[rilinda]

Dita Ndërkombëtare kundër duhanit

Sot është Dita ndërkombëtare kundër duhanit. Edhe Kosova që njihet si vendi me numër shumë të lartë të duhan- pirësve ka shënuar sot Ditën Botërore kundër Duhanit me aktivitete të shumta edukative. “Të krijojmë dhe të kënaqemi në ambient pa duhan”, është motoja e sivjetme që po shënon këtë ditë.

Sipas të dhënave të Organizatës Botërore të Shëndetësisë, duhani është shkaktari i dytë i vdekjeve në botë. Çdo vit në botë vdesin rreth 5 milionë njerëz si pasojë e pirjes së duhanit. Çdo 10 sekonda duhani shkakton një vdekje. Jetëgjatësia e një personi që pi duhan shkurtohet për 10 vjet. Kosova ka 600 mijë duhanxhinjë që brenda ditës së bashku shpenzojnë gjysmë milioni euro për të blerë cigare. Kjo do të thotë se çdo i pesti njeri në Kosovë pi duhan.
Këto janë disa nga të dhënat që dolën sot nga konferenca që ka organizuar për këtë qëllim Instituti Kombëtar i shëndetësisë së Kosovës. Në Kosovë ende nuk ka filluar zbatimi i ligjit që parashikon ndalimin e pirjes së duhanit në institucionet publike, mjetet e transportit publik, bare, restorante, mjedise tregtare etj.
Parlamenti i Kosovës ka miratuar ligjin për duhanin dhe është nënshkruar nga PSSP-ja, por ende nuk ka filluar të zbatohet. Sipas, sekretarit të përhershëm në Ministrinë e Shëndetësisë, Kadri Hyseni, është duke u punuar që këtë vit të fillojë zbatimi i tij.
Udhëheqësi i zyrës së Organizatës Botërore të Shëndetësisë, në Prishtinë, Skënder Syla, tha se kjo ditë është një rast për të sinjalizuar nevojën urgjente për të gjitha shtetet për t’i bërë të gjitha vendet publike 100 përqind pa duhan.