[Arb]

Programi qeveritar në Kuvend vazhdon të marrë kritika nga opozita

Prishtinë, 21 prill - Kuvendi i Kosovës ka vazhduar edhe sot debatin për programin e qeverisë për periudhën 2008 2011 ku ka marrë kritika të ashpra nga opozita. Deputetët kritikuan programin e qeverisë për mungesë të përcaktimeve të qarta rreth realizimit të projekteve të planifikuara, sidomos në lëmin e zhvillimin ekonomik.

Deputeti i LDK së, Sabri Hamiti tha se ka ardhur koha që të gjitha institucionet e Kosovës të shkëputen përfundimisht nga festiviteti dhe të fillojnë të kalojnë në punë. "Unë mendoj se kjo mbledhje është koha kur duhet të bëhet kjo prerje sepse festat sa të bukura që janë, ato mbarojnë, dhe mendoj që edhe Kuvendi dhe Qeveria, por edhe të tjerat duhet të nisen nga puna", theksoi Hamiti, i cili shtoi se si kapitull elementar i këtij programi qeverisës është dashur të jetë artikulimi i filozofisë ekonomike. "Unë kisha kërkuar që në program të theksohet se sa për qind janë zbatuar problemet kapitale deri tash dhe sa do t'i zbatojë kjo qeveri sepse kjo është esenciale. Po ashtu do të kisha dëshirë që të më thuhet në program se sa është GDP ja e Kosovës dhe sa do të jetë pas katër viteve", tha deputeti Hamiti. Ai kërkoi që institucionet e Kosovës t'i kushtojnë një vëmendje të veçantë arsimit në vend. "Problemi tjetër është tek kultura, arsimi, shkenca etj. Sistemi i kontrollit në arsimim në të gjitha shkollat, duhet të përforcohet sepse është lënë anash. Në vendet e tjera është përforcuar shtylla e arsimit shumë më mirë", tha Hamiti, duke kërkuar që shteti të financojë ende planet kapitale të kulturës nacionale, botimet e librave kapitale, teatrin etj.

Deputetja nga radhët e AAK së, Gjylnaze Syla, theksoi "Qeveria Thaçi" është e vetmja qeveri që ka punuar pa program për tre muaj dhe që vendimet i ka marrë ad hoc. "Programi i paraqitur nuk ka afate kohore, si dhe kur do të rriten pagat, kur do të ndryshohet skema sociale dhe qysh", tha Syla.

Vlora Çitaku, deputete nga radhët e PDK së tha se e keqja është se nuk do të ketë më azil politik për keqpërdoruesit dhe shkelësit e ligjit, të evidentuar nga Zyra e Auditorit Gjeneral dhe nga Agjencia Antikorrupsion. Ajo e ka mbrojtur programin e qeverisë, duke u mbështetur në sukseset e arritura gjatë periudhës 100 ditëshe.

Bajram Kosumi, deputet nga AAK ja tha se debati i sotëm është shndërruar në një duet politik, duke thënë se opozita nxjerr të metat e programit dhe kritikon programin qeveritar, ndërkaq, pozita lavdëron këtë program. Kosumi i ka sugjeruar qeverisë që ta plotësojë programin e saj në disa çështje thelbësore sidomos atë që kanë të bëjnë në hartimin e strategjive. "Instalimi i rikthimit të modelit në zero, nuk mund ta qoj Kosovën përpara, sepse historia e Kosovës nuk fillon as me zgjedhjet e mëhershme, e as me zgjedhjet e fundit, ngase historia ka filluar shumë më herët", tha Kosumi.

Deputeti i AKR së, Ibrahim Makolli, tha se qeveria e Kosovës me anë të këtij programi është dashur që të ketë qasje serioze në çështje të ndryshme, sidomos në fushën e bujqësisë, ku sipas deputetit tij, do të duhej të përpiloheshin platforma bujqësore. Ai propozoi që qeveria të formojë një bankë investive, kurse termocentralet të jepen me koncesione dhe mos të privatizohen.

Besa Gaxherri, deputete nga radhët e LDD së, tha se në çdo shtet demokratike legjislativi monitoron qeverinë ndërsa në Kosovë sipas saj po ndodh e kundërta.

Pas krejt këtyre kritikave, punën e qeverisë e ka lavdëruar Fehmi Mujota nga PDK ja, duke thënë se kjo qeveri ka filluar punën mbarë. "Kjo qeveri ka filluar punën mbarë me shpalljen e pavarësisë së Kosovës me njohjen ndërkombëtare të saj", tha Mujota duke thënë se programi ndoshta është i vonuar, por sipas tij, me rëndësi është që të realizohet. Ndryshe, debati për programin qeverisës për periudhën 2008 2011 nga Legjislativi do të vazhdojë edhe gjatë orëve të pasdites ku pritet edhe miratimi i tij.

QIK-u