[fadil]

Analistët dhe qytetarët vlerësojnë 100 ditshin e Qeverisë Thaçi Derisa pasditen e sotme Kuvendi debaton për 100 ditshin e Qeverisë Thaçi. Analistët e pavarur e vlerësojnë pozitivisht provën e parë të kabinetit qeveritar. Ilir Dugolli nga Instituti për Hulumtim dhe Zhvillim të Politikave, thekson menaxhimin e mirë të proceseve të rëndësishme politike, ndërsa qytetarët shprehen optimistë për rezultate më të mira. Qeveria Thaçi vlerësohet me nota pozitive nga analistët e pavarur dhe qytetarët, për 100 ditshin e punës së saj. Ilir Dugolli, nga Instituti për Hulumtim dhe Zhvillim të Politikave – KIPRED, veçon menaxhimin e mirë të proceseve të rëndësishme dhe ruajtjen e sigurisë. “Vlerësimi për këtë qeveri nuk mund të bëhet si për qeveritë e mëparshme”, tha ai.

“Është tejet e rëndësishme që çështjet që kanë të bëjnë me statusin janë përmbyllë mjaftë mirë. Siguria është mbajtur në nivel të duhur, gjendja është menaxhuar përgjithësisht në mënyrë të mirë edhe gjerat tjera që janë të lidhura me statusin po menaxhohen në disa raste më mirë se ç’ është pritur. Kjo është çështja që ka vu në hije të gjitha rastet tjera, në aspektin e qeverisjes”, ka theksuar Dugolli.

Megjithatë, ai është kritik për vonesën e madhe në hartimin dhe miratimin e programit të qeverisë.

“Ka disa gjëra të tjera që nuk janë si duhet. Mungesa e vizionit për këto segmente të tjera nuk mund të arsyetohet. Shpresoj që edhe këto kritika dhe gjithë ky presion do të çojë deri tek përmirësimi në lëshime, të cilat eksitojnë në këto lëmi tjera”, thotë Dugolli.

Kurse qytetarët janë më të drejtpërdrejtë në vlerësimet e tyre, dhe shprehen optimistë për rezultate më të mira në të ardhmen.

“Fillimin e kanë pas mjaftë të mirë, por më tutje do të shohim, si duket fjalët e tyre nuk po dalin të gjitha, sepse premtimet që i kanë dhënë gjatë fushatës, nuk po dalin. Do të kryhen edhe këto ditë që i ka kryer qeveria. Pres edhe 100 ditshin tjetër që do të bëhet mirë, sepse kam durim, këto të parat kanë qenë të shkëlqyeshme. Kanë qenë ditë pozitive, jam magjistër i pikturës, ushtarë i UÇK-së, dhe jam pa punë!”, thotë njëri nga qytetarët.

Pritjet më të mëdha të qytetarëve kanë të bëjnë me ekonominë. Ata shpresojnë se premtimet e kryeministrit Thaçi do të realizohen, sidomos ato që kanë të bëjnë me uljen e papunësisë.
| s.b & RTK staff |