[niemand]

AAK-ja mbajti “ceremoninë e varrimit të premtimeve të qeverisë Thaçi”

Aleanca e te Rinjve të Kosovës në bashkëpunim me disa organizata studentore dhe të shoqërisë civile kanë protestuar sot me moton “Ceremoni e Varrimit të premtimeve të Qeverisë Thaçi”. Protestuesit kanë parakaluar në rrugën “Nëne Terezë” që nga “Sheshi i Zahir Pajaziti”, deri të ndërtesa e Kuvendit të Kosovës ku simbolikisht e kanë varrosur arkivolin me premtimet e qeverisë Thaçi.
Kujtim Selmanaj, udhëheqës i Aleancës së të Rinjve të Kosovës dhe i protestës së sotme, tha se “kjo varrosje simbolike e arkivolit me premtimet e qeverisë Thaçi ka të bëjë më tërheqjen e vërejtjes si për këtë qeveri, ashtu edhe për institucionet e tjera të vendit për premtimet të cilat ata nuk po i realizojnë, si dhe veprimet e tyre të pa matura”.


Sipas tij, këto premtime kanë të bëjnë ato të cilat Thaçi i ka dhënë gjatë fushatës parazgjedhore.
“24 orë rrymë, si dhe ngritja e pagave dhe pensioneve, krijimi i vendeve të reja të punës”, ka sqaruar Selmanaj.

Ndërkaq, veprimet të cilat po i ndërmerr qeveria Thaçi, pas shpalljes së pavarësisë së Kosovës, sipas Selmanajt janë të papranueshme, dhe kanë të bëjnë eliminimin e datave më të rëndësishme të cilat kanë të bëjnë më çështjen tonë kombëtare.

“Fuqizimin e SHIK-ut, njohja ndërkombëtare e Republikës së Kosovës nga 100 shtete për 30 ditë, Dita e flamurit, çlirimit ”, ka theksuar Selmanaj.

Ndërkaq, në pyetjen e gazetarëve se a janë varrosur më këtë arkivol edhe disa nga premtimet e qeverisë së mëparshme të AAK-së, Selmanaj tha se ajo qeveri të paktën ka mbajtur premtimin sa i përket furnizimit me energji elektrike gjatë stinës së verës.

“Sot nuk jemi këtu përfaqësues të Aleancës, por edhe përfaqësues të organizatave studentore, si dhe te shoqërisë civile”, ka thënë Selmanaj.

Protesta kaloi e qetë dhe pa incidente.