[Zero Cool]

Thaçi: Presim çdo minutë njohjen e shtetit të Kosovës

Kryeministri Hashim Thaçi tha sot se është çështje minutash dhe orësh kur do të filloj procesi i njohjes së parësisë së Kosovës nga shtet perëndimore. Në mbledhjen e parë të qeverisë së Kosovës së pavarur, ai shprehu mirënjohje për qytetarët e Kosovës të cilët festuan në mënyrë dinjitoze shpalljen e pavarësisë. Në mbledhjen e sotme qeveria ka miratuar një varg projektligjesh që janë të lidhura drejtpërdrejt me funksionimin e shtetit të Kosovës.
Duke e hapur mbledhjen e parë të qeverisë, siç tha të Republikës së Kosovës, kryeministri Hashim Thaçi, paralajmëroi njohje të shpejtë të shtetit të Kosovës nga vendet perëndimore. Ai tha se kërkesën për njohje e ka dërguar së bashku me kryetarin Sejdiu.
“ Pritet që së shpejti të fillojnë njohjet ndërkombëtare të shteteve përkatëse për Kosovën shtet i pavarur dhe sovran “, tha Thaçi.
Pjesë të rëndësishme të shpalljes kryeministri i cilësoi edhe festimet dinjitoze që pasuan pas shpalljes së pavarësisë.
“ Urime dhe përgëzime për të gjithë qytetarët e Kosovës për festimin e tyre dinjotoz e të mrekullueshëm që i dërguan mesazh botës se Kosova edhe ka ditur të sakrifikojë edhe di të shpallë pavarësinë në mënyrë institucionale shtetërore, por edhe di të festoj me nder, me krenari, dinjitet e madhështi “, tha Thaçi.
Mirëpo, që në mbledhjen e parë pas shpalljes së pavarësisë qeveria ka miratuar një varg projektligjesh që lidhen me shtetin e Kosovës . Projektligji për ministrinë e jashtme, projektligji për privilegjet dhe imunitete diplomatike, projektligji për shtetësinë, projektligji për policinë, projektligji për inspektoratin policor, projektligji për dokumentet e udhëtimit dhe pasaportat shtetërore, projektligji për përdorimin e simboleve shtetërore, projektligji për zonat e veçanta të mbrojtura, projektligji për vetëqeverisjen lokale dhe projektligji për kufijtë administrativ komunal, janë miratuar në mbledhjen e sotme të qeverisë.
“ Shumë shpejt Kosova do të ketë formimin dhe funksionimin e ministrisë së jashtme . Së shpejti do të fillojmë edhe hapjen e ambasadave tona kosovare në vendet përkatëse të rëndësisë së veçantë të diplomacisë botërore. Pra Kosova si shtet i ri do të filloj të funksionojë me të gjitha atributet institucionale, shtetërore të vendit”, tha Thaçi .
Të gjitha projektligjet e miratuar sot janë në përputhje me propozimin e Ahtisarit si dhe kanë marrë mbështetjen e zyrës civile ndërkombëtare në Kosovë. Ndryshe në mbledhjen e sotme qeveria ka marrë vendim që menjëherë të fillojë ndryshimi i dokumentacionit të administratës. Tash e tutje në të gjitha dokumentet do të paraqitet logoja e re e Republikës së Kosovës. Po ashtu kryeministri ka bërë të ditur se mësimi në të gjitha shkollat do të filloj, me një orë për pavarësinë e Kosovës. Ndryshe ne mbledhjen e sotme nuk kanë marrë pjesë ministrat serbë të Qeverisë.