[Dilaver]

Miliarderi rus dhe pronari i klubit të futbollit, Chelsea, Roman Abramovich, ka porositur makinerinë shpuese më të madhe në botë. Pas kësaj porosie, kanë nisur fjalët se ky miliarder planifikon të gërryejë tunelin mes Rusisë e SHBA-së, shkruan "Daily Mail". Pasi u pasurua duke shpuar tunele në ekonominë e shkatërruar ruse, Abramovich ka ndarë 80 milionë funte, me qëllim blerjen e makinerisë shpuese më të madhe në botë, me diametër 19 metra. Firma e ndërtimit e Abramovichit "Infrastruktura" në Moskë, ka porositur blerjen e kësaj makinerie. Edhe pse firma nuk e ka zbuluar qëllimin e përdorimit të makinerisë, kanë filluar menjëherë hamendjet se makineria do të përdoret për shpimin e tunelit që do të lidhë Rusinë me Amerikën, nën ngushticën e Beringut, i gjatë 88 kilometra. Supozohet se Abramovich ka vizion të njëjtë me Putinin për tunelin që do të lidhë gadishullin "Chukotka", ku është guvernator Abramovich dhe Alaskën e Amerikës.
Ky është projekt i Putinit në ëndërr dhe tashmë është në bisedimet e fshehta me Washingtonin, thotë një burim i njohur me projektin. "Putin e sheh Rusinë si qendrën e botës dhe dëshiron që Evropa t'i transportojë të mirat materiale dhe prodhimet e saj nëpërmjet vendit të tij për në Amerikë. Firmës gjermane "Herrenknecht AG" do t'i duheshin dy vjet për të ndërtuar makinerinë shpuese, që do të shponte tunelin më të madh nënujor në botë, që do të lidhte brigjet e Rusisë me Amerikën, për herë të parë që nga periudha e akullit.
Zyrtarët thonë se për gërmimin e tunelit do të duheshin më e shumta dhjetë vjet dhe shpenzimet e ndërtimit do të shpërbleheshin, sikur çdo vit të kalonin në të 100 milionë tonë. Nëpër tunel do të transportohej gjithashtu sasi e madhe nafte nga Siberia, me të cilën do të furnizoheshin SHBA-ja e Kanadaja. Por përfaqësuesi për shtyp i Abramovichit, Jon Man, përgënjeshtroi deklaratat se porosia për këtë makineri kaq të madhe shpuese, kishte lidhje me tunelin në Chukotka.
Zyrtarët amerikanë thonë se nuk kanë marrë propozim konkret për tunelin, që do të ndërtohej nën ngushticën e Beringut dhe nuk deshën të komentonin, nëse kishte pasur rekomandime për projektin nga presidenti rus, Putin.
Momentalisht makineria më e madhe shpuese në botë e ka diametrin 15 m dhe e ka blerë Kina për shpimin e tunelit nën lumin Jangce. Makineria që përdorej për të gërmuar tunelin nën La Manche, me të cilin u lidhën Franca me Britaninë, ka pasur diametër 7,5 m.