[rilinda]

Teknikat e fundit antiduhan, alkool, drogë

Varësi do të thotë pamundësi për të përballuar pa një ndihmë të jashtme stresin, tensionin dhe jetën në përgjithësi. Pjesa më e madhe ia arrijnë ta luftojnë stresin e përditshëm pa pasur nevojën e ndihmësve. Disa të tjerë ia besojnë veten duhanit, alkoolit dhe në rastet më të këqija, drogës. Të heqësh dorë nuk është e lehtë dhe nuk mjafton vetëm forca e vullnetit. Duhet bashkëpunimi me ekspertë, një trajtim mjekësor i plotë, ndihmë psikologjike dhe shoqëri mbi të gjitha.



Ilaçet e reja për të shpëtuar nga heroina. Për kokainën janë më mirë sisteme të tjera

Varësia nga drogat "tradicionale" (kokainë, heroinë etj.) shpesh është paralele me varësinë nga drogat e tjera, të cilat janë pranuar në shoqëri. "Shumë të varur që vijnë në qendrën tonë janë të alkoolizuar dhe të varur nga duhani", thotë profesor Paolo Mezzelani, drejtor i U.O. të Veronës. "Për këtë arsye, programi i dezintoksikimit duhet të njihet me problemet e çdo individi. Në qoftë se e përgjithësonin do të ishte një gabim". Shpeshherë lloje të ndryshme drogash (substanca psiko-aktive) bëhen pjesë e jetës dhe më pas personi bëhet skllav prej tyre. Përdoruesit mendojnë se konsumimi i tyre mund të jetë një autoterapi për problemet personale. Përdorimi i heroinës (një opium) është derivat i tentativës për të fituar ndaj ankthit, ndërsa kokaina dhe stimulues të tjerë (si amfetamine dhe ekstazi) përdoren për të zgjidhur gjendjen depresive. Në përgjithësi stimuluesit ndihmojnë për afrimin me të tjerët, duke eliminuar frikën dhe ngadalësinë; këto njihen si drogat që përdoren në botën e modës dhe spektaklit ose të biznesit. Marijuana ose hashashi bëjnë pjesë gjatë një rituali shoqëror dhe shpesh përdoren në diskoteka. "Nevojiten një ose më shumë takime paraprake me pacientin për të kuptuar nëse është akoma në fazën e soditjes (nuk është i vendosur të ndalojë) ose është në fazën e përcaktimit (i vendosur për të ndryshuar stil jetese)", shpjegon Mezzelani. "Nëse perceptojmë një vullnet për të ndryshuar, fillojmë trajtimin me ilaçe, ku secili prej ilaçeve ka të dhënat precize". Metoda e famshme Urod (Ultrarapid opiate detoxification) e përdorur para 10 vjetësh, pothuajse nuk përdoret më. Edhe pse kushtonte 5000 euro për disa ditë kohë qëndrimi, është zbuluar se është shumë i rrezikshëm dhe përsëri nuk mjafton për të dalë nga tuneli. "Në dezintoksikimin përdorim lofexidina, një ilaç që vjen nga Mbretëria e Bashkuar dhe eliminon 70 për qind të simptomave. Për ta përshpejtuar dezintoksikimin përdorim naloxone. Pas 7-10 ditë organizmi pastrohet". Para rikuperimit të plotë, qendra e Veronës bën edhe një post-dezintoksikim. Për heroinën përdoren ilaçe si natrexone, metadone, buprenorfina. "Varësia nga kokaina është më komplekse, sepse lidhet edhe me alkoolizmin", thotë Mezzelani. Rezultate të mira janë arritur me anë të agepunturës, e praktikuar në llapën e veshit (Acudetox), ku përdoret për 4 deri në 8 javë.

Acudetox: Kokaina luftohet me agepunturë

Ja se si funksionuan metoda Acudetox:
Me anë të agepunturës shpohen 5 pika në vesh dhe 1 në trup. Fillimisht procedohet me 5 trajtime në javë gjatë dy javëve rresht. Më pas, kur ka dhënë rezultatet e pritshme, zbritet në 3 trajtime në javë dhe në fund cikli quhet i kompletuar, duke përdorur 2 trajtime në javë për dy javët e fundit. Pacientët qetësohen dhe tregojnë më tepër respekt për veten dhe të tjerët.

