[Albanian eX|PerT]

Tjetër skandal, ushtarët grekë plagosin shqiptarin. Emigranti i padit

Në Athinë protestë kundër dhunës e diskriminimit

Një patrullë ushtarake greke që kontrollon kufirin me Shqipërinë ka qëlluar me armë mbi një grup shqiptarësh, që tentonin të kalonin ilegalisht kufirin dhe ka plagosur me plumb në shtyllën kurrizore një 19-vjeçar nga Berati. I riu është nga fshati Krotinë i Komunës Cukalat të Beratit dhe quhet Kamber Beshiri. Pas plagosjes me arrë zjarri ai është çuar nga vetë ushtarët grekë në Janinë, ku është mjekuar për 7 ditë në spitalin "Haxhikosta" të këtij qyteti. Të martën i riu është sjellë në Kakavijë dhe më pas ka ndaluar në Gjirokastër. Agjentët e policisë së Komisariatit të Gjirokastrës e kanë pyetur viktimën dhe pasi kanë marrë deklarimet dhe kallëzimin e tij, kanë hapur një çështje penale. Ndërkohë policia shqiptare ka kërkuar takim me palën greke, e cila gjatë bisedimeve zyrtare ka pranuar plagosjen me armë. Por, pala greke ka pretenduar se patrulla kishte pasur përpara rreth 30 klandestinë shqiptarë, të cilët kanë sulmuar patrullën ushtarake të përbërë nga 4 burra dhe një grua dhe se patrulla greke ka qëlluar në ajër për t‘u mbrojtur nga sulmi. Ngjarja ka ndodhur më 11 qershor 2007, por është bërë prezente për policinë shqiptare të martën më datë 19 qershor, rreth orës 15:00, kur nga ana e policisë greke janë kthyer në Kakavijë 6 emigrantë klandestinë, mes të cilëve edhe i plagosuri Kamber Beshiri. Djali nga Berati ka deklaruar në polici se një javë më parë ishte i plagosur nga ushtarët grekë dhe se pak orë më parë kishte dalë nga spitali i Janinës. Viktima u shoqërua fillimisht në ambientet e Drejtorisë së Policisë së Qarkut Gjirokastër, ku është marrë në pyetje dhe ka dhënë shpjegime të hollësishme para specialistëve të policisë kriminale. "Më datë 11 qershor 2007, së bashku me dy djem të tjerë, nga i njëjti fshat, që janë kushëriri im Emiljano Hoxha dhe një shoku i tij me emrin Geni, jemi nisur për në Greqi. E kaluam kufirin në afërsi të Kakavijës, mbi fshatin Dritë (Shën Nikolla) të Gjirokastrës. Rreth orës 05:00 të mëngjesit, duke ecur në mal përmes një pylli të dendur me shkurre, në vendin e quajtur Mali i Protopapës, dëgjuam disa zhurma dhe më pas disa krisma arme", ka filluar rrëfimin e tij i riu. Ai ka treguar më tej se pranë tyre u afruan 4 policë grekë, 3 burra dhe një grua. Pas krismave Kamberi thotë se ka ndjerë dhimbje dhe ka kuptuar se ishte plagosur. "Më morën në makinën e policisë dhe me çuan në Spitalin e Janinës "Haxhikosta". Në spital kam ndenjur 7 ditë. Në dhomën ku qëndroja dhe mjekohesha jam ruajtur me policë të armatosur. Më 16 qershor më kanë marrë në pyetje disa policë grekë në lidhje me këtë ngjarje. Më 18 qershor doktori më tha se mund të dal nga spitali, pasi gjendja shëndetësore ishte përmirësuar dhe plaga po mbyllej. Të martën në mesditë disa policë grekë e kanë bashkuar me një grup të vogël emigrantësh dhe e kanë sjellë në Pikën e Kalimit Kufitar të Kakavijës, si një emigrant të zakonshëm, pa dhënë informacion për ngjarjen ku u plagos viktima.

I plagosuri: Kam bërë padi në Greqi

Sipas komunikatës së zëdhënësit të Drejtorisë të Policisë së Qarkut Gjirokastër, Kamber Beshiri ka deklaruar se këtë çështje e ka denoncuar në organet e drejtësisë greke në Janinë dhe se paralelisht çështjen po e ndjek edhe shteti grek. Një kushëri i viktimës ka marrë avokat dhe po e ndjek ketë problem. Sipas komunikatës, viktima ka deklaruar se në Shqipëri nuk dëshiron të bëjë padi penale, por vetë policia shqiptare ka marrë kallëzim për këtë ngjarje dhe do të hapë një çështje penale në hetim. Pas kallëzimit në polici, viktima Kamber Beshiri është shoqëruar në spitalin rajonal "Omer Nishani" në Gjirokastër, ku pas kontrollit mjeku ligjor F.Kekezi ka deklaruar se nuk ka probleme shqetësuese, pasi plaga ishte drejt mbylljes dhe plumbi ishte nxjerrë nga kirurgët e Janinës. Policia i ka ofruar të plagosurit ndihmë për të shkuar në shtëpi, por ai ka deklaruar se do të qëndronte në Gjirokastër te disa kushërinj të tij. Dosja me deklarimet e viktimës për këtë ngjarje i ka kaluar më pas Prokurorisë së Rrethit Gjyqësor Gjirokastër për hetime të mëtejshme. Sipas komunikatës së policisë, shefi i Policisë Kufitare të Gjirokastrës, Ziadin Allaraj, ka marrë menjëherë kontakt me homologët e palës greke, të cilët e kanë informuar zyrtarisht për ngjarjen dhe i kanë bërë me dije se në Greqi po zhvillohen hetime për zbardhjen e saj.

Grekë e shqiptarë, në shesh kundër dhunës

Rreth 1000 qytetarë grekë dhe emigrantë shqiptarë protestuan pasditen e së mërkurës në Athinë. Demonstrata u zhvillua në shenjë proteste ndaj dhunës policore të ushtruar ndaj emigrantëve. Protestuesit kërkuan dënimin e autorëve të dhunës në rajonet policore greke. Pak para fillimit të demonstratës, Ministria greke e Drejtësisë lajmëroi se pesë policët protagonistë në pamjet shokuese të dhunës do të ndiqen penalisht. Mbi ta rëndon akuza e dhunës dhe ofezës publike në detyrë. Vlen të përmendet numri tepër i vogël i shqiptarëve që morën pjesë në këtë demonstratë, rreth 150 veta. Edhe një herë shoqatat e emigrantëve shqiptarë treguan se nuk janë aspak përfaqësuese të emigrantëve. Por, edhe pse protesta e shqiptarëve ishte e vakët në Athinë, shqiptarët e Anglisë kanë vendosur të thonë fjalën e tyre, në një protestë të organizuar në Londër. "MJAFT! London Club" do të organizojë sot në mesditë një protestë paqësore përpara ambasadës greke në Londër. Protesta ka për qëllim kundërshtimin e dhunës si formë praktike brenda institucioneve shtetërore greke dhe do të jetë shprehje e indinjatës shqiptare ndaj këtyre akteve të papranueshme.