[Arb]

Kuçi: Zhvillimet e fundit rreth procesit të pavarësisë së Kosovës mund të nxisin tensione

Prishtinë, 4 tetor - Ministri i Punëve të Brendshme, Blerim Kuçi, nëpërmjet një deklarate thekson se zhvillimet e fundit rreth procesit të pavarësisë së Kosovës mund të nxisin tensione të ndryshme, andaj u bën thirrje qytetarëve që të ruajnë qetësinë, maturinë dhe pjekurinë për rëndësinë e stabilitetit të vendit në këtë fazë të procesit për pavarësimin e vendit. Kosova, thotë Kuçi, nuk ka nevojë për struktura të tjera, pos atyre legale dhe legjitime. Kjo deklaratë e ministrit të brendshëm vjen pas një reportazhi në TV për disa pjesëtarë të AKSH-së. Në këtë deklaratë për opinion Kuçi theskon: "Situata e sigurisë së përgjithshme në Kosovë është e ndjeshme dhe kjo për shkak të faktorëve të ndryshëm, të brendshëm dhe të jashtëm. Sidoqoftë, në Kosovë ekzistojnë strukturat legale dhe legjitime të sigurisë, të cilat angazhohet me përkushtim për të mbrojtur sigurinë publike, jetën dhe pronën e qytetarëve të Kosovës. Duhet të jetë e qartë se Kosova ka mbi shtatë mijë policë të Shërbimit Policor të Kosovës, ka Trupat e Mbrojtjes së Kosovës dhe ka trupat e KFOR it të udhëhequra nga NATO, si edhe Policinë e UNMIK ut. Pas publikimit të pamjeve të pjesëtarëve të armatosur të 'Armatës Kombëtare Shqiptare', unë dua të mbështes deklaratat e Presidentit Sejdiu dhe Kryeministrit Çeku se Kosova nuk ka nevojë për struktura të tjera, pos atyre legale dhe legjitime. Sidoqoftë, ritheksoj se zhvillimet e fundit rreth procesit të pavarësisë së Kosovës mund të nxisin tensione të ndryshme. Prandaj, apelojmë te qytetarët e Kosovës që të mbajnë qetësinë, maturinë dhe pjekurinë për rëndësinë e stabilitetit të vendit në këtë fazë të procesit për pavarësimin e Kosovës. Gjatë fillimit të javës së ardhshme, ne do të dalim me qëndrime më konkrete rreth kësaj çështjeje, pasi të marrim informata zyrtare nga Shërbimi Policor i Kosovës", theksohet në fund të deklaratës për opinion të ministrit të Punëve të Brendshme, Blerim Kuçi