Një ilaç që të largon nga alkooli. Por vetëm ilaçi nuk mjafton...
Alkooli (alkool etilico ose etanol) është bashkëshoqërues i njerëzimit për mijëra vjet. Sipas të dhënave të OBSH-së, sot alkooli qëndron në vendin e parë të substancave abuzive, sepse është i lirë e mund të gjendet kudo. Alkooli provokon një ndjenjë emocionuese, ndërsa nëse pihet në doza të mëdha reagon si qetësues. Kush e pi ndihet i relaksuar dhe euforik.

Edhe alkooli, ashtu si duhani, është sëmundje shoqërore
Alkooli rezulton më goditës se drogat e tjera. Shumë të alkoolizuar nuk e pranojnë se kanë probleme me alkoolin.

Kur konsiderohet si "sëmundja e gotës"?
Kur për të fituar kënaqësinë nevojitet të konsumohen doza gjithmonë e më të mëdha të substancës; kur nuk është e mundur të kontrollosh veten, si dhe kur mendimi i parë që të shkon ndërmend është gota e pijes.

Si zgjidhet problemi? Është më mirë terapia psikologjike apo terapia me anë të trajtimeve mjekësore?
"Duhet të përqendrohesh te pacienti për të kuptuar shqetësimin e tij psikologjik", shpjegon psikiatri Vincenzo Manna, përgjegjës në "Centro di Salute Mentale di Genzano" në Romë. "Shpeshherë alkoolizmi është një lloj autoterapie e pavetëdijshme, që ndihmon për të zgjidhur problemet e përditshme. Disulfiram është një ilaç që ndalon një enzimë të veçantë, i cili nxit te përdoruesi një ndjenjë antipatie për alkoolin. Por vetëm ilaçi nuk mjafton", paralajmëron Manna. "Terapia psikologjike është kryesorja. Mendoj se një ndërthurje mes trajtimit me anë të ilaçeve dhe psikoterapisë do të ndihmojnë shumë në kapërcimin e gjendjes.

Nuk duhet të harrojmë se ekziston një bazë gjenetike e varësisë: OBSH-ja konfirmon se 50-60 për qind e tendencës abuzive është e trashëgueshme. Një vëzhgim është bërë edhe te fëmijët binjakë të të alkoolizuarve. Kështu që edukimi kalon në plan të dytë, në plan të parë qëndron gjenetikja".

Kur mund të themi se jemi të shëruar plotësisht nga varësia e alkoolit?
Është vështirë të përcaktosh kohën që mund të shërohesh nga alkooli. Ndoshta nuk ekziston një shërim total. Padyshim që ndërhyrja mjekësore dhe ndihma shoqërore mund ta ulin vërtet rrezikun e rikthimit të sëmundjes.

Shoqata
Për të shpëtuar nga një varësi duhet një forcë e madhe vullneti. Terapia e besimit në vetvete është ajo që bashkon shoqërinë e alkoolistëve anonimë. Ajo u krijua në Shtetet e Bashkuara në 1935-ën, nga takimi i një agjenti të bursës së Wall Street dhe një mjeku kirurg të Akron, të dy alkoolistë. Të dy ndanin eksperiencat e tyre të hidhura dhe shprehnin dëshirën për t‘iu larguar shishes. Që atëherë e më tej, shoqata ka udhëtuar në të gjithë botën. Asnjë obligim, asnjë terapi psikologjike precize: gjithsecili ndihmon veten dhe të tjerët për të gjetur forcën dhe të heqin dorë nga pija. Pjesëmarrja është falas dhe nuk ekziston ndonjë dallim racial, seksual, shoqëror apo politik. Në grup të gjithë janë vetvetja dhe të barabartë. Qëllimi i shoqatës është pikërisht grupi. Gjatë mbledhjeve, njerëzit ndajnë historitë, eksperiencat dhe problemet personale. Kjo mbledhje funksionon me të vërtetë, sepse në këtë shoqatë që të gjithë vendosin të ndryshojnë stilin e tyre të jetesës dhe të gjejnë forcën e brendshme për t‘u rikuperuar. Është e famshme metoda e shoqërisë: i ashtuquajturi 12 hapa. Në një farë mënyre rikuperimi individual është gradual. Hapi i parë është të kesh një objektiv të caktuar dhe të përcaktosh atë që do të arrish: "Të rrish larg gotës për 24 orë". Më pas për 24 orë të tjera... dhe kështu vazhdon.