[Bjeshka1]

TIRANE -Dëshira për të fituar para duket se nuk e ka ndaluar 25-vjeçarin Azis Komi që të shfrytëzojë si prostitutë bashkëshorten e tij minorene, me inicialet A.K, 17 vjeçe. Fenomeni i pazakontë është zbuluar nga policia në preiferi të kryeqytetit, te hotel "Kashari", pranë Spitalit Ushtarak. Përveç dy bashkëshortëve, uniformat blu kanë vënë në pranga edhe pronarin e hotelit të lartpërmendur, Rasim Lleshi, 62 vjeç, i cili kundrejt shpërblimit, vinte në dispozicion ambientet e hotelit të tij për ushtrimin e prostitucionit. Ende nuk dihet nëse minorenia ishte detyruar që të prostituonte apo ka qenë edhe ajo dakord për të bërë disa para në këtë mënyrë. Burime policore janë shprehur se rasti konkret i prostitucionit dyshohet se ka qenë i paramenduar nga personat e arrestuar, pasi dy bashkëshortët rezultojnë banues në Lushnje, ndërkohë që prej disa kohësh qëndroni në hotelin ku shfrytëzohej minorenia.
Burime pranë Drejtorisë së Policisë së Tiranës kanë bërë me dije se minorenia A.K është kapur nga uniformat blu në kushtet e flagrancës, teksa ushtronte prostitucion me një klientin e saj. Sipas të njëjtave burime, bashkëshorti i minorenes u merrte klientëve që donin të kënaqnin epshet e tyre seksuale një shumë prej 2 mijë lekësh të reja. Arrestimi në kushtet e flagrancës ka ardhur pasi agjentët e seksionit kundër trafiqeve kanë pasur informacion paraprak që në hotel "Kashari" kryhej prostitucion dhe se edhe vetë pronari i hotelit, Rasim Lleshi ishte i implikuar në këtë aktivitet të paligjshëm. Kanë mjaftuar pak ditë që informacioni i marrë të konfirmohej nga agjentët në terren, për t'u finalizuar me operacionin e djeshëm, ku u vunë në pranga tre persona. Uniformat blu kanë sekuestruar edhe dy telefona celularë që u përkisnin personave të arrestuar si dhe një shumë parash, që dyshohet se ishin siguruar nga aktiviteti i prostitucionit. Ndërkohë që në momentin e arrestimit policia i ka gjetur 25-vjeçarit Azis Komi edhe një thikë, të cilën e mbante në brez. Gjithashtu, Komi rezulton në skedarët e policisë si person me precedentë të mëparshëm penal. Ai ka qenë i dënuar për veprat penale të trafikut të narkotikëve dhe armëmbajtjes pas leje. Materialet në ngarkim të personave të arrestuar i kanë kaluar për hetime të mëtejshme prokurorisë së Tiranës. Ndaj Azis Komit është ngritur akuza e shfrytëzimit të prostitucionit, ndërsa ndaj pronarit të hotel "Kashari", Rasim Lleshi është ngritur akuza e mbajtjes së lokaleve për prostitucion e kryer në bashkëpunim. Ende e paqartë është pozicioni i bashkëshortes së Azisit, minorenes A.K. Për këtë të fundit burimet policore ende nuk kanë dhënë sqarime nëse edhe kjo ishte pjesë e aktivitetit të prostitucionit apo ka qenë e detyruar forcërisht nga bashkëshorti i saj.

GAZETA SHQPTARE