[Dilaver]

Londër, 8 maj - Kryeministri i Shqipërisë, Sali Berisha, ka kërkuar nga Kombet e Bashkuara ta përmbushin misionin e tyre në pjesën veriore të Kosovës.
Ai tha të enjten për BBC-në se zgjedhjet lokale serbe, që janë paralajmëruar të mbahen për datën 11 maj, mund të jenë përpjekje për një ndarje të butë të Kosovës.
"Por, duhet ta dinë të gjithë se ndarja e Kosovës është një ide shumë e rrezikshme. Kjo është një gjë tepër e gabuar. Askush të mos mendojë se ne mund ta pranojmë ndarjen e Kosovës, as të butë. Prandaj, bashkësia ndërkombëtare dhe Kombet e Bashkuara duhet ta përmbushin misionin e tyre në veriun e Mitrovicës", tha ndër të tjera kryeministri shqiptar Berisha.
Ai i bëri thirrje komunitetit ndërkombëtar që të jetë i qartë me Serbinë dhe t'ia ndalojë Beogradit praktikën e manipulimit të komunave serbe në Kosovën Veriore.
I pyetur nëse ndarja e Kosovës do ta ringjallte idenë për "Shqipërinë e Madhe", kryeministri shqiptar, Berisha, ka hedhur poshtë një tezë të tillë. "Teza për bashkimin e Shqipërisë me Kosovën nuk qëndron, por e theksoj se ne nuk do ta pranojmë kurrë ndarjen e pjesës veriore të Kosovës dhe bashkimin e saj me Serbinë. Ndarja e Kosovës është ide e rrezikshme për tërë rajonin".