[yllbardh]

KOSOVA DHE KATOLICIZMI I RRUDHUR EUROPIAN

Botuar me 07 Shtator 2007 ne Gazeten "Koha Jone"

Me zgjerimin e planifikuar të BE-së në drejtim të Lindjes, ortodoksët kanë “pushtuar” politikisht Bashkimin Europian.Rreth 200 milion qytetarë të besimit ortodoks, e kanë transformuar kristianizmin ortodoks, me kishën ortodokse ruse si zërin e saj më të lartë, në një farë mënyre në pjesë të vendimarrjes politike të BE-së. Ndërkohë, në Evropë jetojnë mbi 120 milionë myslimanë, prej të cilëve rreth 15 milionë në Evropën Perëndimore. «Europa është myslimane, por nuk e di» thotë Bernard Luis, një nga studiuesit më të njohur perëndimorë të Islamit.

Përballë këtij “invazioni” ortodoks e islamik, në fillimet e këtij shekulli katoliçizmi europian është rrudhur mjaft. Pavarësisht rrudhjes në Europën Perëndimore, në Kosovë, në tokën e shqiptarëve, shumica e të cilëve janë të besimit mysliman, simbolikisht i krijohen hapësira dhe vendosen raporte të reja me katoliçizmin europian.Jo zyrtarisht mësohet së udhëheqësi shpirtëror i shqiptarëve të Kosovës drejt pavarësisë dhe presidenti i vendit, i ndjeri Ibrahim Rugova, vullnetarisht konvertohet nga mysliman në katolik. Gjithashtu në sheshin qendror të Prishtinës i hapet vendi dhe fillon ndërtimi i një katedraleje katolike. Me këtë veprim shqiptarët tregojnë se edhe në kohët moderne, do ta mbrojnë katoliçizmin, ashtu siç bëri Heroi ynë Kombëtar Gjergj Kastroti-Skënderbeu shekuj më parë. Shqiptarët e Kosovës gjithashtu shpresojnë në mbështetjen e tyre, në kushtet kur po kërkojnë vëtëm ripranimin në qytetërimin perëndimor, nga i cili u veçuan përdhunisht.

Ndonëse islami ka depërtuar në mënyrë “klandestine”, të paplanifikuar dhe të padëshiruar në vendet e BE-së, ai së bashku me kristianizmi ortodoks dhe atë tradicional katoliko-protestant, kanë krijuar një realitet të ri në çështjet fetare të Europës. Kjo detyrimisht do të ridimensionojë edhe politikat e sigurisë në Europën e shekullit XXI. Këto politika do të ndikojnë jo vetëm në sigurinë dhe të ardhmen e Europës, por dhe në raportet e ndërsjellta të saj me SHBA dhe Federatën Ruse.

Kultura dhe feja ndodhen sot në linjën e parë të çështjeve globale. “Janë pjesë kyçe të politikës së jashtme të shekullit XXI. Partneriteti i tyre, kur përdoret siç duhet, mund të jetë një forcë për drejtësi dhe paqe”, thotë Madeleine Albright, ish-Sekretare Shteti e SHBA-së. Shpesh ato janë të pandashme dhe luajnë një rol të rëndësishëm në çështjet e sigurisë rajonale dhe globale. Por si pritet të ndikojnë këta faktorë në sigurinë e Europës në këtë shekull, në kushtet kur ndikimi ortodoks dhe islamik nuk mund të mos merren më në konsideratë në “klubin e krishterë”.

Cështja e Kosovës dhe mënyra e zgjidhjes së saj do të jetë guri i provës. Zgjidhja e saj në favor të popullit të Kosovës do të tregojë pjekurinë dhe forcën e BE-së. Kjo është e vetmja zgjidhje në një linjë me vetë sigurinë e Europës. Cdo tentativë për ta lejuar Kosovën të bëhet kurban i parë i këtij realiteti të ri fetar të Europës do të vërtetojë plotësisht pushtimin ortodoks të politikës së BE-së dhe kapitullimin e saj përballë “ariut rus” që mendohej se ishte zbutur.

Zgjerimi i planifikuar i BE-së në drejtim të Lindjes ortodokse tashmë e ka ripozicionuar kristianizmin ortodoks në ato nivele ku politikat ortodokse janë realisht pjesë e vendimarrjes politike të Bashkimit Europian. Por Huntingtoni, shumë vite më parë, kishte paralajmëruar përplasjet mes civilizimit “ortodoks sllav” me perëndimit “katolik-protestant” krahas këtij të fundit me atë islam. “Vetëm nëse vendet ortodokse e ndryshojnë identitetin e tyre sipas kushteve të qarta laike mund të ketë shanse ato vende t’i bashkohen perëndimit” thotë ai.

Në të vërtetë zhvillimet në këtë fushë nuk janë optimiste. Disa nga vendet ortodokse të anëtarësuara në BE duket nuk po manifestojnë një pozicion të qartë laik. Pesha politike e kishës brenda atyre vendeve nuk po bie, siç ka ndodhur në Europën Perëndimore, por po rritet, duke ndikuar dhe në politikën e jashtme të vendeve të tyre. Dhe ndikimi politik i kristianizmit ortodoks u manifestua qartë në rastin e përçarjeve brenda vetë BE-së për mundësinë e njohjes së njëanshme të pavarësisë së Kosovës në rastin e një vetoje të mundshmë Ruse në KS të OKB-së.

Disa shtete anëtare të BE-së, por të linjës ortodokse, i dhanë garanci qendrës politike të ortodoksisë, Moskës, por edhe Serbisë ortodokse, se nuk do ta njihnin pavarësinë e Kosovës pa një rezolutë të OKB-së. Këto shtete jo vetëm prishën mundësinë e veprimit të BE-së si një ekip në politikën e jashtme, por e faktorizuan në majat më larta Moskën në vendimarjen për Kosovën.” Evropa e ndarë dhe e dobët do ta çojë Rusinë në joshje, për të ndjekur rrugë të rrezikshme në të ardhmen e saj” thotë Joshka Fisher-ish ministër i jashtëm gjerman.Dhe shenjat janë të qarta. Kosova, në zemër të Europës u shpall “vijë e kuqe” e rëndësishme për sigurinë kombëtare të Rusisë...
....vazhdon.....