[Zana_ch]

Arratisja nga Burgu i Dubravës është realizuar nën kërcënimin e armëve, thotë policia




Përmes një komunikate për media policia ka dhënë sot informata plotësuese për arratisjen e djeshme të 7 të burgosurve nga Burgu i Dubravës, duke sqaruar se ky akt është realizuar nën kërcënimin e armës së zjarrit. të cilën në momentin e arratisjes e kishte pasur njëri nga të burgosurit. Dyshohet se ka pasur edhe persona të tjerë (jashtë burgut) të cilët, në momentin e arratisjes së të 7-ve, kanë shtënë me armë zjarri në drejtim të burgut. Aktualisht, si të dyshuar, janë ndaluar edhe 4 oficerë korrektues. Në komunikatën e policisë thuhet se më 18 gusht 2007, rreth orës 16:15 pas një incidenti në burgun e Dubravës, Istog - kanë arritur të arratisen shtatë të burgosur.

Ata janë:

Faton HAJRIZI – 16.02.1985 Vjedhje Grabitqare, Skenderaj;

Burim BASHA – 11.05.1981 Grabitje, Prizren;

Astrit SHABANI – 03.081981 Vrasje, Kolevicë e re – Prishtinë;

Amir SOPA – 13.02.1978 Terrorizëm, Prishtinë;

Xhavit Morina – 13.09.1963 Terrorizëm, Drenoc-Malishevë;

Ramadan SHYTI – 05.09.1983 Tentim Vrasje-kalim Ilegal i Kufirit, Dimç-Hani i Elezit;

Lirim JAKUPI – 01.08.1979 Rrëmbim, Gjilan.

Derisa shtatë të burgosurit e lartpërmendur ishin në shëtitore në pavijonin numër një, njëri nga ta ka nxjerr revolen TT (7. 62mm) dhe e ka drejtuar në drejtim të oficerëve korrektues (gardian) me kërkesën që ata t’i japin çelësat e dyerve.

Pasi që një gjë e tillë nuk ka ndodhur atëherë ata kanë kapërcyer murin e jashtëm duke shtënë me armën të cilën e kishte në dorë njëri nga të dyshimtët.

Pasi është kaluar edhe muri i jashtëm, rreth 400m larg nga ta, nga ana e jashtme e burgut, dyshohet se ka pasur persona të tjerë të cilët kanë shtënë me armë zjarri në drejtim të burgut.

Njësit speciale të SHPK-ës, Njësi të KFOR-it (me helikopter) dhe të UNMIK-ut ishin vënë në kërkim të tyre dhe ende janë në teren.

Lidhur me këtë rast si të dyshimtë për “Ndihmë në arratisje të personave” janë ndaluar katër oficerë korrektues.

Ndërkohë që operacioni për kërkimin e tyre ende është duke vazhduar, luten qytetarët e Kosovës se në rast se kanë ndonjë informatë në lidhje me këta të dyshimtë të lajmërojnë stacionin më të afërt policor apo në numrat e njohur 112 ose 038 504 604 6666.

Njësiti i hetimeve rajonale të Pejës në bashkëpunim me Drejtorinë e Krimeve të rënda në Prishtinë, janë duke u marr me rastin, thuhet në komunikatën e lëshuar sot nga Zyra për Informim Publik pranë SHPK-se, Komanda Kryesore e Policisë Prishtinë.| s.b & RTK staff |



19 gusht 2007