[Lona]

Të paktën 20 imigrantë ilegalë mbyten në Detin Egje afër bregdetit të Turqisë

Ankara, 10 dhjetor – Të paktën 20 imigrantë ilegalë janë mbytur në Detin Egje afër bregdetit perëndimor të Turqisë, kanë bërë të ditur sot (e hënë) zyrtarët, njofton BBCVorld. Trupat e pajetë janë nxjerrë në bregdet afër qytetit Izmir. Në këtë rast janë shpëtuar gjashtë migrantë. Në barkë gjendeshin mbi 60 njerëz, andaj bilanci i të vdekurve pritet të jetë më i lartë.

Një numër mortajash godasin burgun në Bagdad, vriten të paktën 7 të burgosur

Bagdad, 10 dhjetor - Një numër mortajash kanë goditur sot (e hënë) burgun në Bagdad dhe kështu janë vrarë të paktën shtatë të burgosur, kanë bërë të ditur zyrtarët, njofton BBCVorld. Në këtë incident, janë plagosur edhe 20 vetë të tjerë, ndër të cilët edhe disa policë. Burgu gjendet afër ndërtesës së ministrisë së brendshme, andaj nuk është i qartë caku i sulmit.

Rreth 93 milionë fëmijë në botë nuk arsimohen

Nju Jork, 10 dhjetor - Fondi i Kombeve të Bashkuara për Fëmijë, UNICEF, tha se rreth 93 milionë fëmijë në botë nuk arsimohen. Në Rapor thuhet se numri i fëmijëve që nuk ndjekin shkollimin ka rënë për 20 për qind, por ende mbetet larg Synimeve të Mijëvjeçarit, që të gjithë fëmijët në botë të shkollohen.

Patneritet strategjik mes BE-së dhe Afrikës

Lisbon, 10 dhjetor - Pavarësisht diferencimeve në çështjet tregëtare dhe në ato të të drejtave të njeriut, shtetet e BE-së dhe Afrikës dëshirojnë të hapin një kapitull të ri në marrdhënjet e tyre. Në përfundim të Samitit BE-Afrika në Lisbon, të dy palët ranë dakord për një "patneritet strategjik". Një plan veprimi, ndër të tjera, rvijëzon një bashkëpunim të ngushtë në luftën kundër varfërisë dhe ndryshimit të klimës. Ndërkaq, në diskutimin rreth një marrëveshje të re tregëtare dolën në pah mosmarëveshjet mes shefave të shteteve dhe qeverive. "Afrika nuk dëshiron të jetë më vetëm furnizuese e lëndës së parë ose vetëm një treg mallrash", theksoi në fjalën e tij presidenti i komisionit të Unionit Afrikan, Alfa Omar Konare.

Kërkohet përgjegjësi nga vendet e pasura për mbrojtjen e klimës

Bali, 10 dhjetor - Ministrja gjermane për zhvillim, Heidemari Viecorek-Zeul, ka kërkuar nga shtetet industriale që të mbështesin vendet e varfëra në mbrojtje të klimës. Në rast se kombet e industrializuara nuk e marrin përgjegjësinë e tyre, atëherë është rrezik që vendet në zhvillim të bllokojnë marrëveshjen e re për klimën, tha ajo para udhëtimit të saj për në Bali, ku sot fillon java e dytë vendimtare e punimeve të konferencës së Kombeve të Bashkuara. Delegacionet nga mbi 180 vende do të konsultohen deri të premten për një marrëveshje të re mbarë botërore për mbrojtjen e klimës. Marrëveshja aktuale e Kjtos-s përfundon në 2012.

Fosilet e dinosaurit tregojnë sekretet e fshehura nga natyra

Uashington, 10 dhjetor - Një nga mumiet më të plota të dinozaurëve, të zbuluara deri tani, po u tregon shkencëtarëve sekrete, që natyra i ka fshehur për miliona vjet. Mumia është aq e plotë saqë për studiuesit është gati njëlloj sikur të preknin një dinosaur të gjallë. Fjala është për një hidrosaur gjigand të fosilizuar dhe shkencëtarët kanë qenë në gjendje të përcaktojnë trashësinë e muskulit të tij, që del se ishte më i fuqishëm se sa mendohej. Dinosaurët janë të fosilizuar, por toka nuk i ka ruajtur në atë gjendje që janë ruajtur mumiet e Egjiptit. Fosili u gjet në vitin 1999 në Dakotën e Veriut, pra në Shtetet e Bashkuara dhe analiza e tij është bërë duke përdorur aparatin më të madh të skanimit në botë, që përdor kompania e avionëve Boiing zakonisht për të analizuar motorët e anijeve të hapësirës dhe objekte të tjerë të mëdhenj.