkëzi, kryetar i Shoqatës Atdhetare Kulturore “Përmeti”
5. Prof. Dr. Pëllumb Xhufi, historian dhe deputet i Kuvendit të Shqipërisë
6. Xhevahir Spahiu, poet
7. Prof. Dr. Luan Omari, nënkryetar i Akademisë së Shkencave të Shqipërisë
8. Dr. Moikom Zeqo, studiues
9. Prof. Dr. Farudin Hoxha, nënkryetar i Akademisë së Shkencave të Shqipërisë
10. Prof. Dr. Jorgo Bulo, drejtor i Institutit të Gjuhësisë
11. Prof. Xhelal Gjeçovi, studiues
12. Prof. Dr. Beqir Meta, historian, drejtor i Muzeut Historik Kombëtar
13. Prof. Dr. Gazmend Shpuza, studiues
14. Prof. Dr. Muharrem Dezhgiu, studiues i historisë
15. Prof. Dr. Seit Mancaku, studiues i gjuhësisë
16. Prof. Dr. Marenglen Verli
17. Prof. Dr. Afërdita Jonuzi
18. Prof. Dr. Yllka Selimi
19. Prof. Dr. Valentina Duka
20. Minella Kureta, drejtor i Përgjithshëm i Unionit Artistik të Kombit Shqiptar
21. Prof. Dr. Stilian Adhami, studiues
22. Prof. Dr. Xhovalin Gruda
23. Prof. Dr. Agron Xhagolli, Instituti i Folklorit
24. Prof. Dr. Mark Tirta, studiues
25. Prof. Asoc. Dr. Ilira Caushi
26. Zhani Ciko, Mjeshtër i Madh
27. Prof. dr. Zyri Bajrami, zëvendësrektor i Universitetit të Tiranës
28. Prof. Dr. Muzafer Kurkutaj
29. Eno Koço, dirigjent
30. Ermir Dizdari, muzikolog
31. Prof. Dr. Perikli Culi
32. Prof. Apostol Kotani
33. Prof. Emin Riza
34. Prof. Valter Shtylla



2 Qershor 2007

Gazeta Albania